ചെന്നിത്തലയെയും ഉമ്മന്‍ ചാണ്ടിയെയും വരുന്ന പാര്‍ലെമെന്റ് തെരഞ്ഞടുപ്പില്‍ മത്‌സരിപ്പിച്ച് കേരളം കടത്താന്‍ കോണ്‍ഗ്രസ് ഹൈക്കമാന്റ് ആലോചിക്കുന്നു. ചെന്നിത്തലയും ചാണ്ടിയും കേരളത്തില്‍ നിന്ന് നാടുകടത്തപ്പെട്ടാല്‍ കേരളത്തിലെ കോണ്‍ഗ്രസിനെ ഒരു പരിധിവരെ രക്ഷിക്കാമെന്നാണ് ഹൈക്കമാന്റ് കണക്കുകൂട്ടുന്നത്.

മുല്ലപ്പള്ളി രാമചന്ദ്രനെ പ്രസിഡന്റും കൊടിക്കുന്നില്‍, എം ഐഷാനവാസ്, കെ. സുധാകരന്‍ എന്നിവരെ വര്‍ക്കിംഗ് പ്രസിഡന്റുമാരായി തീരുമാനിച്ചത് കേരളത്തിലെ ഗ്രൂപ്പ് മഹാരാജക്കന്‍മാരെ ഒഴിവാക്കാന്‍ വേണ്ടിയായിരുന്നു. കേരളത്തിലെ കോണ്‍ഗ്രസില്‍ ഇനി പുതിയ മുഖങ്ങള്‍ മതിയെന്നാണ് ഹൈക്കമാന്റിന്റെ തീരുമാനം ഉമ്മന്‍ചാണ്ടിയും ചെന്നിത്തലയും ചേര്‍ന്ന് ഗ്രൂപ്പ് കളിച്ച് കേരളത്തിന്റെ കോണ്‍ഗ്രസ് രാഷ്ട്രീയ ഭാവി ഇല്ലാതാക്കി എന്ന കണക്കുകൂട്ടലിലാണ് ഹൈക്കമാന്റ്. പുതിയ ഭാരവാഹികള്‍ക്ക് മൂന്ന് മേഖലകളുടെ ചുമതലമാണുള്ളത്. ഇവിടെയെന്നും ചെന്നിത്തലയുടെയും ഉമ്മന്‍ചാണ്ടിയുടെയും പേര് പറയുന്നതേയില്ല.

വിഡി സതീശന് മികച്ച പോസ്റ്റ് നല്‍കാന്‍ ഹൈക്കമാന്റ് ആലോചിച്ചതാണെങ്കിലും ഹര്‍ത്താല്‍ വിരുദ്ധ പ്രസംഗമാണ് സതീശന് വിനയായത്. സതീശന്‍ നല്ല നേതാവാണ്. അത് തന്നെയാണ് ഹൈക്കമാന്റിന്റെ വിശ്വാസം. എന്നാല്‍ പാര്‍ട്ടിക്ക് അപ്പുറം ആരും വളരേണ്ടതില്ലെന്നാണ് കോണ്‍ഗ്രസ് ഹൈക്കമാന്റിന്റെ നിലപാട്. തനിക്ക് പറ്റിയ അമളി സതീശന് അറിയാം. എന്നാല്‍ അത് തിരുത്താന്‍ സതീശന്‍ തത്കാലം തയ്യാറാവില്ല. ഗ്രൂപ്പുകള്‍ക്ക് ഒരു പരിഗണനയും നല്‍കരുതെന്ന് നേതാക്കള്‍ക്ക് രാഹുല്‍ ഗാന്ധി നിര്‍ദ്ദേശം നല്‍കിയിട്ടുണ്ട്. കേരളത്തില്‍ ശക്തമായ വേരോട്ടമുള്ള സിപിഎം, ബിജെപി പാര്‍ട്ടികളെ നേരിടണമെങ്കില്‍ ഗ്രൂപ്പ് രഹിത പ്രവര്‍ത്തനം കാഴ്ചവയ്ക്കണമെന്നാണ് രാഹുല്‍ ഗാന്ധിയുടെ നിലപാട്.

ഉമ്മന്‍ചാണ്ടിയെയും ചെന്നിത്തലയെയും രാഹുല്‍ ഗാന്ധിക്ക് മതിയായി. ഇരുവരും ചേര്‍ന്ന് കളിച്ച രാഷ്ട്രീയമാണ് കേരളത്തില്‍ കോണ്‍ഗ്രസിനെ പിന്നിലാക്കിയതെന്ന് രാഹുല്‍ ഗാന്ധി കരുതുന്നു. കഴിഞ്ഞ സര്‍ക്കാരിന്റെ കാലത്ത് ഉയര്‍ന്ന ആരോപണങ്ങള്‍ പാര്‍ട്ടിയെ കളകപ്പെടുത്തിയതിന്റെ പൂര്‍ണ്ണ ചിത്രം രാഹുലിന്റെ മനസിലുണ്ട്. അധികാരം പിടിക്കാന്‍ രണ്ടു നേതാക്കളും ഏതറ്റം വരെയും പോകുമെന്ന് രാഹുലിനറിയാം. അത് തിരിച്ചറിഞ്ഞു കൊണ്ടാണ് പുതിയ കാലത്തിലേക്ക് കോണ്‍ഗ്രസ് പ്രവേശിക്കുന്നത്. 

രാഹുല്‍ ഗാന്ധി വിളിക്കുന്ന ഒരു യോഗത്തിലും ചെന്നിത്തലയുടെയും ചാണ്ടിയുടെയും സാന്നിധ്യമില്ല. അവര്‍ ഡല്‍ഹിയിലെത്തി പറയുന്ന കാര്യങ്ങള്‍ രാഹുല്‍ ഗാന്ധി കേള്‍ക്കുന്നില്ല. കഴിയുന്നിടത്തോളം ഇരുവര്‍ക്കും രാഹുല്‍ സന്ദര്‍ശനാനുമതി നല്‍കുന്നുമില്ല. കേരളത്തിലെ കോണ്‍ഗ്രസിന് വേണ്ടത് അഴിമതിരഹിത പ്രതിഛായയാണെന്ന് ഹൈക്കമാന്റ് തിരിച്ചറിഞ്ഞിരിക്കുന്നു. അതിനിടയില്‍ ചെന്നിത്തലയും പിണറായി വിജയനും ചേര്‍ന്ന് നടത്തുന്ന ഒത്തുതീര്‍പ്പ് രാഷ്ട്രീയത്തെ കുറിച്ച് രാഹുല്‍ മനസിലാക്കിയിട്ടുണ്ടെന്നാണ് സൂചന.

ചെന്നിത്തലയെ ആലപ്പുഴയിലും ഉമ്മന്‍ചാണ്ടിയെ കോട്ടയത്തും മതിസരിപ്പിച്ചേക്കും. കെ എം മാണിയില്‍ നിന്ന് കോട്ടയം സീറ്റ് വാങ്ങിയായിരിക്കും ഉമ്മന്‍ചാണ്ടിയെ മത്സരിപ്പിക്കുക. ഇപ്പോഴത്തെ സാഹചര്യത്തില്‍ കേന്ദ്രത്തില്‍ യുപിഎ മന്ത്രിസഭക്കുള്ള സാധ്യത കുറവാണ്. യുപിഎ അധികാരത്തിലെത്തിയാല്‍ ചെന്നിത്തലയും ചാണ്ടിയും മന്ത്രിമാരാകും. കെസി വേണുഗോപാലിനെ നിയമസഭയില്‍ മതിസരിപ്പിക്കും. മുരളിയും രാഹുലിന്റെ ഗുണപാഠ പുസ്തകത്തില്‍ സ്ഥാനം നേടിയിട്ടുണ്ട്.