തൊടുപുഴ കേസിലെ പ്രതി അരുണ്‍ ആനന്ദിന് ഗുണ്ടാസംഘങ്ങളുമായി അടുത്ത ബന്ധമെന്ന് പൊലീസ്. കൊലക്കേസ് ഉള്‍പ്പെടെ ഏഴു കേസുകളില്‍ പ്രതിയായ ഇയാള്‍ തലസ്ഥാനത്തുണ്ടായിരുന്ന സമയത്ത് നഗരത്തിലെ പല കുപ്രസിദ്ധ ഗുണ്ടകളുമായി അടുത്ത ബന്ധമുണ്ടായിരുന്നതായാണ് പൊലീസ് വൃത്തങ്ങള്‍ നല്‍കുന്ന വിവരം.നഗരത്തിലെ വിവിധ സ്‌റ്റേഷനുകളിലായി കേസുകളില്‍ പ്രതിയായ ഇയാള്‍ ഗുണ്ടാ സംഘങ്ങള്‍ക്കിടയില്‍ 'കോബ്ര'യെന്ന അപരനാമത്തിലാണ് അറിയപ്പെട്ടിരുന്നത്.

ഇയാള്‍ മറ്റ് ജില്ലകളില്‍ കേസുകളില്‍ പ്രതിയാണോയെന്ന കാര്യവും പൊലീസ് അന്വേഷിക്കുന്നുണ്ട്. ഇയാളുടെ ആദ്യ വിവാഹ മോചനത്തിലേക്ക് നയിച്ച കാര്യങ്ങളും അന്വേഷിക്കുന്നുണ്ട്. വധശ്രമം, അടിപിടി, പണം തട്ടല്‍, ഭീഷണി തുടങ്ങിയവ വിനോദമാക്കിയ അരുണ്‍ ശത്രുത തോന്നിയാല്‍ ക്രൂരമായി ആക്രമിക്കുന്നതും പതിവാക്കിയിരുന്നതായി പൊലീസ് വൃത്തങ്ങള്‍ പറയുന്നു. കുട്ടികളോട് അടുപ്പം കാണിച്ചാണ് ഇയാള്‍ യുവതിയുമായി ബന്ധമുണ്ടാക്കിയെടുത്തത്.ഭര്‍ത്താവ് മരിച്ച് ഏഴ് മാസത്തിനുള്ളില്‍ മക്കളുമായി ഇറങ്ങിത്തിരിച്ച യുവതി അരുണിനൊപ്പം പേരൂര്‍ക്കടയില്‍ വാടകക്ക് താമസിച്ചിരുന്നു.

അവിടെ കുട്ടി വളരെ ദൂരം നടന്ന് ഒറ്റക്കാണ് സ്‌കൂളില്‍ എത്തിയിരുന്നത്. ഇത് സ്‌കൂളില്‍ ചര്‍ച്ചയായതോടെ കുട്ടിയുടെ മാതാവ് സ്‌കൂളിലെത്തി അധ്യാപകരെ ശകാരിച്ചിരുന്നു. ദിവസങ്ങള്‍ക്കുള്ളില്‍ കുട്ടിയുടെ ടി.സി വാങ്ങുകയും ചെയ്തു. അതിനുശേഷമാണ് ഇവര്‍ തൊടുപുഴയിലേക്ക് പോയത്. എന്നാല്‍, യുവതിയുടെ മാതാവ് ഉള്‍പ്പെടെ ബന്ധുക്കള്‍ ഇവരെ സ്വീകരിക്കാന്‍ തയാറാകാത്തതിനെതുടര്‍ന്നാണ് വാടകക്ക് താമസിച്ചുവന്നത്.