ഒത്തുപിടിച്ചാല്‍... സ്റ്റാര്‍ട്ട് ആകാതെ നിന്ന ബസ് വലിച്ചു കയറ്റാന്‍ മനുഷ്യചങ്ങല തീര്‍ത്ത് വിദ്യാര്‍ത്ഥികള്‍
ഒത്തൊരുമിച്ച് നിന്നാല്‍ ഏത് പ്രതിസന്ധിയും മറികടക്കാമെന്ന് നമുക്കോരോരുത്തര്‍ക്കും അറിയാം. എന്നാലും നമ്മള്‍ ഒരു പ്രശ്‌നം വരുമ്പോള്‍ മറ്റുള്ളവര്‍ നോക്കട്ടെ, എനിക്കെന്തുകാര്യം എന്ന് ചിന്തിക്കും. എന്നാല്‍ ചിലര്‍ വിപത്തുകള്‍ വന്നുചേരുന്ന സമയങ്ങളില്‍ സാധാരണക്കാര്‍ ഇതുവരെ പുറത്തുകാണിക്കാത്ത ധൈര്യം കാണിച്ച് മറ്റുള്ളവര്‍ക്ക് പ്രതീക്ഷയും പ്രചോദനവും പകരും. അതിന്റെ ഏറ്റവും പുതിയ ഉദാഹരണമാണ് മണിപ്പൂരില്‍ നിന്നുള്ളൊരു കാഴ്ച്ച.
വഴിയിലെ ചെളിയില്‍ കുടുങ്ങി സ്റ്റാര്‍ട്ട് ആകാതെ കിടന്ന ബസ് വലിക്കാന്‍ ഒരു കൂട്ടം വിദ്യാര്‍ത്ഥിനികള്‍ മനുഷ്യചങ്ങല തീര്‍ത്ത് അണിനിരന്നു. ലോക്ടാക്ക തടാകത്തിലേക്ക് പഠനയാത്ര പോയതായിരുന്നു വിദ്യാര്‍ത്ഥികള്‍. വഴിയില്‍ വെച്ച് ബസ് ബ്രേക്ക്ഡൗണ്‍ ആയി. ഇനിയെന്ത് ചെയ്യുമെന്ന് പരസ്പരം ചോദിച്ച വിദ്യാര്‍ത്ഥിനികള്‍ പരസഹായത്തിനൊന്നും കാത്തിരിക്കാതെ സ്വന്തം നിലയ്ക്ക് പ്രശ്‌നം പരിഹരിക്കാനിറങ്ങി.
ചെളിയില്‍ നിന്നും ബസ് വലിച്ചു കയറ്റാന്‍ വിദ്യാര്‍ത്ഥിനികള്‍ പരിശ്രമിക്കുന്നതിന്റെ വീഡിയോ ഇപ്പോള്‍ ട്വിറ്റര്‍ അടക്കമുള്ള നവമാധ്യമങ്ങളില്‍ വൈറലാണ്.ലെവായ് ബെംബെം എന്ന യൂസറാണ് ആദ്യം ചിത്രം നവമാധ്യമങ്ങളില്‍ ഷെയര്‍ ചെയ്തത.് ചിത്രത്തിന് വലിയ പിന്തുണ ലഭിച്ചതിന് പിന്നാലെ പെണ്‍കുട്ടികളെ പ്രശംസിച്ചുകൊണ്ട് പ്രതികരണങ്ങള്‍ പ്രവഹിക്കുകയാണ്. പെണ്‍കുട്ടികളുടെ മനക്കരുത്തിനും നിശ്ചയദാര്‍ഡ്യത്തിനുമാണ് യൂസര്‍മാരുടെ കൈയടി.
https://www.facebook.com/Malayalivartha
