ചെറിയൊരു അശ്രദ്ധ മതി വലിയ അപകടമുണ്ടാകാന്‍. അതുകൊണ്ട് തന്നെ നമ്മള്‍ ചെയ്യുന്ന കാര്യങ്ങളിലെല്ലാം പരമാവധി ശ്രദ്ധ എപ്പോളും ഉണ്ടാകണം. പ്രത്യേകിച്ച് വണ്ടിയോടിക്കുന്ന കാര്യത്തില്‍ കണ്ണും മനസും എപ്പോളും റോഡില്‍ തന്നെയാകണം. ശ്രദ്ധ മരിക്കുന്നിടത്ത് അപകടം ജനിക്കുന്നു എന്നാണ് ചൊല്ല്. എന്നാല്‍ ശ്രദ്ധ മരിച്ചുപോയ ഒരു ഡ്രൈവര്‍ക്ക് പറ്റിയ അപകടത്തിന്റെ വീഡിയോ ആണ് സമൂഹ മാധ്യമങ്ങളില്‍ വൈറല്‍ ആയിരിക്കുന്നത്. 

യുക്രേനിലെ ഒരു ചെറുപട്ടണത്തിലാണ് അപടകം നടന്നത്. റോഡ് സൈഡില്‍ ഡാന്‍സ് ചെയ്തുകൊണ്ടിരുന്ന സുന്ദരിയെ നോക്കിയതാണ് സൂപ്പര്‍ ബൈക്കും കാറും കൂട്ടിയിടിച്ച് അപകടമുണ്ടായതിന്റെ പ്രധാന കാരണം. കാര്‍ ഡ്രൈവറുടെ  ശ്രദ്ധ റോഡിലെ ഡാന്‍സിലായിരുന്നു. അപകടത്തിന്റെ ആഘാതത്തില്‍ ബൈക്ക് റൈഡര്‍ തെറിച്ചു റോഡില്‍ വീഴുന്നതും വിഡിയോയിലൂണ്ട്. എന്നാല്‍ രണ്ടു വാഹനത്തിലെ ആള്‍ക്കാരും പരമാവധി അപകടം ഒഴിവാക്കാന്‍ ശ്രമിച്ചെങ്കിലും കൂട്ടിയിടിക്കുകയായിരുന്നു. ബൈക്ക് റൈഡര്‍ ഭാഗ്യം കൊണ്ടാണ് രക്ഷപ്പെട്ടതെങ്കിലും കാലിനും ഇടുപ്പെല്ലിനും പൊട്ടലുകളുണ്ടെന്നാണ് റിപ്പോര്‍ട്ടുകള്‍.