ദക്ഷിണ പാക്കിസ്ഥാനിലെ സിന്ധ് പ്രവിശ്യയില്‍ വെയര്‍ഹൗസിന്റെ മേല്‍ക്കൂര തകര്‍ന്നുവീണ് 11 പേര്‍ മരിച്ചു. ഒമ്പതുപേര്‍ക്ക് അപകടത്തില്‍ പരിക്കേറ്റു. കറാച്ചിക്ക് 280 മൈല്‍ വടക്ക് റോഹ്‌റി ജില്ലയിലായിരുന്നു അപകടമുണ്ടായത്. മരിച്ചവരില്‍ ആറു സ്ത്രീകളും രണ്ടു പെണ്‍കുഞ്ഞുങ്ങളും ഉള്‍പ്പെടുന്നു. വെയര്‍ഹൗസില്‍ നിര്‍മാണപ്രവര്‍ത്തനങ്ങള്‍ നടക്കവെയാണ് മേല്‍ക്കൂര ഇടിഞ്ഞുവീണതെന്ന് പോലീസിനെ ഉദ്ധരിച്ച് ഏജന്‍സികള്‍ റിപ്പോര്‍ട്ട് ചെയ്തു. പാക്കിസ്ഥാന്‍ കെട്ടിടത്തിന്റെ മേല്‍ക്കൂര തകര്‍ന്നുള്ള അപകടങ്ങള്‍ തുടര്‍ക്കഥയാണ്.

2014ല്‍ ലാഹോറില്‍ മോസ്‌ക് തകര്‍ന്നുവീണ് 24 പേര്‍ മരിച്ചിരുന്നു. ഇതേവര്‍ഷംതന്നെയുണ്ടായ പേമാരിയിലും വെള്ളപ്പൊക്കത്തിലും സമാനസാഹചര്യത്തില്‍ 200ല്‍ അധികംപേര്‍ക്കു ജീവന്‍ നഷ്ടപ്പെട്ടതായും കണക്കാക്കപ്പെടുന്നു.