എന്നും ജലന്ധര് അരമനയിലെ പട്ടുമെത്തയില് മയങ്ങിയിരുന്ന ബിഷപ്പ് ഫ്രാങ്കോക്ക് ഇന്നത്തെ മയക്കം പാലാ ളാലം പള്ളിക്ക് തൊട്ടുമുന്നിലുള്ള സബ്ജെയിലില്.ഫ്രാങ്കോ മുളയ്ക്കലിന് 5968ാം നമ്പര് തടവുപുള്ളിയായി കേരളത്തിലെ വത്തിക്കാനെന്നറിയപ്പെടുന്ന പാലയില് 14 ദിവസത്തെ ജയില് വാസമാണ്
ജയില് സൂപ്രണ്ടിന്റെ മുറിയിലേക്കാണ് മെത്രാനെ കൊണ്ടുപോയത്. അവിടെ നിന്നും മറ്റു നടപടികള് പൂര്ത്തിയാക്കി ശേഷം രണ്ടാം നമ്പര് സെല്ലിലേക്ക് മാറ്റി. ഏഴു സെല്ലുകളാണ് പാല സബ് ജയിലില് ഉണ്ടായിരുന്നത്. ചെറിയ കുറ്റങ്ങള് ചെയ്ത ഏഴ് പ്രതികളെ പാര്പ്പിച്ച ഈ സെല്ലില് നിന്നും പിന്നീട് മൂന്നാം നമ്പര് സെല്ലിലേക്ക് മാറ്റി. ഈ സെല്ലില് ഒരു മോഷണ കേസ് പ്രതിയും ഒരു കഞ്ചാവ് കേസ് പ്രതിയുമാണ് ബിഷപ്പിനൊപ്പം മൂന്നാം നമ്പര് സെല്ലിലുള്ളത്. രാവിലെ കോട്ടയം പൊലീസ് ക്ലബ്ബില് നിന്നും പ്രഭാത ഭക്ഷണം കഴിച്ചിറങ്ങിയ ബിഷപ്പിന് ഉച്ചയ്ക്ക് ഊണു കഴിക്കാന് സാധിച്ചിരുന്നില്ല. അതുകൊണ്ട് തന്നെ കോട്ടയം സബ് ജയിലില് എത്തിയപ്പോള് പൊലീസുകാര് ബിഷപ്പിന് അവിടെ വെച്ച് ഭക്ഷണം നല്കി. ചോറും മീന്കറിയും അവിയലും അച്ചാറും അടങ്ങിയ ഭക്ഷണമാണ് ബിഷപ്പ് കഴിച്ചത്. ഇതിന് ശേഷമാണ് അദ്ദേഹത്തെ സെല്ലിലേക്ക് മാറ്റിയത്.
സുരക്ഷാ പ്രാധാന്യം അര്ഹിക്കുന്ന പ്രതി ആയതിനാല് വലിയ ക്രിമിനല് പശ്ചാത്തലം ഇല്ലാത്ത പ്രതികള്ക്കൊപ്പമാണ് അദ്ദേഹത്തെ പാര്പ്പിക്കാന് ജയില് അധികൃതര് തീരുമാനിച്ചത്. ഇതേ തുടര്ന്നാണ് അദ്ദേഹത്തെ രണ്ട് പ്രതികള്ക്കൊപ്പം മാത്രം മൂന്നാം നമ്പര് സെല്ലില് പ്രവേശിപ്പിച്ചത്. സെല്ലിലേക്ക് പ്ലേറ്റും ഗ്ലാസും കമ്പിളി പുതപ്പും പായയും ബിഷപ്പിനായി നല്കിയിട്ടുണ്ട്. ബിഷപ്പ് ധരിച്ചിരുന്ന ബെല്റ്റ് അതേസമയം അഴിച്ചു വാങ്ങിയിട്ടുണ്ട്. അതേസമയം ജയില് വസ്ത്രം അധികൃതര് നല്കിയില്ല. ജുബ്ബയും പാന്റും തന്നെ ധരിക്കാന് അനുമതി നല്കുകയാണ് ജയില് അധികൃതര് ചെയ്തത്. കപ്പയും രസവും ചോറുമാണ് ഇന്ന് വൈകീട്ടുള്ള ജയില് മെനു. അതുകൊണ്ട് ബിഷപ്പിന് ജയിലിലെ ഈ ഭക്ഷണവും രാത്രിയോടെ കഴിക്കാം. നാളെ രാവിലെ ഉപ്പുമാവും പഴവുമാണ് പ്രഭാത ഭക്ഷണത്തിന്റെ മെനു. നിസ്സഹകരിക്കാതെ തന്നെ ബിഷപ്പ് ഭക്ഷണം കഴിച്ച് കഴിച്ചുകൂട്ടുമെന്നാണ് ജയില് അധികൃതര് പ്രതീക്ഷിക്കുന്നത്. വ്യാഴാഴ്ച്ചയാണ് ഹൈക്കോടതി ബിഷപ്പിന്റെ ജാമ്യാപേക്ഷ പരിഗണിക്കുന്നത്. അതുവരെ അദ്ദേഹത്തിന് ഈ ഭക്ഷണവുമായി പൊരുത്തപ്പെടേണ്ടി വരും.
വിലങ്ങു വെക്കാന് പൊലീസ് തയ്യാറാകാത്തതു കൊണ്ട് കൂളായാണ് ബിഷപ്പ് ജയിലില് പ്രവേശിച്ചത്. ജീപ്പില് പൊലീസുകാര്ക്ക് നടുവിലേക്കാണ് ബിഷപ്പ് വന്നിറങ്ങിയത്. നീല ജുബ്ബയും പാന്റുമായിരുന്നു വേഷം. ജയില് പരിസരത്ത് കൂടി നിന്ന ചാനല് കാമറകളെയും ജനക്കൂട്ടത്തിന്റെ കൂക്കുവിളികളെയും വകവെക്കാതെയാണ് ബിഷപ്പ് പൊലീസുകാര്ക്കൊപ്പം ജയിലിന് ഉള്ളിലേക്ക് കയറിയത്. അള്ത്താരയില് മെത്രാനായി വിശുദ്ധ കര്മ്മങ്ങള് ചെയ്തിരുന്ന ബിഷപ്പ് ഇതോടെ ജയിലിനുള്ളില് അടക്കപ്പെടുന്ന ആദ്യത്തെ ബിഷപ്പായി മാറി ഫ്രാങ്കോ. ബിഷപ്പ്ഹൗസിലെ ആഡംബരങ്ങളില് നിന്നും പഞ്ച നക്ഷത്ര ഹോട്ടല് വാസവും പതിവാക്കിയ ബിഷപ്പാണ് ഇന്ന ജയില് സെല്ലില് പായവിരിച്ച് ഉറങ്ങുന്നത്. മുന്തിയ കട്ടിലിലായിരുന്നു അദ്ദേഹം ഉറങ്ങി ശീലിച്ചത്. എസിയും നിര്ബന്ധമായിരുന്നു. എന്നാല് ഇതൊന്നുമില്ലാതെ കൊതുകു കടിയും കൊണ്ട് മറ്റ് പ്രതികള്ക്കൊപ്പം ബിഷപ്പ് ഇന്ന് അന്തിയുറങ്ങേണ്ടി വരും.
ഫ്രാങ്കോ മുളയ്ക്കല് പൊലീസ് കസ്റ്റഡിയിലായിരുന്ന വേളയില് ദോശയും ഉപ്പുമാവും പഴവുമൊക്കെയാണ് കഴിച്ചിരുന്നത്. ഉപരിപഠനത്തിനായി ഏറെക്കാലം ഇറ്റലിയിലും വത്തിക്കാനിലുമായി ചിലവഴിച്ച ഫ്രാങ്കോ ഇറ്റാലിയന് ഭക്ഷണത്തിന്റെ രുചി ശീലിച്ചുപോയിരുന്നു. ഇറച്ചി ഏറെ ചേര്ന്ന ഇറ്റാലിയന് ഭക്ഷണമില്ലാതെ കഴിയുക അസാധ്യമായിരുന്നു. ജലന്ധറില് തനത് പഞ്ചാബി, കേരളീയ ഭക്ഷണവും രുചിച്ചായിരുന്നു ജീവിതം. എന്തായാലും വിശ്വാസികളോട് സഹനത്തിന്റെ മാര്ഗ്ഗത്തെ കുറിച്ച് പ്രസംഗിക്കുന്ന ബിഷപ്പ് ജയിലില് എങ്കിലും ആ പാതയില് തന്നെയാകും എന്നത് ഉറപ്പാണ്.
https://www.facebook.com/Malayalivartha