ബിജെപിയിലെ ഭിന്നതകള്‍ പുറത്താകുമോ എന്ന് കാത്തിരുന്ന് കാണാം. തെരഞ്ഞെടുപ്പിന് പിന്നാലെ സംസ്ഥാന ബി.ജെ.പിയില്‍ അഴിച്ചുപണിയുണ്ടാകുമെന്നും സംസ്ഥാന പ്രസിഡന്റ് സ്ഥാനത്ത് നിന്നും തന്നെ മാറ്റുമെന്നും ആര്‍.എസ്.എസ് നിര്‍ദ്ദേശിച്ചതായി അറിയില്ലെന്ന് പി.എസ്.ശ്രീധരന്‍പിള്ള പറഞ്ഞു. പുനസംഘടനയുടെ കാര്യത്തെപറ്റി തനിക്ക് അറിയില്ല. ആര്‍.എസ്.എസ് അങ്ങനെ ഒരു തീരുമാനമെടുത്തതായി അറിയില്ല. ബി.ജെ.പിയിലെ കാര്യങ്ങള്‍ ബി.ജെ.പിയാണ് തീരുമാനിക്കുന്നതെന്നും അദ്ദേഹം പ്രതികരിച്ചു.

ലോക്‌സഭാ തിരഞ്ഞെടുപ്പില്‍ ബി.ജെ.പിക്ക് ഒരു സീറ്റും ലഭിച്ചില്ലെങ്കില്‍ ഉടന്‍ തന്നെ ശ്രീധരന്‍പിള്ളയെ മാറ്റുമെന്ന തരത്തില്‍ ആര്‍.എസ്.എസ് വൃത്തങ്ങള്‍ സൂചന നല്‍കിയിരുന്നു. തിരഞ്ഞെടുപ്പിനിടയില്‍ പിള്ള നടത്തിയ ചില പരാമര്‍ശങ്ങള്‍ തിരിച്ചടിയായെന്ന് കേന്ദ്രനേതൃത്വത്തിനും വിലയിരുത്തലുണ്ട്. കുമ്മനം മിസോറാം ഗവര്‍ണര്‍ ആയതോടെ താത്കാലിക സംസ്ഥാന അദ്ധ്യക്ഷന്റെ താത്കാലിക ചുമതലയാണ് പിള്ളയ്ക്ക് നല്‍കിയതെന്നും ഉടന്‍ തന്നെ പുതിയൊരാളെ നിയമിക്കുമെന്നുമാണ് ആര്‍.എസ്.എസ് നേതൃത്വം നല്‍കുന്ന വിവരം.

അതേസമയം, കണ്ണൂര്‍, കാസര്‍കോട് മണ്ഡലത്തില്‍ വ്യാപകമായ കള്ളവോട്ടുകള്‍ നടന്നെന്ന ആരോപണത്തില്‍ വ്യക്തമായ അന്വേഷണം വേണമെന്നും ശ്രീധരന്‍പിള്ള ആവശ്യപ്പെട്ടു. സംഭവത്തില്‍ സംസ്ഥാന സര്‍ക്കാരിനും തിരഞ്ഞെടുപ്പ് കമ്മിഷനും തമ്മില്‍ ഗൂഢാലോചന നടന്നുവെന്ന് സംശയമുണ്ട്. രണ്ട് മണ്ഡലത്തിലും കേന്ദ്രപൊലീസിനെ നിയമിച്ചിരുന്നെങ്കിലും പ്രശ്‌നബാധിത ബൂത്തുകളില്‍ ആരെയും നിയോഗിച്ചിരുന്നില്ല. ഇക്കാര്യത്തില്‍ സംസ്ഥാന സര്‍ക്കാരിനും തിരഞ്ഞെടുപ്പ് കമ്മിഷനും ഗുരുതര വീഴ്ചയുണ്ടായി. അന്വേഷണം നടത്തി ആവശ്യമെങ്കില്‍ റീപ്പോളിംഗ് നടത്തണമെന്നും അദ്ദേഹം ആവശ്യപ്പെട്ടു.