തിരുച്ചിറപ്പള്ളിയില്‍ കുഴല്‍ കിണറില്‍ വീണ് രണ്ടുവയസുകാരന്‍ മരിച്ചത് മനുഷ്യ മനസാക്ഷിയെ ഞെട്ടിപ്പിച്ച സംഭവമാണ്. ഇന്ത്യ ലോകത്തിന്റെ നെറുകയിലേക്ക് കുതിക്കുന്ന സമയത്താണ് പിഞ്ചോമന കുഴല്‍ക്കിണറിനുള്ളില്‍ ഞെരിഞ്ഞമര്‍ന്നത്.നാല് ദിവസത്തോളം കളഞ്ഞ് കുളിച്ച് മാരത്തോണ്‍ ചര്‍ച്ച നടത്തി മാരത്തോണ്‍ കുഴികളുമെടുത്ത് പാറ പുറത്തെടുത്തെന്നല്ലാതെ കുട്ടിയെ പുറത്തെടുക്കാനായില്ല. വലിയ പ്രതിഷേധമാണ് സാധാരണക്കാരുടെ ഇടയില്‍ നിന്ന് വരുന്നത്. നമുക്ക് കിലോമിറ്റര്‍ ടു കിലോമീറ്റര്‍ കടന്ന് ചന്ദ്രനില്‍ ചന്ദ്രയാന്‍ അയയ്ക്കാനറിയാം 100 അടിമാത്രം കുഴിയിലുള്ള കുട്ടിയെ രക്ഷിക്കാനറിയില്ല. അതിന് തലപുകയാനും സമയമില്ല. ഫലമോ അഴുകിത്തൊളിഞ്ഞ കുഞ്ഞിന്റെ പാര്‍ട്‌സുകള്‍ പുറത്തെടുത്തു. ഇത് ആദ്യത്തെ സംഭവമല്ല. എന്തൊരു ദയനീയം.

കഴിഞ്ഞ വെള്ളിയാഴ്ച്ചയാണ് സുജിത്ത് കുഴല്‍ കിണറില്‍ വീണത്. ആദ്യം 25 അടി താഴ്ചയില്‍ തങ്ങി നിന്നിരുന്ന കുട്ടി രക്ഷാപ്രവര്‍ത്തനത്തിനിടെ 60 അടി താഴ്ചയിലേക്കും പിന്നീട് 100 അടിയിലേക്കും വീഴുകയായിരുന്നു. ഇന്നലെ പുലര്‍ച്ചെ 4.25 ഓടെയാണ് കുട്ടിയുടെ മൃതദേഹം പുറത്തെടുത്തത്. കഴിഞ്ഞ ദിവസം രാത്രി 10.30 ഓടെ കിണറില്‍ നിന്ന് ദുര്‍ഗന്ധം വന്നതിനെ തുടര്‍ന്ന് നടത്തിയ പരിശോധനയിലാണ് സുജിത്തിന്റെ മരണം സ്ഥിരീകരിച്ചത്.

തിരുച്ചിറപ്പള്ളിയില്‍ കുഴല്‍ കിണറില്‍ വീണ് കുട്ടി മരിച്ചതിന് കാരണം അധികൃതരുടെ അനാസ്ഥയാണെന്ന് കാട്ടി സുപ്രീം കോടതിയുടെ പൊതുതാല്‍പര്യ ഹര്‍ജിയും എത്തിക്കഴിഞ്ഞു. കുഴല്‍ കിണറില്‍ വീണ് അപകടമുണ്ടാകുന്നതിന് കാരണം അധികൃതരുടെ അലംഭാവമാണ്. ഇത്തരം സംഭവങ്ങള്‍ ഇനിയും ആവര്‍ത്തിക്കാതിരിക്കാന്‍ അധിതര്‍ക്ക് കര്‍ശന നിര്‍ദ്ദേശം നല്‍കണമെന്നാണ് ഹര്‍ജിയിലെ ആവശ്യം.

ചന്ദ്രനില്‍ ആളിനെ ഇറക്കാനറിയുന്നവര്‍ക്ക് കുഴിയില്‍ നിന്നും കുട്ടിയെ രക്ഷിക്കാനറിയില്ലെന്ന് ഏതാണ്ട് ഏറ്റവും അധികം മനസിലായത് കേരള തമിഴ്‌നാട് മുഖ്യമന്ത്രിമാര്‍ക്കാണ്. അതിനാല്‍ തന്നെ അവര്‍ അവസാനത്തെ അടവങ്ങ് പ്രയോഗിച്ചു. ഉപയോഗ ശൂന്യമായ കുഴല്‍ കിണറുകള്‍ മൂടണം. കേള്‍ക്കുമ്പോള്‍ ചിരിവരുമെങ്കിലും അതാണ് നല്ലത്. ഇനിയും ആരെ വിശ്വസിക്കാന്‍.

സംസ്ഥാനത്ത് തുറന്നു കിടക്കുന്ന കുഴല്‍ കിണറുകള്‍ മൂടണമെന്ന നിര്‍ദേശവുമായി മുഖ്യമന്ത്രി പിണറായി വിജയന്‍ രംഗത്തെത്തി. അതേസമയം സംസ്ഥാനത്ത് തുറന്നു കിടക്കുന്ന കുഴല്‍ കിണറുകള്‍ ഇല്ലെന്നാണ് ദുരന്ത നിവാരണ അതോറിറ്റിയുടെ റിപ്പോര്‍ട്ട്. എങ്കിലും വിവിധ വകുപ്പുകളോടായി പരിശോധന നടത്തി ഉപയോഗ്യ ശൂന്യമായ കുഴല്‍ കിണറുകള്‍ ശ്രദ്ധയില്‍പ്പെടുന്ന സാഹചര്യത്തില്‍ അവ മൂടണമെന്ന് നിര്‍ദേശം നല്‍കിയതായി മുഖ്യമന്ത്രി വ്യക്തമാക്കി. ജില്ലാ അടിസ്ഥാനത്തില്‍ പരിശോധന നടത്തി തുറന്നു കിടക്കുന്ന കുഴല്‍ കിണറുകള്‍ ഉണ്ടോയെന്ന് ഉറപ്പുവരുത്തണമെന്ന് മുഖ്യമന്ത്രി വിവിധ വകുപ്പുകളോട് പറഞ്ഞു.

നിലവില്‍ പാലക്കാട് ജില്ലയിലാണ് വലിയ കുഴല്‍ കിണറുകള്‍ ഉള്ളതായി ശ്രദ്ധയില്‍ പെട്ടിട്ടുള്ളത്. അവ കമ്പനികള്‍ക്കുള്ളിലാണെന്ന് ദുരന്ത നിവാരണ അതോറിറ്റി വ്യക്തമാക്കിയിരുന്നു. കുഴല്‍ കിണറുകള്‍ മൂടുന്നത് സംബന്ധിച്ച് വ്യവസായ വകുപ്പിനും ഭൂജല തദ്ദേശ വകുപ്പുകള്‍ക്കും കത്ത് നല്‍കുമെന്നും മുഖ്യമന്ത്രി പറഞ്ഞു.

തമിഴ്‌നാട് മുഖ്യമന്ത്രി എടപ്പാടി പളനിസ്വാമിയും സമാന നിര്‍ദേശമാണ് നല്‍കുന്നത്. ഇതിനിടെ തുറന്നു കിടക്കുന്ന കുഴല്‍ക്കിണറുകള്‍ സംബന്ധിച്ച് തമിഴ്‌നാട് സര്‍ക്കാര്‍ റിപ്പോര്‍ട്ട് നല്‍കണമെന്ന് മദ്രാസ് ഹൈക്കോടതി ആവശ്യപ്പെട്ടു. നവംബര്‍ 12 ന് മുന്‍പ് റിപ്പോര്‍ട്ട് നല്‍കണമെന്നാണ് ആവശ്യപ്പെട്ടിരിക്കുന്നത്. കുഴല്‍ക്കിണറുകളുടെ എണ്ണം സംബന്ധിച്ച് വിവരങ്ങളും മൂടാനുള്ള കിണറുകളുടെ എണ്ണം സംബന്ധിച്ചും സംസ്ഥാന സര്‍ക്കാരിന് വിവരമുണ്ടോയെന്ന് കോടതി ചോദിച്ചു. വാര്‍ത്തയുടെ ചൂട് മാറുമ്പോഴേക്കും മൂടാനുള്ള ശ്രമം മറന്നാല്‍ ഇനിയും ഇതുപോലുള്ള കുരുന്നുകള്‍ രക്ഷിക്കാനാരുമില്ലാതെ പിടയുമെന്ന കാര്യത്തില്‍ സംശയമില്ല.