വിവിധ അര്‍ബുദങ്ങള്‍ക്കുള്ള 42 രാസമൂലകങ്ങളടങ്ങിയ മരുന്നുകളുടെ വ്യാപാരത്തിന് ലാഭവിഹിതം പരമാവധി മുപ്പതു ശതമാനമാക്കി കേന്ദ്രസര്‍ക്കാര്‍ നിശ്ചയിച്ചു. ഇതുവഴി ഈ മരുന്നുകള്‍ക്ക് 25 മുതല്‍ 85 ശതമാനം വരെ വിലക്കുറവുണ്ടാകുമെന്നാണ് അധികൃതരുടെ അവകാശവാദം. അതേസമയം, രോഗികള്‍ക്ക് ഇതുവഴി വലിയ പ്രയോജനമുണ്ടാകില്ലെന്ന് ഈ രംഗത്തെ സംഘടനകള്‍ പറയുന്നു. പ്രചാരത്തിലുള്ള അര്‍ബുദ മരുന്നുകളില്‍ 59 എണ്ണത്തിന്റെ വിലകളില്‍ നിയന്ത്രണമുണ്ട്. ബാക്കിയുള്ള 42 രാസമൂലകങ്ങള്‍ ചേര്‍ന്ന 72 മരുന്നുകള്‍ 350 ബ്രാന്‍ഡുകളിലായാണ് വിപണിയിലുള്ളത്. ഇവയില്‍ 45 ബ്രാന്‍ഡുകള്‍ക്ക് 25 ശതമാനവരെയും 43 എണ്ണത്തിന് പകുതിവരെയും വില പുതിയ സാഹചര്യത്തില്‍ കുറയുമെന്നാണ് പറയുന്നത്.
12 ഇനങ്ങള്‍ക്ക് 70 ശതമാനംവരെയും അഞ്ചെണ്ണത്തിന് 85 ശതമാനംവരെയും കുറഞ്ഞേക്കും. മാര്‍ച്ച് എട്ടുമുതലാണ് നിയന്ത്രണം നിലവില്‍ വരിക. പുതിയ വില്‍പ്പനവില കണക്കുകൂട്ടുന്ന രീതിയും ഉത്തരവിനൊപ്പം പ്രസിദ്ധീകരിച്ചിട്ടുണ്ട്. വിതരണക്കാര്‍ക്ക് കൊടുക്കുന്ന വിലയില്‍ നിന്നുള്ള ലാഭവിഹിതമാണ് നിയന്ത്രിച്ചിരിക്കുന്നത്. ആശുപത്രികള്‍ക്ക് നേരിട്ട് വില്‍ക്കുന്ന മരുന്നുകള്‍ക്കും ഈ രീതി ബാധകമാണ്. മരുന്നുവില നിശ്ചയത്തിന് കൃത്യമായ മാനദണ്ഡങ്ങളുണ്ടെന്ന് പറയുമ്പോഴും വിപണിയിലെ മിക്കവിലകളും യുക്തമല്ലെന്നതാണ് വാസ്തവം.

2004ല്‍ വിഷയം പഠിക്കാന്‍ നിയോഗിച്ച വിദഗ്ധസമിതി 2015 ഡിസംബറില്‍ നല്‍കിയ റിപ്പോര്‍ട്ടില്‍ ചില മരുന്നുകള്‍ക്ക് 1800 ശതമാനംവരെ ഇടത്തട്ട് കമ്മിഷന്‍ അനുവദിച്ചിരുന്നതായി കണ്ടെത്തി. വ്യാപാരമത്സരക്കമ്മിഷനും നീതി ആയോഗും എടുത്ത നടപടികളുടെ ഫലമായാണ് നിയന്ത്രണ ഉത്തരവ് പുറപ്പെടുവിക്കുന്നതെന്ന് ദേശീയ ഔഷധവിലനിയന്ത്രണ സമിതി വ്യക്തമാക്കി. രാജ്യത്ത് 15 ലക്ഷം അര്‍ബുദരോഗികളുണ്ടെന്നും കഴിഞ്ഞവര്‍ഷം എട്ടുലക്ഷം പേര്‍ രോഗത്തിന് കീഴടങ്ങിയെന്നുമാണ് കണക്ക്. ആശുപത്രിവാസത്തിന്റെ രണ്ടരശതമാനത്തിലധികം ചെലവ് മരുന്നുകള്‍ക്കും മറ്റുമാണ്. ഈ സാഹചര്യത്തിലാണ് കമ്മിഷന്‍ നിയന്ത്രണം ഈ വിഭാഗത്തിലാക്കാന്‍ തീരുമാനിച്ചതെന്നും ഉത്തരവ് വ്യക്തമാക്കുന്നു.
നിയന്ത്രണംവരുന്ന മരുന്നുകളില്‍ ചിലത്
:അസാസിറ്റിഡിന്‍, ബെന്‍ഡാമസ്റ്റീന്‍, ബോര്‍ട്ടസോമിബ്, െ്രെകസോട്ടിനിബ്, ഡസാറ്റിനിബ്, ക്രാഡിബിന്‍, ഒളാപരിബ്, മീറ്റോമൈസിന്‍.