ശബരിമലയില്‍ ആചാരം സംരക്ഷിക്കാന്‍ സെക്രട്ടേറിയറ്റ് നടയില്‍ നടന്നുവന്ന സമരം അവസാനിച്ചതിനു പിന്നാലെ ബി.ജെ.പിയില്‍ ആഭ്യന്തകലാപം പൊട്ടിപ്പുറപ്പെട്ടു. സമരപന്തലിലേയ്ക്ക് തിരിഞ്ഞുപോലും നോക്കാതിരുന്ന പി.കെ കൃഷ്ണദാസ് സമരം ഇന്നു തീരുമെന്ന് അറിഞ്ഞ് ഇന്നലെ സമരം ഏറ്റെടുത്ത നടപടിക്കെതിരെ ഇന്നലെ തന്നെ ഒരു വിഭാഗം രംഗത്തെത്തി. സമരം നയിച്ചു വന്നിരുന്ന വി.ടി രമ സമരം തുടരാന്‍ സന്നദ്ധത അറിയിച്ചിട്ടും ഇവരെ നിര്‍ബന്ധിച്ച് ആശുപത്രിയിലേയ്ക്ക് മാറ്റി കൃഷ്ണദാസ് പക്ഷം സമരം പിടിച്ചുവാങ്ങുകയായിരുന്നു. അവസാന ദിവസം രമയ്ക്ക് കിട്ടേണ്ട മൈലേജ് കൃഷ്ണദാസ് അടിച്ചെടുത്തെന്നാണ് ഇവരുടെ ആരോപണം.

സമരം പരാജയമായിരുന്നുവെന്ന് സംസ്ഥാന പ്രസിഡന്റ് പി.എസ് ശ്രീധരന്‍പിള്ള തന്നെ പരോക്ഷമായി സമ്മതിച്ചത് മറ്റൊരു വിവാദമാകുന്നതിനിടെയാണ് ഗ്രൂപ്പ്‌പോര് വീണ്ടും ബി.ജെ.പിയെ ഗ്രസിച്ചിരിക്കുന്നത്. സെക്രട്ടേറിയറ്റ് പടിക്കലെ സമരത്തിലേയ്ക്ക് സംസ്ഥാനത്തെ പ്രമുഖ നേതാക്കള്‍ ആരും തിരിഞ്ഞു നോക്കിയതേയില്ല. സമരം അവസാനിക്കുന്നതിന്റെ തലേന്ന് സമരം ഏറ്റെടുത്ത് കൃഷ്ണദാസിനെതിരെ മുരളീധരവിഭാഗം ദേശീയ നേതൃത്വത്തിന് പരാതി കൊടുക്കാനുള്ള ഒരുക്കത്തിലാണ്.

അതിനിടയില്‍ ശ്രീധരന്‍പിള്ളയുടെ വാക്കുകള്‍ പാര്‍ട്ടിക്ക് തുടരെ ക്ഷീണമുണ്ടാക്കുന്ന സാഹചര്യത്തില്‍ പ്രവര്‍ത്തകരും നേതാക്കളും അസംതൃപ്തരാണ്. ഇന്ന് ആശുപത്രി വിട്ട് ദേശീയ പ്രസിഡന്റ് അമിത് ഷായെ ഇത് അറിയിക്കാനുള്ള നീക്കത്തിലാണ് മറുപക്ഷം. ആര്‍.എസ്.എസ് പച്ചക്കൊടി കാണിച്ചതോടെ കെ.സുരേന്ദ്രന്‍ പ്രസിഡന്റാകാനുള്ള സാധ്യത ഏറുകയാണ്. തിരുവനന്തപുരത്ത് സ്ഥാനാര്‍ത്ഥിയാകാനുള്ള സാധ്യത ഇല്ലെങ്കില്‍ പ്രസിഡന്റ് സ്ഥാനം സുരേന്ദ്രന്‍ ഏറ്റെടുക്കുമെന്നാണ് അറിയുന്നത്. നിലവിലെ പ്രസിഡന്റ് അഡ്വ.പി.എസ് ശ്രീധരന്‍പിള്ളയെ കുമ്മനം രാജശേഖരനു പിന്നാലെ ഗവര്‍ണര്‍ ആക്കിയേക്കും. ഇപ്പോള്‍ മിസോറാം ഗവര്‍ണര്‍ ആയ കുമ്മനത്തിനെ തിരികെ സംസ്ഥാനത്തേക്ക് കൊണ്ടു വന്ന് തിരുവനന്തപുരത്ത് പാര്‍ലമെന്റ് സ്ഥാനാര്‍ത്ഥിയാക്കാനും അമിത് ഷാ ദേശീയ നേതൃത്വത്തിനു നിര്‍ദേശം നല്‍കിയതായി അറിയുന്നു.

കുമ്മനം മിസോറാം വിടുന്ന മുറയ്ക്ക് ശ്രീധരന്‍പിള്ളയെ അവിടെത്തന്നെ ഗവര്‍ണര്‍ ആക്കാനാണ് തീരുമാനം. എന്നാല്‍ സംസ്ഥാനം വിടാന്‍ താല്‍പര്യമില്ലെന്നാണ് ശ്രീധരന്‍പിള്ള പാര്‍ട്ടി സേതൃത്വത്തെ അറിയിച്ചിരിക്കുന്നത്. കറകളഞ്ഞ രാഷ്ട്രീയക്കാരനാണെങ്കിലും സംസ്ഥാന പ്രസിഡന്റായിരുന്ന് പാര്‍ട്ടിയെ ഒറ്റക്കെട്ടായി മുന്നോട്ടുകൊണ്ടു പോകാന്‍ സാധിക്കാതിരുന്നതാണ് കുമ്മനത്തിനെ മാറ്റാന്‍ കാരണം. സംസ്ഥാന നേതൃത്വത്തിന്റെ തലയ്ക്കു മുകളിലൂടെ കെട്ടിയിറക്കിയതിനാല്‍ ഒരു വിഭാഗം കുമ്മനവുമായി സഹകരിച്ചിരുന്നില്ല. ഇതേ അവസ്ഥ തന്നെയാണ് പി.എസ് ശ്രീധരനപിള്ളയും നേരിടുന്നത്. വി.മുരളീധര വിഭാഗം ഇടഞ്ഞാണ് നില്‍ക്കുന്നത്. മാത്രവുമല്ല ശബരിമല പ്രശ്‌നത്തില്‍ അമിഷായുടെ നിര്‍ദേശത്തിനനുസരിച്ച് ഉയരാന്‍ ശ്രീധരന്‍പിള്ളയ്ക്ക് ആയില്ലെന്നാണ് പാര്‍്ട്ടിയിലെ ഭൂരിപക്ഷത്തിന്റെയും അഭിപ്രായം. വിശ്രമത്തിനു ശേഷം സംസ്ഥാനത്ത് എത്തുന്ന അമിത് ഷാ നിര്‍ണ്ണായക തീരുമാനം എടുക്കുമെന്നാണ് സൂചന.