മലബാറിലെ പല ലോക്സഭാ മണ്ഡലങ്ങളിലും തെരഞ്ഞെടുപ്പ് പ്രചരണത്തിന്റെ തുടക്കത്തില് കോണ്ഗ്രസ് ഏറെ പിന്നിലായിരുന്നെന്ന് മുസ്ലിംലീഗ് സംസ്ഥാന പ്രവര്ത്തക സമിതി യോഗത്തില് വിമര്ശനം
കോണ്ഗ്രസിനെതിരെ അതിരൂക്ഷവിമര്ശനവുമായി മുസ്ലിംലീഗ്. മലബാറിലെ പല ലോക്സഭാ മണ്ഡലങ്ങളിലും തെരഞ്ഞെടുപ്പ് പ്രചരണത്തിന്റെ തുടക്കത്തില് കോണ്ഗ്രസ് ഏറെ പിന്നിലായിരുന്നെന്ന് മുസ്്ലിംലീഗ് സംസ്ഥാന പ്രവര്ത്തക സമിതി യോഗത്തില് വിമര്ശനം. കോണ്ഗ്രസ് പിന്നിലായതിനാല് വടകര, കോഴിക്കോട്, വയനാട് മണ്ഡലങ്ങളില് ലീഗിന് സ്വന്തംനിലയില് പ്രചാരണപ്രവര്ത്തനങ്ങള് നടത്തേണ്ടിവന്നു. ഭരണവിരുദ്ധ വികാരം നിലവിലുണ്ടായിട്ടും അത് മുതലെടുക്കാന് കോണ്ഗ്രസിനായില്ല. കേന്ദ്ര-സംസ്ഥാന സര്ക്കാരുകള്ക്കെതിരെ ജനവികാരം ശക്തമായി നിലനില്ക്കുമ്പോള് അതിനനുസരിച്ച് വോട്ടര്മാരെ സമീപിക്കുന്നതില് കോണ്ഗ്രസ് തുടക്കത്തില് പരാജയപ്പെട്ടു. ഹൈദരലി ശിഹാബ് തങ്ങള്, കുഞ്ഞാലിക്കുട്ടി, ഇ ടി മുഹമ്മദ് ബഷീര്, കെ പി എ മജീദ് തുടങ്ങിയ നേതാക്കളുടെ സാനിധ്യത്തില് കോഴിക്കോട് ചേര്ന്ന യോഗത്തില് ലീഗിലെ യുവ നേതൃത്വമാണ് കോണ്ഗ്രസിനെതിരെ വിമര്ശനമുന്നയിച്ചത്.
എന്നാല് യോഗത്തിനകത്ത് നടന്ന കാര്യങ്ങളെ കുറിച്ച് വാര്ത്താസമ്മേളനത്തില് പ്രതികരിക്കാന് പി.കെ കുഞ്ഞാലിക്കുട്ടി തയ്യാറായില്ല. കോണ്ഗ്രസ് നേതാക്കളെല്ലാവരും ലീഗിന് സ്വാധീനമുള്ള മണ്ഡലങ്ങളില് പ്രചരണത്തിനെത്തിയതുമില്ല. വടകര മണ്ഡലത്തില് മുസ്്ലിംലീഗിന് ഏറെ സ്വാധീനമുണ്ട്. സി.പി.എം പി. ജയരാജനെ ആദ്യമേ അവിടെ കളത്തിലിറക്കിയെങ്കിലും കോണ്ഗ്രസ് സ്ഥാനാര്ത്ഥി നിര്ണയം നടത്തി തര്ക്കം നീട്ടിക്കൊണ്ട് പോയി. ആര്.എം.പി സ്വന്തം സ്ഥാനാര്ത്ഥിയ പിന്വലിച്ചിട്ട് പോലും കോണ്ഗ്രസ് ഉണര്ന്നില്ല. അവസാനം മുസ്്ലിംലീഗ് ഇടപെട്ടു. അങ്ങനെയാണ് കെ.മുരളീധരനെ സ്ഥാനാര്ത്ഥിയാക്കിയത്. വയനാട്ടില് രാഹുല്ഗാന്ധിയുടെ സ്ഥാനാര്ത്ഥിത്വവും ഏറെ വൈകിച്ചു. സിദ്ധിഖിനെ സ്ഥാനാര്ത്ഥിയാക്കി പ്രചരണം മുന്നേറുന്നതിനിടെയാണ് അപ്രതീക്ഷിത പ്രഖ്യാപനം ഉണ്ടായത്. എന്നാല് അത് സ്ഥിരീകരിക്കുന്നതിന് ആഴ്ചകളെടുത്തു.
രാഹുല് വയനാട്ടില് മത്സരിക്കുന്ന കാര്യം തീരുമാനമായപ്പോള് ബി.ജെ.പി നേതാക്കള് മുസ്്ലിംലീഗിനെ വയറസെന്നും മറ്റും പറഞ്ഞ് അധിക്ഷേപിച്ചപ്പോള് കോണ്ഗ്രസ് നേതാക്കള് രൂക്ഷവിമര്ശനവുമായി രംഗത്തെത്തിയില്ലെന്നും ആരോപണം ഉയര്ന്നു. കോണ്ഗ്രസിന്റെ മൃദു ഹിന്ദുത്വ സമീപനമാണ് ബി.ജെ.പി -സംഘപരിവാര് ശക്തികള്ക്ക് സഹായകമാകുന്നതെന്നും യുവനേതാക്കള് ആരോപിച്ചു. കോഴിക്കോട്ടെ സിംറ്റിംഗ് എം.പി എം.കെ രാഘവന് തുടക്കത്തിലേ പ്രചരണം തുടങ്ങിയിരുന്നു. എന്നാല് സി.പി.എം ഒളിക്യാമറാ വിവാദം ഉയര്ത്തിക്കൊണ്ട് വന്നപ്പോള് പ്രതിരോധിക്കാന് പല കോണ്ഗ്രസ് നേതാക്കളും തയ്യാറായില്ലെന്നും ആരോപണം ഉയര്ന്നു. ജനങ്ങളെയും പാര്ട്ടി പ്രവര്ത്തകരെയും ഇത് സംബന്ധിച്ച നിജസ്ഥിതി ബോധ്യപ്പെടുത്തുന്നതിലും കോണ്ഗ്രസ് പരാജയപ്പെട്ടെന്നും ആക്ഷേപം ഉണ്ടായി.
പൊന്നാനിയില് പ്രാദേശിക കോണ്ഗ്രസ് പ്രവര്ത്തകര് ഇ.ടി മുഹമ്മദ് ബഷീറിനെതിരെ പ്രവര്ത്തിച്ചെന്നും ആരോപണം ഉയര്ന്നു. പ്രചരണത്തിനിടെ പ്രാദേശിക കോണ്ഗ്രസ് നേതാവ് ഇടത് സ്ഥാനാര്ത്ഥി പി.വി അന്വറുമായി രഹസ്യ ചര്ച്ച നടത്തിയ ശേഷം വരുന്ന വഴി ലീഗുകാര് തടഞ്ഞിരുന്നു. വടകര, വയനാട്, കോഴിക്കോട് മണ്ഡലങ്ങളില് പോളിങ് ഉയര്ന്നത് യുഡിഎഫിന് അനുകൂലമാകുമെന്നും മുസ്ലിം ലീഗ് സംസ്ഥാന സമിതി വിലയിരുത്തി. പോളിങ് കഴിഞ്ഞ തവണത്തേക്കാള് അഞ്ച് ശതമാനം കൂടി 80ന് മുകളിലെത്തി. അത് യുഡിഎഫിന് അനുകൂലമാകുമെന്നും മുസ്ലിം ലീഗ് സംസ്ഥാന സമിതി യോഗം വിലയിരുത്തി.
https://www.facebook.com/Malayalivartha
