കള്ളവോട്ട് കള്ള വോട്ട് എന്ന് മലയാളികള്‍ കേട്ടിട്ടേയുള്ളൂ. കള്ളവോട്ട് പുറത്ത് പറയുന്നവര്‍ പിന്നെ വീട് കാണില്ലെന്നാണ് നാട്ടുനടപ്പ്. അതിനാല്‍ തന്നെ അത് പുറത്തറിയാത്തതിനാല്‍ ആരും വിശ്വസിക്കാറുമില്ല. എന്നാല്‍ കള്ളവോട്ട് എങ്ങനെ ചെയ്യുന്നെന്ന് ചാനലുകാര്‍ ഇന്നലെ കാട്ടി തന്നു. സുധാകരന്‍ തോല്‍വി ഭയന്നാണ് കള്ളവോട്ടിനെപറ്റി പറയുന്നെന്നാണ് സിപിഎംകാര്‍ ആദ്യം പറഞ്ഞത്. എന്നാല്‍ തെളിവ് സഹിതമുള്ള വീഡിയോ വന്നതോടെ സിപിഎം വെള്ളം കുടിച്ചു. അയ്യപ്പന്‍ ചതിച്ചാശാനേയെന്നാണ് എതിരാളികള്‍ പരിഹാസ രൂപേണ പറയുന്നത്. മണ്ഡലം മറന്നാലും മണ്ഡലകാലം മറക്കില്ലെന്നാണ് അവരുടെ മുദ്രാവാക്യം പോലും. സിപിഎമ്മുകാര്‍ കള്ള വോട്ട് ചെയ്തത് ആരും കാണില്ലെന്നാണ് കരുതിയത്. എന്നാല്‍ എല്ലാം മുകളിലൊരാള്‍ കാണുകയായിരുന്നു. അയ്യപ്പനല്ല, സാക്ഷാല്‍ സിസിടിവി. 

ഇത് ചാനലുകാര്‍ പുറത്തു വിട്ടതോടെ ചാനലില്‍ എന്തും പറഞ്ഞ് ഞെളിയുന്ന രാത്രികാല ചര്‍ച്ചകാരായ സിപിഎമ്മുകാരെ കാണാനില്ല. ഒരു ചാനല്‍ ചര്‍ച്ചയിലും അവരില്ല. ചോദിച്ചപ്പോള്‍ അറിഞ്ഞത് അവര്‍ക്ക് താത്പര്യമില്ലെന്നാണ്. അതോടെ ചാനല്‍ചര്‍ച്ചയുടെ പകുതിഭാഗം അപഹരിക്കുന്ന സിപിഎം ചര്‍ച്ചക്കാരുടെ ശല്യമില്ലാതായി. രാജ്‌മോഹന്‍ ഉണ്ണിത്താനും കെ. സുരേന്ദ്രനും എല്ലാം തകര്‍ത്തു. സിപിഎം ചര്‍ച്ചക്കാര്‍ പാര്‍ട്ടിയോഫീസില്‍ എല്ലാം കേട്ടിരുന്നു ദീര്‍ഘനിശ്വാസം വിട്ടു.

ലോക്‌സഭാ തിരഞ്ഞെടുപ്പില്‍ കാസര്‍കോട് മണ്ഡലത്തില്‍ കള്ളവോട്ട് നടന്നതിന് തെളിവുകള്‍ ഇന്നലെയാണ് ചാനലുകാര്‍ പുറത്ത് വിട്ടത്. കാസര്‍കോട് മണ്ഡലത്തില്‍ ഉള്‍പ്പെടുന്ന കണ്ണൂര്‍ ജില്ലയിലെ പിലാത്തറ എയുപി സ്‌കൂളില്‍ 19ാം നമ്പര്‍ ബൂത്തിലാണ് കള്ളവോട്ട് നടന്നത്. 

ആറ് പേരുടെ ദൃശ്യങ്ങളാണ് ക്യാമറയില്‍ പതിഞ്ഞത്. ഈ ദൃശ്യങ്ങളാണ് ചാനലിന്് ലഭിച്ചത്. ആളുമാറി വോട്ട് ചെയ്യുന്നതും ഒരാള്‍ തന്നെ രണ്ടു തവണ വോട്ട് ചെയ്യുന്നതും ദൃശ്യങ്ങളിലുണ്ട്. വ്യാജ തിരിച്ചറിയല്‍ കാര്‍ഡ് ഉപയോഗിച്ച് മറ്റു ബൂത്തിലുള്ളവര്‍ വോട്ട് ചെയ്യുന്നതും ക്യാമറയില്‍ പതിഞ്ഞിട്ടുണ്ട്. പ്രിസൈഡിങ് ഓഫീസറെ കാഴ്ചക്കാരനാക്കിയാണ് കള്ളവോട്ട് നടന്നതെന്ന് ദൃശ്യങ്ങളില്‍ വ്യക്തമാണ്.

774ാം വോട്ടറായ പത്മിനി എന്ന സ്ത്രീ രണ്ട് തവണ വോട്ട് ചെയ്യുന്നതിനായി എത്തി. ഇവര്‍ കൈയില്‍ പുരട്ടിയ മഷി ഉടന്‍ തലയില്‍ തുടക്കുന്നതും ദൃശ്യങ്ങളിലുണ്ട്. ചെറുതാഴം പഞ്ചായത്തിലെ 50ാം നമ്പര്‍ ബൂത്തിലെ വോട്ടര്‍ 19ാം നമ്പര്‍ ബൂത്തിലെത്തി വോട്ട് ചെയ്യുന്നതും ദൃശ്യങ്ങളിലുണ്ട്. ഇത്തരത്തില്‍ ആറോളം പേര്‍ ഈ ഒരു ബൂത്തില്‍ മാത്രം കള്ളവോട്ടുകള്‍ നടത്തിയിട്ടുണ്ടെന്നാണ് വ്യക്തമാകുന്നത്. മറ്റൊരു സ്ത്രീ വോട്ടര്‍ ഒരു മണിക്കൂറോളം വരി നിന്ന ശേഷം വോട്ട് ചെയ്യാനെത്തിയപ്പോഴാണ് തന്റെ വോട്ട് ആരോ ചെയ്‌തെന്ന് മനസ്സിലായി. തുടര്‍ന്ന് അവര്‍ക്ക് ദീര്‍ഘനേരം ബൂത്തില്‍ ഇരിക്കേണ്ടി വരികയും വോട്ട് ചെയ്യാനാകാതെ മടങ്ങി പോവേണ്ടിവരികയും ചെയ്തു.

ഇവിടെയുള്ള പ്രദേശിക രാഷ്ട്രീയ നേതാക്കള്‍ ചട്ട വിരുദ്ധമായി ബൂത്തില്‍ കയറി നില്‍ക്കുന്നതും ദൃശ്യങ്ങളിലുണ്ട്. സിപിഎമ്മിന്റെ പ്രാദേശിക നേതാക്കളാണ് ബൂത്തില്‍ കയറി നില്‍ക്കുന്നതെന്നാണ് സൂചന.

കണ്ണൂരില്‍ വ്യാപകമായി കള്ളവോട്ട് നടന്നിട്ടുണ്ടെന്ന് വോട്ടെടുപ്പ് കഴിഞ്ഞ പിറ്റേന്ന് തന്നെ കോണ്‍ഗ്രസ് സ്ഥാനാര്‍ഥി കെ.സുധാകരന്‍ പറഞ്ഞിരുന്നു. ഇതിന്റെ തെളിവുകള്‍ പുറത്ത് വിടുമെന്നും അദ്ദേഹം പറഞ്ഞിരുന്നു. 

കള്ളവോട്ട് ആരോപണം നിഷേധിച്ച് സി.പി.എം.കണ്ണൂര്‍ ജില്ലാ സെക്രട്ടറി എം.വി. ജയരാജന്‍. പാര്‍ട്ടി കള്ളവോട്ട് ചെയ്യാറില്ലെന്നും പഞ്ചായത്തംഗം ഉള്‍പ്പെടെയുള്ളവര്‍ കള്ളവോട്ട് ചെയ്തുവെന്ന് ആരോപിക്കുന്നത് രാഷ്ട്രീയ ദുഷ്ടലാക്കോടെയെന്നും അദ്ദേഹം പറഞ്ഞു. പഞ്ചായത്തംഗം മറ്റൊരു ബൂത്തില്‍ വോട്ട് ചെയ്തത് വോട്ട് ഓപ്പണ്‍ വോട്ടാണെന്നാണ് അദ്ദേഹം വാദിച്ചത്. എന്നാല്‍ അത് സമര്‍ത്ഥിക്കാനും ഒരു പാര്‍ട്ടിക്കാരനും വന്നില്ല.