പ്രളയക്കെടുതിയെ തുടര്‍ന്ന തടസ്സപ്പെട്ട ഗെയില്‍ വാതക പൈപ്പ് ലൈന്‍ പദ്ധതി വീണ്ടും സജീവമാകുന്നു. എറണാകുളം, തൃശൂര്‍, മലപ്പുറം, കോഴിക്കോട് ജില്ലകളില്‍ യന്ത്രസാമഗ്രികളും മറ്റും പൂര്‍ണമായും വെള്ളത്തിനടിയിലായത് പൈപ്പിടലിനെ ബാധിച്ചിട്ടുണ്ടെങ്കിലും പുതിയ യന്ത്രസാമഗ്രികളും കൂടുതല്‍ ജോലിക്കാരെയും കൊണ്ടുവന്ന് 2019 മാര്‍ച്ചില്‍തന്നെ പദ്ധതി പൂര്‍ത്തിയാക്കാനാണ് ഗെയില്‍ തീരുമാനം.

443 കി.മീറ്റര്‍ ദൈര്‍ഘ്യമുള്ള കൊച്ചിമംഗളൂരൂ പ്രകൃതിവാതക പൈപ്പ് ലൈനിന്റെ 408 കി.മീറ്റര്‍ കേരളത്തിലും 35 കി.മീറ്റര്‍ കര്‍ണാടകയിലുമാണ്. ഇതില്‍ 375 കി.മീറ്റര്‍ ദൂരം പൈപ്പുകളുടെ വെല്‍ഡിങ് ജോലി പൂര്‍ത്തിയായി. 308 കി.മീറ്റര്‍ നീളത്തില്‍ പൈപ്പുകള്‍ മണ്ണിനടിയില്‍ സ്ഥാപിച്ചു. 16 കി.മീറ്റര്‍ ദൂരത്തില്‍ സ്ഥാപിക്കുന്ന വാള്‍വ് സ്‌റ്റേഷനുകളുടെ പണിയും പുരോഗമിച്ചുവരുകയാണ്. 28 വാള്‍വ് സ്‌റ്റേഷനുകളില്‍ 25 എണ്ണം കേരളത്തിലാണ്. പൈപ്പ് ലൈന്‍ കടന്നുപോകുന്ന ജില്ലകളിലെ വീടുകളിലും വാഹനങ്ങളിലും വാതകം വിതരണം ചെയ്യുന്നത് ഇവിടെ നിന്നാകും.

എറണാകുളത്ത് സിറ്റി ഗ്യാസ് പദ്ധതി വഴി വീടുകളില്‍ വാതകം ലഭിച്ചുതുടങ്ങിയിട്ടുണ്ട്. എന്നാല്‍, ഇതുവരെ 1800ഓളം വീടുകളില്‍ മാത്രമാണ് വാതക വിതരണം നടന്നതെന്നാണ് അറിയുന്നത്. പലയിടങ്ങളിലും പൈപ്പുകള്‍ സ്ഥാപിച്ചിട്ടുണ്ടെങ്കിലും കണക്ഷനായിട്ടില്ല. ഇന്ത്യന്‍ ഓയില്‍ കോര്‍പറേഷനും അദാനി ഗ്രൂപ്പും സംയുക്തമായാണ് നടപ്പാക്കുന്നത്.

തൃശൂര്‍, പാലക്കാട്, മലപ്പുറം, കോഴിക്കോട്, മാഹി, കണ്ണൂര്‍, കാസര്‍കോട്, വയനാട് ജില്ലകളിലെല്ലാം വീടുകളില്‍ വാതകമെത്തിക്കാന്‍ അദാനി ഗ്രൂപ്പിനാണ് അനുമതി ലഭിച്ചിരിക്കുന്നത്. പദ്ധതി പൂര്‍ത്തിയാകുമ്പോള്‍ എട്ട് ജില്ലകളിലെ വീടുകളില്‍ ചെലവ് കുറഞ്ഞ പാചകവാതകം കിട്ടുമെന്നാണ് അധികൃതര്‍ പറയുന്നത്. വാഹനങ്ങള്‍ക്ക് പെട്രോളിന്റെയും ഡീസലിന്റെയും നിലവിലെ വിലയുടെ ഏകദേശം 40 ശതമാനം കുറവില്‍ മലിനീകരണം കുറഞ്ഞ കംപ്രസ്ഡ് നാച്വറല്‍ ഗ്യാസും (സി.എന്‍.ജി) ലഭിക്കും.