ഇടുക്കി ജലവൈദ്യുതി പദ്ധതിയില്‍ രണ്ടാംനിലയം സ്ഥാപിക്കാന്‍ സര്‍ക്കാരിനോടു കെ.എസ്.ഇ.ബി. ശിപാര്‍ശ ചെയ്യും. തിരുവനന്തപുരത്തു ചേര്‍ന്ന ബോര്‍ഡ് സമ്പൂര്‍ണയോഗത്തിലാണു ഈ തീരുമാനം. സര്‍ക്കാര്‍ പച്ചക്കൊടി കാട്ടിയാല്‍ പദ്ധതിയുമായി മുന്നോട്ടുപോകാനാണു കെ.എസ്.ഇ.ബിയുടെ നീക്കം. പരമ്പരാഗത വൈദ്യുതിനിലയമാണ് ഉദ്ദേശിക്കുന്നത്. പമ്പിങ് സ്‌റ്റോറേജ് വൈദ്യുതിനിലയങ്ങളുടെ സാധ്യത പിന്നീടു പരിശോധിക്കും. വെള്ളിയാമറ്റത്തു വൈദ്യുതിനിലയം സ്ഥാപിക്കുന്നതു സംബന്ധിച്ചു നേരത്തേ ചര്‍ച്ച നടന്നിരുന്നു. അതിന്റെ ചുവടുപിടിച്ചാണ് ഇപ്പോഴത്തെ നീക്കം.

പീക്ക് ലോഡ് (ഏറ്റവും കൂടുതല്‍ വൈദ്യുതി ഉപയോഗമുള്ള) സമയത്തെ ആവശ്യം നിറവേറ്റാന്‍ നിലവില്‍ കഴിയാത്ത സാഹചര്യത്തിലാണു പുതിയ നിലയത്തിനുള്ള നീക്കം. സംസ്ഥാനത്തെ ഏറ്റവും വലിയ ജലവൈദ്യുതി പദ്ധതിയായ ഇടുക്കിയുടെ സ്ഥാപിതശേഷി 780 മെഗാവാട്ടാണ്. അത്രതന്നെ ശേഷിയുള്ള മറ്റൊരു നിലയമാണു കെ.എസ്.ഇ.ബി. ഉദ്ദേശിക്കുന്നത്. ഇതോടെ ഇടുക്കി പദ്ധതിയുടെ ശേഷി 1560 മെഗാവാട്ടായി ഉയരുമെന്നാണു പ്രതീക്ഷ. നിലവിലെ ആറു യന്ത്രങ്ങളും ഒരേസമയം പ്രവര്‍ത്തിപ്പിച്ചാല്‍ പ്രതിദിനം 18.24 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാന്‍ കഴിയും. എന്നാല്‍, പീക്ക് ലോഡ് സമയത്തെ ആവശ്യം നിര്‍വഹിക്കാന്‍ കഴിയുന്നില്ല.

കൂടിയവിലയ്ക്കു വൈദ്യുതി വാങ്ങാന്‍ തമിഴ്‌നാട് ഉള്‍പ്പെടെ ഇതരസംസ്ഥാനങ്ങള്‍ തയ്യാറാകുന്നതിനാല്‍ പവര്‍ എക്‌സ്‌ചേഞ്ച് വില കുത്തനെ ഉയര്‍ത്തുകയാണ്. പീക്ക് ടൈമില്‍ ഇപ്പോള്‍ പവര്‍ എക്‌സ്‌ചേഞ്ചിലെ വൈദ്യുതിവില 0710 രൂപയാണ്. കഴിഞ്ഞദിവസം യൂണിറ്റിന് 9.50 രൂപ നിരക്കില്‍ വൈദ്യുതി വാങ്ങേണ്ടിവന്നു.
നാലുവര്‍ഷം മുമ്പ് ഇതുസംബന്ധിച്ച ചര്‍ച്ച ആരംഭിച്ചിരുന്നു. ഇതെല്ലാം പരിഗണിച്ചാണ് രണ്ടാം വൈദ്യുതിനിലയം എന്ന ആശയമുദിച്ചത്.
ഇപ്പോഴത്തെ പ്രതിസന്ധിയാണു തീരുമാനത്തിനു വേഗം കൂട്ടിയത്. മൂലമറ്റം പവര്‍ ഹൗസില്‍ പ്രതിവര്‍ഷം ശരാശരി വൈദ്യുതി ഉത്പാദനം 2500 ദശലക്ഷം യൂണിറ്റാണ്.