ബ്രിട്ടനില്‍ സെക്‌സ് നല്‍കിയാല്‍ അതിനു പ്രതിഫലമായി താമസം സൗജന്യമായി നല്‍കുന്ന വീട്ടുടമകള്‍ പെരുകി വരുന്നതായി റിപ്പോര്‍ട്ട്. രാജ്യത്ത് വളര്‍ന്ന് വരുന്ന പുതിയ റെന്റ് മാര്‍ക്കറ്റിന്റെ സ്വഭാവം ഇത്തരത്തിലാണെന്നാണ് വെളിപ്പെട്ടിരിക്കുന്നത്. ഇത്തരം പരസ്യങ്ങളുടെ എണ്ണം പെരുകുന്നുവെന്നും സൂചനയുണ്ട്. ഒരു ന്യൂസ് ഏജന്റിന്റെ വിന്‍ഡോയ്ക്ക് മേല്‍ ഒട്ടിച്ച് വച്ചിരിക്കുന്ന ഇത്തരത്തിലുള്ള ഒരു പരസ്യം കടുത്ത ആശങ്കയാണുയര്‍ത്തിയിരിക്കുന്നത്.

പൂര്‍ണമായും ഫര്‍ണിഷ് ചെയ്തിരിക്കുന്ന വീടിന് യാതൊരു വിധത്തിലുമുള്ള ബില്ലുകളും അടക്കേണ്ടി വരില്ലെന്നും പകരം തനിക്ക് ചുംബനങ്ങളും ആലിംഗനവും നല്‍കിയാല്‍ മതിയെന്നുമാണ് ഇത്തരം ചില പരസ്യങ്ങളിലൂടെ ലാന്‍ഡ് ലോര്‍ഡുമാര്‍ വാഗ്ദാനം ചെയ്യുന്നത്. എന്നാല്‍ ഒറ്റയ്ക്ക് കഴിയുന്ന സ്ത്രീകള്‍ക്ക് മാത്രമേ ഇത്തരത്തിലുള്ള വീടുകള്‍ നല്‍കുകയുള്ളൂ. സെക്‌സ് നല്‍കിയാല്‍ റൂമോ ഫ്‌ലാറ്റോ സൗജന്യമായി താമസിക്കാന്‍ നല്‍കാമെന്ന് സൂചിപ്പിക്കുന്ന ഇത്തരത്തിലുള്ള ഒരു പരസ്യം ബെര്‍മിങ് ഹാമിലും ദൃശ്യമായിട്ടുണ്ട്. വാടകകള്‍ വര്‍ദ്ധിച്ച് വരുന്ന ഈ കാലത്ത് ഇത്തരം പരസ്യങ്ങള്‍ ചില സ്ത്രീകളെയെങ്കിലും പ്രലോഭിപ്പിക്കുമെന്നുറപ്പാണ്.

ഇത്തരത്തിലുള്ള ഒരു പരസ്യം കണ്ട് ഒരു പ്രമുഖ ഓണ്‍ലൈന്‍ പത്രത്തിന്റെ വനിതാ റിപ്പോര്‍ട്ടര്‍ പേര് മാറ്റി ബന്ധപ്പെട്ടിരുന്നു. മറുതലയ്ക്കല്‍ ഫോണെടുത്തയാള്‍ സ്റ്റീവ് എന്നാണ് പരിചയപ്പെടുത്തിയിരിക്കുന്നത്. ഈ റൂം മറ്റൊരു സ്ത്രീയ്ക്ക് നല്‍കിപ്പോയെന്നും അയാള്‍ പറഞ്ഞിരുന്നു. താന്‍ വിവാഹബന്ധം വേര്‍പിരിഞ്ഞ് ഒറ്റയ്ക്ക് താമസിക്കുന്ന ആളാണെന്നും അതിനാലാണ് ഇത്തരത്തിലൊരു ബന്ധം വേണമെന്ന് തോന്നിയതെന്നും സ്റ്റീവ് വിശദീകരിക്കുകയും ചെയ്തിരുന്നു. എന്നാല്‍ ഇയാളെ ഔപചാരികമായി സമീപിച്ചപ്പോള്‍ എപ്പോള്‍, എവിടെയാണീ പരസ്യം നല്‍കിയതെന്ന കാര്യം വെളിപ്പെടുത്താന്‍ അയാള്‍ തയ്യാറായതുമില്ല.

ഇത്തരത്തിലുള്ള മറ്റൊരു പരസ്യം ക്രെയ്ഗ്‌സ് ലിസ്റ്റിലാണ് പോസ്റ്റ് ചെയ്തിരിക്കുന്നത്. വാല്‍സാളിലെ പ്രോപ്പര്‍ട്ടിയുടെ പരസ്യമായിരുന്നു ഇത്. രണ്ട് ബെഡ് ഫ്‌ലാറ്റില്‍ സൗജന്യ റൂം വാഗ്ദാനം ചെയ്തുള്ള പരസ്യമായിരുന്നു ഇത്. ഉചിതയായ സ്ത്രീക്കിത് നല്‍കുമെന്നായിരുന്നു ഓഫര്‍. താന്‍ ലണ്ടനിലാണ് ജോലി ചെയ്യുന്നതെന്നും മിക്ക സമയത്തും യാത്രയിലായിരിക്കുമെന്നും അതിനാല്‍ ഇവിടെ താമസിക്കാനെത്തുന്ന സ്ത്രീക്ക് ഇത് മിക്ക സമയത്തും സ്വന്തം ഫ്‌ലാറ്റ് പോലെ ഉപയോഗിക്കാമെന്നുമായിരുന്നു ആ പരസ്യം. ഇതിന് പകരം ഈ ഫ്‌ലാറ്റ് വൃത്തിയായി സൂക്ഷിക്കണമെന്നും തനിക്ക് സെക്‌സ് നല്‍കണമെന്നുമാണ് ഫ്‌ലാറ്റുടമ ഈ പരസ്യത്തിലൂടെ ആവശ്യപ്പെടുന്നത്. 35 വയസില്‍ താഴെയുള്ളവര്‍ക്കാണ് മുന്‍ഗണനയേകിയിരിക്കുന്നത്. ഈ സൈറ്റില്‍ ഇതു പോലുള്ള മറ്റ് പോസ്റ്റുകളും കാണാം.