അമേരിക്കയുടെ നാല്പ്പത്തിയഞ്ചാമതു പ്രസിഡന്റായി ഡോണള്ഡ് ട്രംപ് സത്യപ്രതിജ്ഞ ചെയ്തു അധികാരമേറ്റു
അമേരിക്കയുടെ നാല്പ്പത്തിയഞ്ചാമതു പ്രസിഡന്റായി ഡോണള്ഡ് ട്രംപ് സത്യപ്രതിജ്ഞ ചെയ്തു അധികാരമേറ്റു. ചടങ്ങുകള്ക്കായ് ട്രംപിന്റെ കുടുംബാംഗങ്ങളും പങ്കെടുത്തു. മുന് പ്രസിഡന്റുമാരായ ജോര്ജ് ഡബ്ല്യൂ ബുഷ്, ബില് ക്ലിന്റന് എന്നിവര് ചടങ്ങില് പങ്കെടുത്തു. ട്രംപിന്റെ മുഖ്യഎതിരാളിയായി മല്സരിച്ച ഹിലറി ക്ലിന്റനും ചടങ്ങിന് എത്തി. തിരഞ്ഞെടുപ്പില് പരാജയപ്പെട്ടശേഷം ഹിലറി ക്ലിന്റനുമായി ട്രംപ് മുഖാമുഖം വരുന്ന ആദ്യചടങ്ങാണിത്.
യുഎസ് സുപ്രീം കോടതി ചീഫ് ജസ്റ്റിസ് ജോണ് റോബര്ട്സ് സത്യപ്രതിജ്ഞാ വാക്യം ചൊല്ലിക്കൊടുത്തു. ആദ്യം മൈക്ക് പെന്സ് വൈസ് പ്രസിഡന്റായി സത്യപ്രതിജ്ഞ ചെയ്തു. ഏറ്റവും കൂടിയ പ്രായത്തില് അധികാരമേല്ക്കുന്ന വ്യക്തിയാണു ട്രംപ്. റൊണാള്ഡ് റെയ്ഗന് അധികാരമേല്ക്കുമ്പോള് 69 വയസ്സായിരുന്നു.
യുഎസ് പ്രസിഡന്റുമാരില് ഏറ്റവും ധനികനായ ട്രംപ് അധികാരമേറ്റതു നാലു ദശകത്തിനിടെ പ്രസിഡന്റുമാര്ക്കു ലഭിച്ചതില് ഏറ്റവും കുറഞ്ഞ ജനപ്രീതിയുമായാണ് (40%). 2009ല് അധികാരമേല്ക്കുമ്പോള് ഒബാമയുടെ ജനപ്രീതി 84ശതമാനമായിരുന്നു. 2016 നവംബര് എട്ടിനാണു യുഎസ് പ്രസിഡന്റ് തിരഞ്ഞെടുപ്പു നടന്നത്. രണ്ടു മാസത്തിനുശേഷമാണു നിയുക്ത പ്രസിഡന്റും വൈസ് പ്രസിഡന്റും അധികാരമേറ്റത്.
https://www.facebook.com/Malayalivartha
