പട്ടിണിക്കോലത്തില്‍ നിന്ന് ബോഡിബില്‍ഡറിലേക്ക്; മരണത്തില്‍ നിന്ന് ജീവിതത്തിലേക്ക് തിരിച്ചു നടന്ന നിക്കോള എന്ന പെണ്‍കുട്ടി
വെറും 25 കിലോ ഭാരമുള്ള ഒരു കൗമാരക്കാരിയുടെ രൂപത്തെക്കുറിച്ച് നിങ്ങള്‍ക്കു ചിന്തിക്കാമോ? കഴിക്കാന്‍ ഭക്ഷണമില്ലാഞ്ഞിട്ടല്ല ഈറ്റിങ് ഡിസോര്‍ഡര്‍ ആണ് ശരീരത്തില്‍ നിന്നും എല്ലുകള്‍ എണ്ണിയെടുക്കാവുന്ന വിധം ഇവളെ ഒരു പട്ടിണിക്കോലമാക്കിയത്. മെലിഞ്ഞ ശരീര പ്രകൃതിയായിരുന്നു ഹാംപ്‌ഷെയറിലെ നിക്കോള എന്ന കൗമാരക്കാരിക്ക്. വീണ്ടും മെലിയണം സുന്ദരിയാവണം എന്ന ചിന്ത കടുത്തു വന്നപ്പോള്‍ കഴിക്കുന്ന ഭക്ഷണത്തിന്റെ അളവു അവള്‍ നന്നേകുറച്ചു. കൂടാതെ അതികഠിനമായ വ്യായാമ മുറകളും പിന്തുടര്‍ന്നു. കുറഞ്ഞ അളവിലുള്ള ഭക്ഷണവും അിത വ്യായാമവും മൂലം അവള്‍ വീണ്ടും മെലിഞ്ഞു.
എന്നിട്ടും തൃപ്തിതോന്നാത്ത നിക്കോള ആറാഴ്ച ഭക്ഷണം കഴിക്കാതെയിരുന്നു. നിരാഹാരം മൂന്നാഴ്ച പിന്നിട്ടപ്പോള്‍ ഒരിറക്കുവെള്ളം പോലും കുടിക്കാന്‍ പറ്റാത്ത അവസ്ഥയില്‍ അവള്‍ എത്തി. ഭക്ഷണത്തോടുള്ള കടുത്ത വിരോധംമൂലം അവള്‍ മെലിഞ്ഞു ശോഷിച്ചു. ശരീരഭാരം 25 കിലോയായിക്കുറഞ്ഞപ്പോള്‍ മാതാപിതാക്കള്‍ അവളെ സൗത്ത്ആംപ്റ്റണിലെ ആശുപത്രിയിലെത്തിച്ചു. തെറ്റായ ആഹാരശൈലിയും പട്ടിണിയും മൂലം തിളക്കത്തോടെ തിങ്ങിവളര്‍ന്ന മുടി കൊഴിഞ്ഞു പോയി, ആര്‍ത്തവം നിന്നു. ശരീരത്തിലെ പ്രധാനപ്പെട്ട അവയവങ്ങളെല്ലാം പണിമുടക്കി. നീണ്ട ആറുമാസത്തെ മാസത്തെ ചികിത്സയുടെ ഫലമായാണ് നിക്കോളിന് ആരോഗ്യം തിരികെ ലഭിച്ചത്.
ചികിത്സാസമയത്തൊക്കെ മൂക്കിലെ ട്യൂബിലൂടെ ദ്രാവകരൂപത്തിലുള്ള ഭക്ഷണമായിരുന്നു ഡോക്ടര്‍മാര്‍ നിക്കോളിനു നല്‍കിയിരുന്നത്. ചിത്സാകാലത്തെക്കുറിച്ച് നിക്കോള്‍ പറയുന്നതിങ്ങനെ '' ചികിത്സയ്ക്കിടെ രണ്ടുവട്ടം ഡോക്ടര്‍മാര്‍ എന്റെ അച്ഛനമ്മമാരെ വിളിച്ചു പറഞ്ഞു. ഏതു നിമിഷവും ഇവള്‍ മരിക്കാമെന്ന്. പക്ഷെ അവര്‍ക്കുറപ്പുണ്ടായിരുന്നു എങ്ങനെയെങ്കിലും ഞാന്‍ അതിജീവിക്കുമെന്ന്. അതിജീവിക്കാതിരിക്കാന്‍ ഞാന്‍ പരമാവധി ശ്രമിച്ചു. മൂക്കിലെ ട്യൂബുകള്‍ പറിച്ചെറിയാന്‍ പലകുറി ശ്രമിച്ചു. കാരണം അതുണ്ടെങ്കിലല്ലേ അവര്‍ എനിക്കാഹാരം തരൂ. എനിക്കെങ്ങനെയെങ്കിലും മരിച്ചാല്‍ മതി എന്ന തോന്നലായിരുന്നു. പക്ഷെ എന്നിട്ടും ഞാന്‍ മരിച്ചില്ല. അവര്‍ എനിക്കു മൂന്നാഴ്ചയോളം മയങ്ങാനുള്ള മരുന്നു നല്‍കി. മൂക്കിലെ ട്യൂബിലൂടെ ആഹാരവും നല്‍കി എന്നെ ജീവിപ്പിച്ചു. ആശുപത്രിയില്‍ നിന്നും മടങ്ങിയെത്തിയ എനിക്ക് എല്ലാം മറക്കണമെന്നുണ്ടായിരുന്നു. അങ്ങനെയാണ് യാത്രകള്‍ പോകാന്‍ ഞാന്‍ തീരുമാനിച്ചത്. മെക്‌സിക്കോ, അയര്‍ലന്റ് അങ്ങനെ കുറേസ്ഥലങ്ങളിലേക്ക് ഞാന്‍ യാത്രപോയി.
നീണ്ട ആശുപത്രിവാസവും യാത്രകളും ജീവിതത്തെക്കുറിച്ചുള്ള നിക്കോളയുടെ കാഴ്ചപ്പാടുകളെ മാറ്റിമറിച്ചു. ആരോഗ്യകരമായ ഭക്ഷണം കഴിച്ച് ജിമ്മില്‍ പോയി കൃത്യമായ വ്യായാമം ചെയ്ത് അവള്‍ സ്വാഭാവിക ജീവിതത്തിലേക്കു തിരിച്ചു വന്നു. നീണ്ട ആറുവര്‍ഷം കൊണ്ട് ജീവിതത്തില്‍ പലവിധ നല്ലകാര്യങ്ങള്‍ സംഭവിച്ചു. 24-ാം വയസ്സില്‍ നിക്കോളിന്റെ ശരീരഭാരം 56 കിലോയായി. ബോഡിബില്‍ഡിംഗില്‍ ഹരംകയറിയ നിക്കോള്‍ യുകെ ബോഡിബില്‍ഡിംങ് ചാംപ്യന്‍ഷിപ്പില്‍ ബോഡി ട്രാന്‍സ്‌ഫോര്‍മേഷന്‍ കാറ്റഗറിയില്‍ വിജയിയായി.
തന്റെ ജീവിതത്തിലെ അപ്രതീക്ഷിത വഴിത്തിരിവുകളെക്കുറിച്ച് നിക്കോള പറയുന്നതിങ്ങനെ '' ഒരിക്കലും ജീവിതം ഇങ്ങനെ മാറുമെന്ന് ഞാനൊരിക്കലും ചിന്തിച്ചിരുന്നില്ല. എന്നെക്കുറിച്ചു ജീവിതത്തിലാദ്യമായി എനിക്കഭിമാനം തോന്നിത്തുടങ്ങിയതിപ്പോഴാണ്. സ്‌കൂളില്‍ പഠിക്കുമ്പോള്‍ എങ്ങനെ സ്ലിം ആയിരിക്കണമെന്നു മാത്രമായിരുന്നു എന്റെ ചിന്ത. അതിനുവേണ്ടി അനാരോഗ്യകരമായ ഭക്ഷണശീലം ഞാന്‍ പിന്തുടര്‍ന്നു. എന്തിന് ഭക്ഷണം പോലും എന്നെന്നേക്കുമായി ഞാന്‍ ഉപേക്ഷിച്ചു. എന്റെ ജീവന്‍ തന്നെ അപകടത്തിലാക്കിയ ആ മിഥ്യാബോധത്തില്‍ നിന്ന് ഞാനുണര്‍ന്നതിപ്പോഴാണ്. എന്റെ ജീവിതത്തിലെ യഥാര്‍ത്ഥ ലക്ഷ്യം ഞാന്‍ തിരിച്ചറിഞ്ഞതിപ്പോഴാണ്''.
''എന്തിനാണ് ഈ കുഞ്ഞുങ്ങള്‍ മറ്റുള്ളവര്‍ പറയുന്നതു കേട്ടു വെറുതെ തടി കുറയ്ക്കാനും കൂട്ടാനുമൊക്കെ ശ്രമിക്കുന്നത്. പട്ടിണി കിടന്നും അനാരോഗ്യകരമായ ഭക്ഷണശീലങ്ങള്‍ പിന്തുടര്‍ന്നും സ്വന്തം ആരോഗ്യം നശിപ്പിക്കുന്നത്. അങ്ങനെ ചെയ്താലുണ്ടാകുന്ന പരിണിതഫലങ്ങള്‍ അനുഭവിക്കേണ്ടി വരുന്നത് താനും തന്റെ കുടുംബവുമാണെന്നുള്ള ബോധ്യമുണ്ടെങ്കില്‍ ഇങ്ങനെ പ്രവര്‍ത്തിക്കുമോ? അത്തരം ആളുകള്‍ക്കുള്ള മറുപടിയാണ് നിക്കോളയുടെ ജീവിതം.'' നിക്കോളയെ ചികിത്സിച്ച ഡോക്ടര്‍മാര്‍ പറയുന്നു.
https://www.facebook.com/Malayalivartha
