മരണം രംഗബോധമില്ലാത്ത കോമാളിയാണ് എന്നു പറയുന്നതെത്ര ശരിയാണ്. വര്‍ണശബളമായ ജീവിതം സ്വപനം കണ്ട് ഒരു കൊച്ചു പൂമ്പാറ്റയെ പോലെ പറന്നു നടക്കേണ്ട പ്രായത്തില്‍ അവളുടെ ജീവന്‍ അപായപ്പെടുത്തി കാന്‍സര്‍ കടന്നു വരുമ്പോള്‍, ആ 20 കാരിക്ക് ഉറപ്പായിരുന്നു താന്‍ ഉടന്‍ മരിക്കുമെന്ന്. എന്നാല്‍ ആശയറ്റ ജീവിതം വേദനാസംഹാരികളുടെ പിന്‍ബലത്തില്‍ തള്ളി നീക്കുകയാണ് അവള്‍ ചെയ്തത്. തനിക്ക് ഏറ്റവും പ്രിയപ്പെട്ട തന്റെ സഹോദരിയെ അരികില്‍ വിളിച്ച് അവള്‍ പറഞ്ഞു, എനിക്ക് സുന്ദരിയായി മരിക്കണം.

ബോണ്‍ കാന്‍സര്‍ ബാധിച്ച് മരണപ്പെടുന്നതിനു അഞ്ചു ദിവസം മുന്‍പാണ് സൗത്ത് ഫിനിപൈന്‍സ് സ്വദേശിനിയായ റേസിന്‍ പ്രെഗുണ്ട തന്റെ സഹോദരിയോട് ഇതാവശ്യപ്പെട്ടത്. സൗന്ദര്യത്തെ ഏറെ ഇഷ്ടപ്പെട്ടിരുന്ന റേസിന്റെ ഏറ്റവും വലിയ വിഷമമായിരുന്നു, രോഗത്തെ തുടര്‍ന്ന് തന്റെ സൗന്ദര്യം നഷ്ടപ്പെടുന്നത്. മരണത്തില്‍ എങ്കിലും താന്‍ ഏറ്റവും സുന്ദരിയായിരിക്കണം എന്ന് അതിനാലാണ് അവള്‍ ആഗ്രഹിച്ചത്. 

ഏപ്രില്‍ 17 നു പെട്ടന്ന് രോഗം മൂര്‍ച്ഛിച്ച് റേസിന്‍ മരണപ്പെടുകയായിരുന്നു. എന്നാല്‍ ആ സമയത്ത് തന്റെ അനുജത്തിയുടെ അവസാന ആഗ്രഹം ചേച്ചിയായ റോളിന് ഓര്‍മ വന്നു. മോഡലിങ് രംഗത്ത് സജീവമായിരുന്ന റോളിന്‍ ഉടന്‍ തന്നെ പരിചയത്തിലുള്ള ഒരു മേക്കപ്പ് ആര്‍ട്ടിസ്റ്റിനെ കണ്ടെത്തി, തന്റെ സഹോദരിയെ മേക്കപ്പ് ചെയ്യാന്‍ ആവശ്യപ്പെട്ടു. ജീവിതത്തില്‍ പലരെയും മേക്കപ്പ് ചെയ്തു സുന്ദരിയാക്കിയിട്ടുള്ള മേക്കപ്പ് ആര്‍ട്ടിസ്റ്റിനെ സംബന്ധിച്ചിടത്തോളം ജീവനറ്റ ശരീരത്തെ സുന്ദരമാക്കുന്നത് വേദനാജനകമായിരുന്നു. 

എന്നാല്‍ ആ 20 കാരിയുടെ അന്ത്യാഭിലാഷം എല്ലാവരും ഒരേ പോലെ നെഞ്ചേറ്റി. വെളുത്ത നിറമുള്ള ശവപ്പെട്ടിക്കുള്ളില്‍ ഒരു മാലാഖയെപ്പോലെ റേസിന്‍ കിടന്നു. ഇളം വെള്ള നിറമുള്ള ഗൗണ്‍ ധരിച്ച റേസിനെ തലയില്‍ വച്ച പൂക്കള്‍ തുന്നിച്ചേര്‍ത്ത ബാന്‍ഡ് കൂടുതല്‍ സുന്ദരിയാക്കി. പുഞ്ചിരിച്ചു കൊണ്ടാണ് അവള്‍ അവസാന നിമിഷം കിടന്നത്. ഒരു മാലാഖ ഉറങ്ങിക്കിടക്കുന്നതായാണ് തോന്നുന്നത് എന്ന് റേസിനെ കണ്ടവര്‍ കണ്ടവര്‍ പറഞ്ഞു. 

ജീവിച്ചു കൊതി തീരാതെയാണ് തന്റെ അനുജത്തി പോയത്, അവസാന ആഗ്രഹം സാധിച്ചതിന്റെ സന്തോഷമെങ്കിലും അവളുടെ ആത്മാവിനു ഉണ്ടാകട്ടെ, റോളിന്‍ പറഞ്ഞു.