കോട്ടയം ജനറല്‍ ആശുപത്രിക്കു മുകളിലായി മരം വീണ് മൂന്നു പേര്‍ക്ക് പരിക്ക്. മൂന്നു കൂട്ടിരിപ്പുകാര്‍ക്കാണ് പരിക്കേറ്റത്. ഇന്നലെ രാത്രിയിലുണ്ടായ കനത്ത മഴയിലും കാറ്റിലുമായിരുന്നു അപകടമുണ്ടായത്. പുരുഷന്‍മാരുടെ 11-ാം വാര്‍ഡിനു മുകളിലേക്കാണു കൂറ്റന്‍ വാക മരം വീണത്. തലയ്ക്കും കാലിനും കൈക്കും പരിക്കേറ്റ മൂന്നുപേരെ ആശുപത്രിയിലെ കാഷ്വാലിറ്റിയിലേക്കു മാറ്റി. ആരുടെയും പരിക്ക് ഗുരുതരമല്ലെന്നാണു വിവരം.
മരത്തിനു താഴെ പാര്‍ക്ക് ചെയ്തിരുന്ന ഇരുചക്ര വാഹനം തകര്‍ന്നു. സിഎംഎസ് കോളജ് ജീവനക്കാരനായ സിജോ ജേക്കബിന്റെ വാഹനമാണ് തകര്‍ന്നത്. ഫയര്‍ഫോഴ്‌സ് എത്തിയാണ് കടപുഴകിവീണ മരം മുറിച്ചുമാറ്റിയത്. ആശുപത്രി ചുറ്റളവിലെ മരങ്ങളുടെ ചുവട്ടിലെ മണ്ണു മാറ്റി നിര്‍ത്തിയിരിക്കുകയാണ്. ഇതില്‍ ഒരു മരമാണു കടപുഴകി വീണത്. ഇത്തരത്തില്‍ മറ്റു മൂന്നു മരങ്ങള്‍ കൂടി ആശുപത്രിക്കു ഭീഷണി ഉയര്‍ത്തുന്നുണ്ട്.
മരം വീഴുന്ന ശബ്ദംകേട്ട് ഭയന്ന് ഓടുന്നതിനിടെയാണ് ഒരാള്‍ക്ക് പരിക്കേറ്റത്. രോഗിയുടെ കൂട്ടിരിപ്പിനെത്തിയ ഇയാള്‍ ശബ്ദം കേട്ട് ഓടുമ്പോള്‍ കട്ടിലില്‍ തട്ടി കാലിനു പരിക്കേല്‍ക്കുകയായിരുന്നു. മറ്റ് രണ്ട് പേര്‍ക്ക് തലയ്ക്കും കൈയ്ക്കുമാണ് പരിക്കേറ്റത്. നിസാര പരിക്കേറ്റ ഇവര്‍ക്ക് പ്രാഥമിക ശുശ്രൂഷ നല്‍കി വിട്ടയച്ചു.

മരം വീണതിനു പിന്നാലെ വാര്‍ഡിലെ രോഗികളും കൂട്ടിരിപ്പുകാരും ഭയന്നു നിലവിളിച്ചു. പലരും ഓടിരക്ഷപെടാന്‍ ശ്രമിച്ചു. എന്നാല്‍ വാര്‍ഡിന്റെ വാതില്‍ ഭാഗത്തേക്ക് മരം വീണതിനാല്‍ പുറത്തേക്ക് കടക്കാന്‍ ആര്‍ക്കും കഴിഞ്ഞില്ല. അപകടത്തെ തുടര്‍ന്ന് 11 ാം വാര്‍ഡ് കെട്ടിടം ഭാഗീകമായി നശിച്ചു. എന്നാല്‍ മേല്‍ക്കൂര തകര്‍ന്ന ഈ കെട്ടിടത്തില്‍നിന്നും രോഗികളെ മാറ്റിയിട്ടില്ല. അപകടാവസ്ഥയിലുള്ള കെട്ടിടത്തിലാണ് രോഗികള്‍ രാത്രി കഴിഞ്ഞത്. 11 ാം വാര്‍ഡിനോട് ചേര്‍ന്ന് അപകടാവസ്ഥയില്‍ നാലോളം വലിയ മരങ്ങളാണ് നില്‍ക്കുന്നത്.
ചുവട്ടില്‍നിന്ന് മണ്ണ് നീക്കം ചെയ്ത് ചെറുകുന്നിന്റെ മുകളിലെന്നപോലെയാണ് ഈ മരങ്ങള്‍ നില്‍ക്കുന്നത്. ചിലമരങ്ങളുടെ വേരുകള്‍ തെളിഞ്ഞുകാണാം. കെട്ടിടത്തിനോട് തൊട്ടടുത്തുള്ള മരം കടപുഴകിയിരുന്നെങ്കില്‍ വലിയ ദുരന്തമാണ് സംഭവിക്കുമായിരുന്നത്.