കേരളത്തിൽ പലയിടത്തും കനത്ത മഴ തുടരുന്ന സാഹചര്യത്തിൽ പത്ത് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. ആലപ്പുഴ, എറണാകുളം, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് ഓറഞ്ച് അലർട്ട്. മഴയിലും ചുഴലിക്കാറ്റിലും കനത്ത നാശനഷ്ടം സംഭവിക്കാൻ സാധ്യതയുള്ള ലക്ഷദ്വീപിൽ റെഡ് അലർട്ട് പ്രഖ്യാപിച്ചിട്ടുണ്ട്. കൊച്ചിയിലെ തീരപ്രദേശങ്ങളായ ചെല്ലാനം, എടവനക്കാട്, ഞാറയ്ക്കൽ, ഫോർട്ട് കൊച്ചി തീരങ്ങളിൽ കടലാക്രമണം ഉണ്ടായി. കടല്‍ക്ഷോഭത്തില്‍പ്പെട്ട് വടകര അഴിത്തലയില്‍ നിന്ന് കാണാതായ തൗഫീക്ക് ബോട്ട് കണ്ണൂര്‍ ഏഴിമല ഭാഗത്ത് ,ഇതില്‍ രണ്ടു മല്‍സ്യത്തൊഴിലാളികളാണുള്ളത്.ഇവരെ കരക്കെത്തിക്കാനുള്ള ശ്രമം തുടരുകയാണ്.അതേ സമയം ചോംബാലയില്‍ നിന്ന് പോയ നാലു മല്‍സ്യത്തൊഴിലാളികള്‍ തിരിച്ചെത്തി..തൃശൂര്‍ ചാവക്കാടു നിന്നുപോയ ബോട്ട് പൊന്നാനിക്കടുത്ത് തിരയില്‍പെട്ട് തകര്‍ന്നു.ഒരാളെ ഇതുവരെ കണ്ടെത്താനായിട്ടില്ല..

തിരുവനന്തപുരം പുല്ലുവിള സ്വദേശി ആന്റണിയേയാണ് കാണാതായത്.രക്ഷപ്പെട്ട അഞ്ചുപേരെ മട്ടാഞ്ചേരി വാര്‍ഫില്‍ എത്തിച്ചു.മലപ്പുറത്തിന്റെ തീരദേശ മേഖലകളായ പൊന്നാനി, തിരൂര്‍, താനൂര്‍, പരപ്പനങ്ങാടി എന്നിവിടങ്ങളില്‍ കടലാക്രമണം രൂക്ഷമാണ്.പൊന്നാനിയില്‍ മാത്രം 100 വീടുകളില്‍ വെള്ളം കയറി.50 കുടുംബങ്ങളെ മാറ്റിപ്പാര്‍പ്പിച്ചു. കൊയിലാണ്ടി പാറപ്പള്ളി ബീച്ചിലെ വീടുകളില്‍ വെള്ളം കയറിയതിനെ തുടര്‍ന്ന് 7 കുടുംബങ്ങളെ തൊട്ടടുത്ത മദ്രസയിസലേക്ക് മാറ്റിയിട്ടുണ്ട്.കണ്ണൂര്‍ ആയിക്കരയില്‍ നിന്ന് 20 ഉം കാസര്‍ക്കോട് ഉപ്പളയില്‍ നിന്ന് 10 കുടുംബങ്ങളേയും മാറ്റി. കനത്ത മഴയ്ക്കും അതിശക്തമായ കാറ്റിനും സാധ്യതയുള്ളതിനാൽ കാസർകോട് ജില്ലയിലെ അങ്കണവാടികൾ, പ്രഫഷണൽ കോളജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്ക് നാളെ അവധിയായിരിക്കുമെന്ന് കലക്ടർ ഡി.സജിത് ബാബു അറിയിച്ചു. പരീക്ഷകൾ മാറ്റമുണ്ടാകില്ല.

മലപ്പുറം ജില്ലയിലെ തീരദേശ താലൂക്കുകളിൽ (പൊന്നാനി, തിരൂർ, തിരൂരങ്ങാടി) പ്രഫഷനൽ കോളജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും ജില്ലാ കലക്ടർ നാളെ അവധി പ്രഖ്യാപിച്ചു. കൊച്ചി, കണയന്നൂര്‍ താലൂക്കുകളിലെ എല്ലാ വിദ്യാഭ്യാസ സ്ഥാപനങ്ങള്‍ക്കും അവധി പ്രഖ്യാപിച്ചു അതേസമയം കണ്ണൂർ ജില്ലയിലെ പ്രഫഷനൽ കോളജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും നാളെ അവധിയായിരിക്കുമെന്നു കലക്ടർ അറിയിച്ചു. സിബിഎസ്ഇ, ഐസിഎസ്ഇ സ്കൂളുകൾ, അങ്കണവാടികൾ, മദ്രസകൾ എന്നിവയ്ക്ക് അവധി ബാധകമാണ്. കണ്ണൂർ സർവകലാശാല നാളെ നടത്താനിരുന്ന മുഴുവൻ പരീക്ഷകളും മാറ്റി.

തൃശൂർ ജില്ലയിലെ കൊടുങ്ങല്ലൂര്‍ , ചാവക്കാട് താലൂക്കുകളില്‍ വിദ്യാഭ്യാസസ്ഥാപനങ്ങള്‍ക്ക് നാളെ അവധിയായിരിക്കും. ഓറഞ്ച് മഴ അലർട്ട് മുന്നറിയിപ്പുണ്ടായിരുന്ന ഇന്നും ഈ താലൂക്കുകൾക്ക് അവധിയായിരുന്നു. എം.ജി സര്‍വകലാശാല നാളെ നടത്താനിരുന്ന പരീക്ഷകള്‍ മാറ്റിവെച്ചു. കടലാക്രമണം രൂക്ഷമായ എല്ലാ ജില്ലകളിലും ജില്ലാ ഭരണകൂടം പ്രത്യേക മുന്നറിയിപ്പുകള്‍ നല്‍കുകയും ക്യാംപുകള്‍ ആരംഭിക്കാനുള്ള സജ്ജീകരണങ്ങള്‍ ഒരുക്കുകയും ചെയ്തിട്ടുണ്ട്.

അതേസമയം അറബിക്കടലില്‍ ലക്ഷദ്വീപ് മേഖലയില്‍ രുപം കൊണ്ട മഹ ചുഴലിക്കാറ്റ് രാത്രിയോടെ അതിശക്തമായ ചുഴലിക്കാറ്റായി മാറുമെന്ന് കാലാവസ്ഥാ നിരീക്ഷണ കേന്ദ്രം. കടൽ തുടർന്നും പ്രക്ഷുബ്ധമായിരിക്കും. അതിനാൽ തീരപ്രദേശത്ത് താമസിക്കുന്നവർ ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി മുന്നറിയിപ്പ് നൽകി. കനത്ത മഴയ്ക്കും കാറ്റിനും സാധ്യതയുള്ളതിനാൽ മലയോര മേഖലയിലുള്ളവരും ശ്രദ്ധിക്കണമെന്ന് മുന്നറിയിപ്പുണ്ട്.