നടൻ ബിനീഷ് ബാസ്റ്റിന് അപമാനം ഏറ്റപ്പോൾ ആ സദസ്സിൽ ഉണ്ടായിരുന്ന വിദ്യാർത്ഥികൾ പ്രതിക്കരിക്കാത്തത് എന്തേ ? ഈ സംശയം ഉയർത്തി ഒരു ഫേസ്‌ബുക്ക് കുറിപ്പ്. ആ മേനോനോട് " ഇറങ്ങിപ്പോടാ കോപ്പേ" എന്ന് പറയാൻ നിങ്ങൾക്ക് കഴിഞ്ഞില്ലേ എന്ന ചോദ്യം ഉയരുന്നുണ്ട്. ഈ കുറിപ്പിന് നിരവധി പ്രതികരണങ്ങളും വരുന്നുണ്ട്. എന്ത് തരം കുട്ടികളെയാണ് നാം വാർത്തെടുക്കുന്നതെന്നും ബ്രോയ്ലർ കോഴികളേ പോലെ കുറേ കുട്ടികൾ ഒന്നിനോടും പ്രതികരിക്കാതിരിക്കുന്നുവെന്നതും ശ്രദ്ധേയമായ കാര്യമാണെന്നുമുള്ള് ആശങ്കകൾ പ്രതികരണത്തിലൂടെ വരുന്നുണ്ട്.

ശ്രീചിത്രന്‍ എംജെയുടെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം ഇങ്ങനെ:

എനിക്കാ സംവിധായകൻ മേനോനോടൊന്നും പറയാനില്ല.

ജാതിപ്പുളപ്പും വംശീയതയും അഹന്തയും മനുഷ്യരോടുള്ള വെറുപ്പും കൊണ്ട് പുണ്ണുപിടിച്ച നിങ്ങളുടെ തലച്ചോറ് ഇങ്ങനെയേ പ്രവർത്തിക്കൂ. ഒരത്ഭുതവുമില്ല.

എനിക്കാ പ്രിൻസിപ്പാളോടൊന്നും പറയാനില്ല.

എല്ലാ അധികാരികളിലും ചരിത്രപരമായി ദുരാധികാരം കയ്യിലുള്ളവരോട് അടിമത്തമുള്ള ഒരു മനസ്സുണ്ട്. മേനോനെ കയ്യൊഴിയാനും മനുഷ്യനെ കാണാനും കഴിയുന്ന പ്രിൻസിപ്പാൾമാർ ചരിത്രത്തിലപൂർവ്വമാണ്. " ഞാൻ പോലീസിനെ വിളിക്കും, സെക്യൂരിറ്റിയെ വിളിക്കും" എന്നു പറയാനേ അവർക്കറിയൂ.

പക്ഷേ

എന്റെ വിദ്യാർത്ഥി സുഹൃത്തുക്കളേ,

നിങ്ങൾക്കറിയുമായിരുന്നില്ലേ,
നിങ്ങൾക്ക് കഴിയുമായിരുന്നില്ലേ
നിങ്ങൾ വിളിച്ചു അവിടെ കൊണ്ടുവന്ന അതിഥിയുണ്ടെങ്കിൽ ഞാൻ വേദിയിലിരിക്കില്ല എന്നു പറഞ്ഞ ആ മേനോനോട്

" ഇറങ്ങിപ്പോടാ കോപ്പേ" '

എന്ന് പറയാൻ?

- കേരളപ്പിറവിയുടെ കാഴ്ച്ചക്കണി.