അമേരിക്കയിലെ ഫ്‌ലോറിഡയില്‍ താമസിക്കുന്ന 27-കാരിയെ പോലീസ് അറസ്റ്റു ചെയ്തു. തന്റെ മൂന്നു വയസ്സുകാരനായ മകനെ കുത്തിക്കൊലപ്പെടുത്തിയതിനാണ് അവരെ അറസ്റ്റു ചെയ്തത്. ഈജിപ്ത് മൊണീക് റോബിന്‍സണ്‍ എന്ന യുവതിയുടെ ബോയ്ഫ്രണ്ടാണ് കൊലപാതകം പോലീസില്‍ അറിയിച്ചത്. മൊണീക്കിന് ജാമ്യം അനുവദിച്ചിട്ടില്ല.

മൊണീക്കിന്റെ ബോയ്ഫ്രണ്ട് ഇക്കഴിഞ്ഞ ചൊവ്വാഴ്ചയാണ് അടുത്തുള്ള അഗ്നിശമനസേനാ ഓഫീസിലെത്തി വിവരം പറഞ്ഞത്. തന്റെ കുഞ്ഞു മകനെ തന്റെ ഗേള്‍ഫ്രണ്ട് കൊലപ്പെടുത്തി എന്ന് അയാള്‍ അറിയിച്ചതിനെ തുടര്‍ന്ന് പോലീസ് സംഘം സംഭവസ്ഥലത്ത് പാഞ്ഞെത്തി.

അവരുടെ വീടിനടുത്തുള്ള ചതുപ്പു നിലത്തില്‍ ഒരു സ്യൂട്ട്‌കേസ് പോലീസ് കണ്ടെത്തി. അതിനുള്ളിലായിരുന്നു കുട്ടിയുടെ മൃതദേഹം സൂക്ഷിച്ചിരുന്നത്. കുത്തേറ്റതിനെ തുടര്‍ന്നാണ് കുഞ്ഞ് മരണപ്പെട്ടതെന്ന് പോസ്റ്റ്‌മോര്‍ട്ടം റിപ്പോര്‍ട്ടുകള്‍ വ്യക്തമാക്കി.

ഇപ്പോള്‍ വിചാരണ കാത്ത് ജയിലില്‍ കഴിയുന്ന മൊണിക് തന്റെ സഹതടവുകാരിയായ ടിഫനി പവലിനോട് പറഞ്ഞത്, തന്റെ കുഞ്ഞിന് അഡോള്‍ഫ് ഹിറ്റ്‌ലറിന്റെ ആത്മാവു ബാധിച്ചിട്ടുണ്ടായിരുന്നതിനാലാണ് കുഞ്ഞിനെ താന്‍ കൊന്നത് എന്നാണ്. ഏരിസ് ജൂവാന്‍ അസെവെഡൊ എന്ന ആ മൂന്നു വയസ്സുകാരനെ കൊന്നത് മൊണീക് തന്നെയാണെന്ന് തെളിയുകയാണെങ്കില്‍ അവര്‍ക്ക് മരണശിക്ഷ ലഭിക്കാനാണു സാധ്യത എന്നു പറയപ്പെടുന്നു.

കുഞ്ഞിനെ കൊലപ്പെടുത്തിയതില്‍ തനിക്ക് സന്തോഷമേ ഉള്ളൂ എന്നും ആ 'പിശാചിന്‍ കുഞ്ഞില്‍' നിന്നും താന്‍ ലോകത്തെ രക്ഷിക്കയായിരുന്നുവെന്നുമാണ് അവളുടെ നിലപാട്. ഇതെല്ലാം അറിഞ്ഞതിനുശേഷം അവളുടെ സഹതടവുകാരിയായ ടിഫനിക്ക് അവളോടൊപ്പം ഒരേ തടവുമുറിയില്‍ കഴിയാന്‍ താത്പര്യമില്ലെന്നും മറ്റൊരു മുറിയിലേയ്ക്ക് തന്നെ മാറ്റണമെന്നും അഭ്യര്‍ത്ഥിച്ചിട്ടുണ്ട്.

മൊണീക്കിന്റെ ബോയ്ഫ്രണ്ട് വിവരം അറിയിച്ചതിനെ തുടര്‍ന്ന് സംഭവസ്ഥലത്ത് എത്തിയ പോലീസ് സംഘത്തിലെ ഉദ്യോഗസ്ഥന്‍ തന്റെ പട്രോള്‍ കാറില്‍ നിന്നും പുറത്തിറങ്ങിയ ഉടനെ മൊണീക് സമീപത്തെത്തി, വിലങ്ങു വച്ചോളൂ. ഞാന്‍ എന്റെ കുട്ടിയെ കൊന്നു സ്യൂട്ട്‌കേസിലാക്കിയിട്ടുണ്ട് എന്ന് അറിയിച്ചുവത്രേ. ഫെബ്രുവരിയിലാണ് അവളുടെ വിചാരണ ആരംഭിക്കുന്നത്.