ഇന്ധനവില വര്ദ്ധനവിനും ജനദ്രോഹനയങ്ങള്ക്കും എതിരെ എ.ഐ.വൈ.എഫ് നടത്തുന്ന പ്രതിഷേധമായ പഞ്ച് മോഡി ചലഞ്ചില് സംഘര്ഷം സൃഷ്ടിക്കാന് യുവമോര്ച്ച, ഇതോടെ പൊലീസ് സുരക്ഷ ശക്തമാക്കുന്നു
എ.ഐ.വൈ.എഫിന്റെ പഞ്ച് മോഡി ചലഞ്ച് സംസ്ഥാനത്ത് ക്രമസമാധാന പ്രശ്നം സൃഷ്ടിക്കുന്നതായി വിലയിരുത്തല്. ഇതേ തുടര്ന്ന് പ്രതിഷേധ പരിപാടി നടക്കുന്ന സ്ഥലങ്ങളിലെല്ലാം പൊലീസ് ശക്തമായ കാവലേര്പ്പെടുത്തി. കഴിഞ്ഞ ദിവസം കോഴിക്കോട് മൊഫ്യൂസ് ബസ് സ്റ്റാന്ഡില് എ.ഐ.വൈ.എഫ് പ്രവര്ത്തകര് നടത്തിയ പഞ്ച് മോഡി പരിപാടി അലങ്കോലമാക്കാന് യുവമോര്ച്ച പ്രവര്ത്തകര് ശ്രമിച്ചത് സംഘര്ഷത്തിനിടയാക്കി. സംഭവത്തില് വനിതാ നേതാക്കള്ക്കടക്കം പരിക്ക് പറ്റിയതായി എ.ഐ.വൈ.എഫ് നേതാക്കള് പറഞ്ഞു. സംഭവം കൈവിട്ട് പോകുമെന്ന് മനസിലായതോടെ പൊലീസ് എട്ട് എ.ഐ.വൈ.എഫ് പ്രവര്ത്തകരെയും അഞ്ച് യുവമോര്ച്ച പ്രവര്ത്തകരെയും അറസ്റ്റ് ചെയ്ത് നീക്കി.
ഇന്ധനവില വര്ദ്ധനവിനെതിരെയും കേന്ദ്രസര്ക്കാരിന്റെ ജനവിരുദ്ധ നയങ്ങള്ക്കും എതിരെയാണ് സി.പി.ഐയുടെ യുവജനവിഭാഗമായ എ.ഐ.വൈ.എഫ് പഞ്ച് മോഡി ചലഞ്ച് ആരംഭിച്ചത്. മോദിയുടെ ചിത്രം പതിച്ച ബലൂണില് ഗ്ലൗസിട്ട് ഇടിക്കുന്നതാണ് ഈ പ്രതിഷേധ പരിപാടി. ആദ്യ പരിപാടി വന്വിജയമായതോടെയാണ് എ.ഐ.വൈ.എഫ് സംസ്ഥാനത്തുടനീളം പ്രതിഷേധം ശക്തമാക്കാന് തീരുമാനിച്ചത്. എന്നാല് സംസ്ഥാനത്ത് എവിടെ ഇത്തരം പരിപാടി നടന്നാലും തങ്ങള് പ്രതിഷേധിക്കുമെന്ന നിലപാടിലാണ് യുവമോര്ച്ച സംസ്ഥാന നേതൃത്വം.
സി.പി.ഐയുടെ പി.കൃഷ്ണപിള്ള സ്മാരകത്തില് നിന്ന് എ.ഐ.വൈ.എഫ് സംസ്ഥാന സെക്രട്ടറിയേറ്റ് അംഗം സി.കെ ബിജിത്ത് ലാലിന്റെ നേതൃത്വത്തില് പ്രവര്ത്തകര് പ്രതിഷേധ മാര്ച്ചായി കോഴിക്കോട് ബസ് സ്റ്റാന്ഡിലെത്തിയാണ് പഞ്ച്മോഡി ചലഞ്ച് നടത്തിയത്. ഇതിനിടെ യുവമോര്ച്ച ജില്ലാ പ്രസിഡന്റ് സി. സാലുവും മറ്റ് പ്രവര്ത്തകരും അതിക്രമിച്ച് കയറി സംഘര്ഷം സൃഷ്ടിക്കുകയായിരുന്നു. പൊലീസ് നോക്കി നില്ക്കെയാണ് ഇതെല്ലാം സംഭവിച്ചതെന്ന് ദൃക്സാക്ഷികളും എ.ഐ.വൈ.എഫ് പ്രവര്ത്തകരും പറയുന്നു. സംസ്ഥാനത്തുടനീളം പഞ്ച് മോഡി ചലഞ്ച് നടത്തുന്നതിനാല് ശക്തമായ സുരക്ഷ ഏര്പ്പെടുത്താന് പൊലീസ് തീരുമാനിച്ചിട്ടുണ്ട്.
https://www.facebook.com/Malayalivartha
