ഇന്ത്യാക്കാരിയടക്കം 20 നിരപരാധികള്‍ക്കാണ് ബംഗഌദേശില്‍ ഐഎസ് തീവ്രവാദികളുടെ 11 മണിക്കൂര്‍ നീണ്ട ഭീകരതയ്ക്ക് അന്ത്യം വന്നപ്പോള്‍ ജീവന്‍ നഷ്ടമായത് . ഇന്ത്യാക്കാരിയടക്കം ബന്ദികളില്‍ 20 പേരെയാണ് തീവ്രവാദികള്‍ വെട്ടിക്കൊന്നത്. 13 പേരെ മോചിപ്പിച്ചു. സംഭവത്തില്‍ 30 പേര്‍ക്കാണ് പരിക്കേറ്റത്.
അക്രമികളില്‍ ആറു പേരെ സുരക്ഷാഭടന്മാര്‍ വധിച്ചപ്പോള്‍ ഒരാളെ ജീവനോടെ പിടികൂടി. വെള്ളിയാഴ്ച രാത്രി ഒമ്പതോടെ തീവ്രവാദികള്‍ ഹോളി ആര്‍ട്ടിസാന്‍ ബേക്കറിയിലേക്ക് എത്തുമ്പോള്‍ നോമ്പു തുറക്കാനെത്തിയവരെക്കൊണ്ട് റെസ്‌റ്റോറന്റ് നിറഞ്ഞിരുന്നു. അള്ളാഹു അക്ബര്‍ വിളികളോടെ ബോംബെറിഞ്ഞ് ഭീകരാന്തരീക്ഷം സൃഷ്ടിച്ച ശേഷം ബേക്കറിക്കുള്ളിലെ ആള്‍ക്കാരെ ബന്ദികളാക്കി.
ഈ സമയത്ത് ബേക്കറിയില്‍ വിദേശികളും മദ്ധ്യവര്‍ഗ്ഗക്കാരുമായി അനേകര്‍ ഉണ്ടായിരുന്നു. തുടര്‍ന്ന് ബംഗഌദേശികളെ വിട്ടയച്ചു. പിന്നീട് റെസ്‌റ്റോറന്റിന്റെ മുകള്‍ നിലയിലേക്ക് കൊണ്ടുപോയി ഓരോരുത്തെയായി വധിച്ചു. 40 പേരെയാണ് ബന്ദികളാക്കിയത്. ഇവരില്‍ മരിച്ചതിലേറെയും ഇറ്റലി, ദക്ഷിണകൊറിയ, ജപ്പാന്‍ എന്നിവിടങ്ങളില്‍ നിന്നുള്ളവരായിരുന്നു. ഇറ്റാലിയന്മാര്‍ മാത്രം എട്ടു പേരുണ്ടായിരുന്നു.
മൂര്‍ച്ചയേറിയ ആയുധം കൊണ്ടായിരുന്നു കൊല നടത്തിയത്. കൃത്യം നടത്തിയതും വെള്ളിയാഴ്ച രാത്രി തന്നെയായിരുന്നെന്നാണ് വിവരം. രാത്രി തന്നെ സുരക്ഷാ ഉദ്യോഗസ്ഥര്‍ റെസ്‌റ്റോറന്റ് വളഞ്ഞു. അതിശക്തമായ ഏറ്റുമുട്ടലില്‍ രണ്ടു പോലീസ് കോണ്‍സ്റ്റബിള്‍മാര്‍ കൂടി കൊല്ലപ്പെട്ടു. ശനിയാഴ്ച രാവിലെ റെസ്‌റ്റോറന്റിനുള്ളില്‍ കടന്ന കമാന്റോകള്‍ 15 മിനിറ്റിനകം എല്ലാവരെയും കീഴ്‌പ്പെടുത്തി അക്രമികള്‍ വിദ്യാഭ്യാസമുള്ളവരും 20 നും 27 നും ഇടയില്‍ പ്രായക്കാരാണെന്നുമാണ് വിവരം

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha