ശബരിമല കര്‍മ്മ സമിതി ഇന്ന് വൈകിട്ട് തിരുവനന്തപുരത്ത് നടത്തുന്ന ഭക്ത സംഗമത്തിന്റെ ഉദ്ഘാടനത്തില്‍ നിന്ന് പിന്‍മാറണമെന്ന് ആവശ്യപ്പെട്ട് പിണറായി വിജയന്റെ പ്രതിനിധിയായി മന്ത്രി കടകംപള്ളി സുരേന്ദ്രന്‍ കൈമനം ആശ്രമത്തിലെത്തി മാതാ അമൃതാനന്ദമയിയെ സന്ദര്‍ശിച്ചതായി വിശ്വസനീയ കേന്ദ്രങ്ങള്‍ വെളിപ്പെടുത്തുന്നു.

സാധാരണ മാര്‍ക്‌സിസ്റ്റ് മന്ത്രിമാര്‍ അമ്മയെ കാണാന്‍ വരാറില്ല. ആശ്രമത്തില്‍ നടക്കുന്ന ചടങ്ങുകള്‍ക്ക് മാത്രമാണ് എത്താറുളളത്. എന്നാല്‍ ദര്‍ശന സമയത്താണ് കടകം പള്ളി അടിയന്തിരമായി എത്തി അമ്മയെ പ്രത്യേകം കണ്ടത്.

ഭക്ത സംഗമത്തിന്റെ ഉദ്ഘാടന ചടങ്ങില്‍ നിന്നും മാറി നിന്നില്ലെങ്കില്‍ ആശ്രമത്തിനും അമ്മയുടെ വിവിധ സ്ഥാപനങ്ങള്‍ക്കും ബുദ്ധിമുട്ടുകളുണ്ടാക്കുന്ന നടപടികളില്‍ സര്‍ക്കാരിന്റെ ഭാഗത്ത് നിന്നും സഹായം ലഭിക്കില്ലെന്ന മുന്നറിയിപ്പ് നല്‍കാനായാവാം കടകംപള്ളി എത്തിയതെന്നാണ് സൂചനകള്‍.

ആലപ്പാട്ടെ ഖനനം നടക്കുന്ന സ്ഥലം ആശ്രമ പരിസരത്താണ്. സമരം നടക്കുന്നത് അമ്യതാനന്ദമയിയുടെ അറിവോടെയാണെന്ന് സൂചനയുണ്ട്. അയ്യപ്പ കര്‍മ്മ സമിതിയുടെ ചുമതല ഏറ്റെടുത്തയുടന്‍ സര്‍ക്കാര്‍ അമ്യതാനന്ദമയിയ്‌ക്കെതിരെ വിമര്‍ശനങ്ങള്‍ ആരംഭിച്ചിരുന്നു. ആലപ്പാട്ടെ ഖനനത്തിന്റെ പേരിലാണ് അമ്യതാനന്ദമയിയെ സര്‍ക്കാര്‍ പരോക്ഷമായി ഭീഷണിപ്പെടുത്തുന്നത്.

ചുരുക്കത്തില്‍ അമ്യതാനന്ദമയിക്ക് ഉറക്കമില്ലാതായിരിക്കുകയാണ്. പുത്തരിക്കണ്ടത്തെ യോഗത്തില്‍ പങ്കെടുത്താല്‍ സര്‍ക്കാര്‍ ചെവിയില്‍ പിടിക്കും. പങ്കെടുത്തില്ലെങ്കില്‍ ആര്‍ എസ് എസ് ചെവിയില്‍ പിടിക്കും. ആര്‍ എസ് എസ് എക്കാലവും അമ്മയെ സംരക്ഷിച്ച പാര്‍ട്ടിയാണ്.

അമൃതാനന്ദമയിയുടെ വിശ്വസ്തനായ അമ്യതസ്വരൂപാനന്ദസ്വാമി കുവൈറ്റിലാണ് ഉള്ളത്. ദേശാഭിമാനിയുടെ ഉന്നതന്‍ കുവൈറ്റിലുള്ള സ്വാമിയുമായി ഫോണില്‍ സംസാരിച്ചിരുന്നു. ഒരു കാരണവശാലും ആര്‍ എസ് എസിന്റെ യോഗത്തില്‍ അമ്യതാനന്ദമയി പങ്കെടുക്കരുതെന്ന് അദ്ദേഹം ആവശ്യപ്പെട്ടു.

ആദ്യം അയ്യപ്പഭക്ത സംഗമത്തിന് പകരം സെക്രട്ടേറിയറ്റ് വളയലാണ് കര്‍മ്മ സമിതി ഉദ്ദേശിച്ചിരുന്നത്. എന്നാല്‍ അമ്മയുടെ ദര്‍ശന മഹോത്സവം നടക്കുന്നതുകൊണ്ടാണ് സെക്രട്ടേറിയറ്റ് വളയല്‍ ഒഴിവാക്കി ഭക്തസംഗമം 20ലേക്ക് മാറ്റിയത്.

അതിനിടെ അമ്യതാനന്ദമയി സംഗമത്തില്‍ പങ്കെടുക്കരുതെന്ന് ആവശ്യപ്പെട്ട് കോടിയേരിയും രംഗത്തെത്തി. ആര്‍എസ് എസ് യോഗത്തില്‍ അവര്‍ പങ്കെടുക്കരുതെന്ന് അദ്ദേഹം ആവശ്യപ്പെട്ടു. വിവിധ ജാതി മതസ്ഥര്‍ അമ്മയുടെ ഭക്തരായി ഉണ്ടെന്നും അവരെ നിരാശരാക്കരുതെന്നും പ്രസ്താവിച്ചു.

പണ്ട് അമ്മക്കെതിരെ പുസ്തകമെഴുതിയ വിദേശവനിതയെ കൈരളി റ്റി വിക്ക് വേണ്ടി ജോണ്‍ ബ്രിട്ടാസ് ഇന്‍ര്‍വ്യൂ ചെയ്തിരുന്നു. അന്ന് അമ്മക്കൊപ്പം നിന്നത് ആര്‍ എസ് എസാണ്. ബ്രിട്ടാസ് ഇപ്പോള്‍ മുഖ്യമന്ത്രിയുടെ മാധ്യമ ഉപദേഷ്ടാവാണ്. നരേന്ദ്രമോദി ഉള്‍പ്പെടെയുള്ള ബിജെപി നേതാക്കളുമായി അമ്മ അടുത്ത ബന്ധം പുലര്‍ത്തുന്നുണ്ട്. അതിനാല്‍ അമ്മക്ക് ഒരിക്കലും ബിജെപി തള്ളി പറയാനാവില്ല. അതേ സമയം സംസ്ഥാന സര്‍ക്കാരിനെ പിണക്കാനും കഴിയില്ല. നിരവധി സ്ഥാപനങ്ങള്‍ നടത്തുന്നയാളാണ് അമ്യതാനന്ദമയി. സര്‍ക്കാര്‍ പിണങ്ങിയാല്‍ അത് സ്ഥാപനങ്ങള്‍ക്ക് ദോഷമാകും.

ചടങ്ങില്‍ അമ്യതാനന്ദമയി പങ്കെടുക്കില്ലെന്ന് സിപിഎമ്മും പങ്കെടുക്കുമെന്ന് ബിജെപിയും വിശ്വസിക്കുന്നു.