ചിത്രകലയിലെ അത്ഭുതപ്രതിഭാസമായ എഡ്മണ്ട് തോമസ് ക്ലിന്റ് എന്ന ക്ലിന്റിന്റെ പിതാവ് തോമസ് ജോസഫ് (എം.ടി. ജോസഫ് 72) അന്തരിച്ചു. ഹൃദയാഘാതത്തെത്തുടര്‍ന്ന് എറണാകുളത്തെ സ്വകാര്യ ആശുപത്രിയിലായിരുന്നു അന്ത്യം.

സെന്‍ട്രല്‍ ഇന്‍സ്റ്റിറ്റിയൂട്ട് ഓഫ് ഫിഷറീസ് ടെക്‌നോളജിയില്‍ (സിഐഎഫ്ടി) ജീവനക്കാരനായിരുന്ന തോമസ് ജോസഫിന്റെ തേവരയിലെ ക്വാര്‍ട്ടേഴ്‌സിലായിരുന്നു ക്ലിന്റിന്റെ ജനനവും വളര്‍ച്ചയും അന്ത്യവും. ഒന്നാം നിലയിലെ മുറിയിലിരുന്നാണ് ക്ലിന്റ് ലോകം കണ്ടതും ചിത്രങ്ങള്‍ വരച്ചതും.

അത്കൊണ്ട് വിരമിച്ചശേഷം ഈ ക്വാര്‍ട്ടേഴ്‌സില്‍ തന്നെ ശിഷ്ടകാലം തുടരാന്‍ തോമസ് ജോസഫ് എല്ലാ ശ്രമവും നടത്തി. എന്നാല്‍ സര്‍ക്കാര്‍ നൂലാമാലകള്‍ അതനുവദിച്ചില്ല. തുടര്‍ന്നാണ് കലൂരിലെ വീട്ടിലേക്കു താമസം മാറ്റിയത്. ഈ വീടിനും പേര് ക്ലിന്റ് എന്നായിരുന്നു.

തോമസ് ജോസഫും ചിന്നമ്മയും ജീവിച്ചതിനു ക്ലിന്റ് എന്ന മകനല്ലാതെ മറ്റൊരു ലക്ഷ്യമില്ലായിരുന്നു. അവന്‍ എന്താവശ്യപ്പെട്ടോ അതെല്ലാം അവര്‍ ചെയ്തുകൊടുത്തു. അവര്‍ കാണിച്ചുകൊടുത്ത ക്ഷേത്രവും ആനകളും തുടങ്ങിയ കാഴ്ചകളെല്ലാം പിന്നീട് കലാലോകം നെഞ്ചേറ്റിയ നിറമാര്‍ന്ന ചിത്രങ്ങളായി.

1976 മേയ് 19-ന് ജനിച്ച ക്ലിന്റിന്റെ മരണം 1983 ഏപ്രില്‍ 15-നായിരുന്നു. ക്ലിന്റിനെക്കുറിച്ച് ഹരികുമാര്‍ സംവിധാനം ചെയ്ത സിനിമയുടെ സ്വിച്ചോണ്‍ ദിവസം ക്ലിന്റായി വേഷമിട്ടു വന്ന അലോകിനെ കണ്ട തോമസ് ജോസഫും ചിന്നമ്മയും കെട്ടിപ്പിടിച്ചു പൊട്ടിക്കരഞ്ഞു. തങ്ങളുടെ മകന്‍ തിരിച്ചെത്തിയെന്നായിരുന്നു അന്നവര്‍ പറഞ്ഞത്.

ക്ലിന്റ് ഉപയോഗിച്ചിരുന്ന വസ്ത്രങ്ങള്‍, ചെരുപ്പ്, സൈക്കിള്‍, കളിപ്പാട്ടങ്ങള്‍, അവന്‍ വരച്ച മുപ്പതിനായിരത്തോളം ചിത്രങ്ങള്‍ എന്നിവ പൊന്നു പോലെ സൂക്ഷിച്ചുവരുന്നു. ഇതില്‍ പലതും സിനിമയുടെ ചിത്രീകരണത്തിന് ഉപയോഗിച്ചു. ക്ലിന്റ് ഇരുന്ന സ്റ്റൂളും വരയ്ക്കാന്‍ ഉപയോഗിച്ച ബോര്‍ഡുമെല്ലാം കാണിച്ച ഈ സിനിമ തുടങ്ങുന്നതും അവസാനിക്കുന്നതും ഈ അപൂര്‍വ മാതാപിതാക്കളിലൂടെയാണ്.

തങ്ങള്‍ മരിച്ചാല്‍ തന്റെ ദേഹം പൊന്നുമോന്‍ ക്ലിന്റിന്റെ കല്ലറയില്‍ അവനുമേല്‍ വയ്ക്കുമെന്ന് തിരിച്ചറിഞ്ഞാണ് പിതാവ് തോമസ് ജോസഫ് മൃതദേഹം കോലഞ്ചേരി മെഡിക്കല്‍ കോളജ് ആശുപത്രിക്കു കൈമാറാന്‍ തീരുമാനിച്ചത്. മകന്റെ കല്ലറ പൊളിക്കാനോ അവനെ വേദനിപ്പിക്കാനോ തയാറാകാതെ തോമസ് ജോസഫ് മാത്രമല്ല ഭാര്യ ചിന്നമ്മയും ഇതേ സമ്മതപത്രം കൈമാറിയിട്ടുണ്ട്. ക്ലിന്റിനു മേല്‍ അത്രയേറെ സ്‌നേഹം ചൊരിഞ്ഞ മാതാപിതാക്കളായിരുന്നു ഇരുവരും.