വിധിയുടെ വിളയാട്ടം അങ്ങനെയാണ്. കലിയുഗ വരദനായ അയ്യപ്പന്റെ പല മായാലീലകളും നമുക്ക് കാണിച്ചു തന്നു. അതും ഒരു വര്‍ഷത്തിനുള്ളില്‍. കഴിഞ്ഞ വര്‍ഷത്തെ സുപ്രീം കോടതി വിധിയ്ക്ക് പിന്നാലെ യുവതികളെ കയറ്റാന്‍ ശ്രമിച്ച സിപിഎമ്മും മുഖ്യമന്ത്രിയും നവോത്ഥാന സമിതിയുമെല്ലാം എത്ര പെട്ടന്നാണ് മാറിയത്. അയ്യപ്പ സന്നിധിയില്‍ യുവതികളെ കയറ്റാന്‍ ശ്രമിച്ചവര്‍ക്കെല്ലാം തന്നെ ഷോക്ക് ട്രീറ്റ്‌മെന്റ് കിട്ടി. നാല് വോട്ടിന് വേണ്ടി നിലപാട് മാറ്റില്ലെന്ന് പറഞ്ഞ മുഖ്യമന്ത്രിയും സിപിഎം സെക്രട്ടറി കോടിയേരി ബാലകൃഷ്ണനും ഇപ്പോള്‍ മിണ്ടാട്ടമില്ല. മാത്രമല്ല കോടിയേരിയുടെ മകന്‍ ബിനോയ് കോടിയേരി യുവതിയുടെ പരാതിയില്‍ മേല്‍ നട്ടം തരിഞ്ഞപ്പോള്‍ എത്തി സങ്കടപ്പെട്ടതും ഈ അയ്യപ്പ സന്നിധിയിലാണ്.നവോത്ഥാന സമിതിക്കാരാകട്ടെ തമ്മില്‍ തല്ലി കാലം നീക്കുകയാണ്. മാത്രമല്ല ഒരു യുവതിയേയും ശബരിമലയിലേക്ക് കയറ്റി വിടേണ്ടെന്നാണ് പോലീസിന് സര്‍ക്കാര്‍ നല്‍കിയ നിര്‍ദേശം. ശബരിമല നട തുറന്ന് രണ്ടു ദിവസം ആയിട്ടും ഓരോ ദിവസവും യുവതികള്‍ ദര്‍ശനത്തിനെത്തിയിരുന്നു. പക്ഷെ ഒരു കര്‍മ്മസമിതി പ്രവര്‍ത്തകനും തടയാന്‍ വന്നില്ല. പകരം പോലീസുകാര്‍ തന്നെയാണ് തടഞ്ഞത്. അന്ന് ശബരിമല കര്‍മ്മ സമിതിക്കാര്‍ ചെയ്തത് ഇന്ന് പോലീസും പാര്‍ട്ടിയും ചെയ്യുന്നു.

കഴിഞ്ഞ വര്‍ഷത്തെ സംഘര്‍ഷഭരിതമായ ചിത്തിര ആട്ട വിശേഷത്തിന് ശേഷം ശബരിമലയ്ക്ക് പോകാന്‍ വന്ന സുരേന്ദ്രനെ നിലയ്ക്കലില്‍ വച്ച് എസ്.പി. യതീഷ് ചന്ദ്ര പൊക്കി അകത്താക്കിയിട്ട് ഒരു വര്‍ഷം തികഞ്ഞിരിക്കുകയാണ്. ശരിക്കും പറഞ്ഞാല്‍ 2018 നവംബര്‍ 17 ന്. ശബരിമലയില്‍ ദര്‍ശനത്തിനു പോയ കെ സുരേന്ദ്രനെയും കൂടയുണ്ടായിരുന്നവരെയും നിലയ്ക്കലില്‍ വച്ച് ക്രമസമാധാന പ്രശ്‌നങ്ങള്‍ ചൂണ്ടിക്കാട്ടിയാണ് യതീഷ് ചന്ദ്ര സുരേന്ദ്രനെ ആറസ്റ്റ് ചെയ്യ്തത്. ക്രമസമാധാന പ്രശ്‌നങ്ങള്‍ തടയാനുള്ള മുന്‍കരുതല്‍ നടപടിയുടെ ഭാഗമായിരുന്നു ഈ ആറസ്റ്റ് എന്നാണ് വ്യാഖ്യാനിക്കപ്പെട്ടത്. പക്ഷെ ആ അറസ്റ്റ് സുരേന്ദ്രന് വലിയ ഇമേജ് നേടിക്കൊടുത്തു. ശബരിമലയില്‍ സ്ത്രീകളെ തടയാന്‍ ശ്രമിച്ച കേസുകളിലുള്‍പ്പെടെ നിരവധി കേസുകളില്‍ പ്രതിചേര്‍ക്കപ്പെട്ട സുരേന്ദ്രന് ഇരുപത്തിയൊന്ന് ദിവസങ്ങള്‍ക്ക് ശേഷമാണ് ജാമ്യം ലഭിച്ചത്. പത്തനംതിട്ട ജില്ലയില്‍ പ്രവേശിക്കരുത് തുടങ്ങിയ കര്‍ശന ഉപാധികളോടെയായിരുന്നു ഹൈക്കോടതി ജാമ്യം അനുവധിച്ചത്.

സുരേന്ദ്രന്റെ അറസ്റ്റോടെ എസ്.പി. യതീഷ് ചന്ദ്രയും സുരേന്ദ്രനും ഒന്നു പോലെ തിളങ്ങി. യതീഷ് ചന്ദ്ര ശബരിമല കര്‍മ്മ സമിതിയുടെ കടുത്ത ശത്രുവായിമാറി. സുരേന്ദ്രനാകട്ടെ കണ്ണിലുണ്ണിയും. ഇതിനിടെ യതീഷ് ചന്ദ്ര അയ്യപ്പനെ കണ്ട് തൊഴുത് സങ്കടം പറയുന്ന ഫോട്ടോകള്‍ കര്‍മ്മ സമിതിക്കാര്‍ ആഘോഷിക്കുകയും ചെയ്തു. കാലം മാറി യതീഷ് ചന്ദ്രയ്ക്ക് പഴയ എസ്പിയായി തൃശൂര്‍ ഭാഗത്തുണ്ട്. അതേസമയം ഇത്തവണത്തെ ശബരിമല ഡ്യൂട്ടിയില്‍ ഇട്ടിട്ടുമില്ല. മാത്രമല്ല അന്ന് കര്‍മ്മസമിതിക്കാരെ തടഞ്ഞ പോലീസുകാരെ സന്നിധാനം ഡ്യൂട്ടിക്കും ഇട്ടിട്ടില്ല.

സുരേന്ദ്രനാകട്ടെ ഇപ്പോഴും ശബരിമലയുമായി സര്‍ക്കാരിനെ പ്രതിരോധത്തിലാക്കുന്നു. ശബരിമല നല്‍കിയ ഇമേജാണ് ലോക്‌സഭാ തെരഞ്ഞെടുപ്പിലും നിയമസഭാ ഉപതെരഞ്ഞെടുപ്പിലും സുരേന്ദ്രന് വന്‍ വോട്ട് കിട്ടാന്‍ സഹായിച്ചത്. മാത്രമല്ല സുരേന്ദ്രനെ ബിജെപി സംസ്ഥാന അധ്യക്ഷനാക്കാനുള്ള ചര്‍ച്ചകളാണ് ഡല്‍ഹിയില്‍ നടക്കുന്നത്. സുരേന്ദ്രന്‍ ബിജെപി പ്രസിഡന്റായാല്‍ ആദ്യം ചെയ്യുക പഴയ വാശി തീര്‍ക്കാന്‍ ശബരിമലയില്‍ പോകുകയായിരിക്കും. ഒരു യതീഷ് ചന്ദ്രയ്ക്കും തടയാനാകില്ല. അങ്ങനെയുണ്ടായാല്‍ കേന്ദ്ര ആഭ്യന്തര മന്ത്രി അമിത് ഷാ നോക്കിയിരിക്കില്ല. മാത്രമല്ല ബിജെപി അത് സുവര്‍ണാവസരവുമാക്കി മാറ്റുകയും ചെയ്യും.

കാര്യങ്ങള്‍ ഇങ്ങനെ പുരോഗമിക്കുമ്പോള്‍ സുരേന്ദ്രനനെ തേടി വലിയൊരു പുരസ്‌കാരം എത്തുകയാണ്. അതും അയ്യപ്പനുമായി ബന്ധമുള്ള മകര ജ്യോതിയുടെ പേരില്‍. ഭാരതീയ ആചാര്യ സമിതിയുടെ 2019 ലെ മകരജ്യോതി പുരസ്‌കാരമാണ് കെ സുരേന്ദ്രനെ തേടിയെത്തിയത്. ശബരിമലയിലെ ആചാര സംരക്ഷണത്തിന് നടത്തിയ പ്രവര്‍ത്തനങ്ങള്‍ക്കാണ് പുരസ്‌കാരം. 25,000 രൂപയും അയ്യപ്പന്റെ ചിത്രം ആലേഖനം ചെയ്ത ഫലകവും പ്രശസ്തി പത്രവും അടങ്ങുന്നതാണ് പുരസ്‌കാരം. കൊച്ചിയില്‍ വച്ച് നടക്കുന്ന അയ്യപ്പ സംഗമത്തില്‍ ഡിസംബറിലാവും പുരസ്‌കാരം കൈമാറുന്നത്. എങ്ങനെയുണ്ട് ഇതാണ് അയ്യപ്പന്റെ ഓരോരോ കളികള്‍.