സ്വന്തം തടി സംരക്ഷിക്കുന്ന രീതിയില്‍ രോഗികളെ ചികിത്സിക്കുന്ന ഡോക്ടര്‍മാരുടെ എണ്ണം കൂടിവരുകയാണെന്നും ഇത് സമൂഹത്തിന് നല്ലതല്ലെന്നും ഐ.എം.എ കേരള ഘടകം വൈസ്പ്രസിഡന്റ് ഡോ.സുള്‍ഫി നൂഹൂ. വയനാട്ടില്‍ പാമ്പ് കടിയേറ്റ അഹലയ്ക്ക് മതിയായ ചികിത്സ നല്‍കാത്തതിനാല്‍ മരിച്ച സംഭവത്തെ തുടര്‍ന്നാണ് ഡോക്ടറുടെ പ്രതികരണം. വൈദ്യ ചികിത്സ നല്‍കുവാന്‍ ഉള്ള ഭൗതിക സാഹചര്യങ്ങള്‍ അവിടെയുണ്ടായിരുന്നു. രോഗം തിരിച്ചറിയാനുള്ള വൈദഗ്ധ്യം ഉണ്ടായിരുന്നു. രോഗിക്ക് നല്ലത് വരുവാനുള്ള മനസും കൂടി ഉണ്ടായിരുന്നെന്ന് കരുതുന്നു. സ്വന്തം രക്ഷ കണക്കിലെടുക്കുന്ന ഡോക്ടര്‍മാരുടെ എണ്ണം കൂടി വരുന്നുവെന്ന വസ്തുതയുടെ പ്രാധാന്യം ഇവിടെയാണ് മനസിലാകുന്നത്. ഇത് പറയുമ്പോള്‍ തെറ്റ് ചെയ്ത ആരെയും സംരക്ഷിക്കുവാനുള്ള പടയൊരുക്കമാണെന്നു കരുതണ്ട. തെറ്റ് തെറ്റ് തന്നെയെന്നും അദ്ദേഹം പറയുന്നു.

ഡോക്ടര്‍മാര്‍ ഇന്ന് പ്രാക്ടീസ് ചെയ്യുന്നത് ഡിഫെന്‍സിവ് മെഡിസിനാണ്. അതായത് സ്വന്തം പ്രതിരോധം ആദ്യം. അതു കഴിഞ്ഞു മാത്രം രോഗിയുടെ ജീവന്‍ രക്ഷിക്കുവാനുള്ള നടപടികള്‍. ആ നിലയിലേക്ക് ഡോക്ടര്‍മാരുടെ മനസ് പോകുന്നത് സമൂഹത്തിന് ഒരിക്കലും നല്ലതല്ല. . ചികിത്സ നല്‍കിയാല്‍,അതു പരാജയപ്പെട്ടുപോയാല്‍ ഡോക്ടര്‍മാര്‍ക്കെതിരെ ആക്രമണം വരുമോ, ആരോപണം വരുമോ, തെറി അഭിഷേകം വരുമോ എന്നൊക്ക ഡോക്ടര്‍മാര്‍ ഭയക്കുന്നു. ഇതാണ് ഡോക്ടര്‍മാരെ ഈ രീതിയില്‍ മാറി ചിന്തിക്കാന്‍ പ്രേരിപ്പിക്കുന്നത്. സമൂഹ മാധ്യമങ്ങളില്‍ അവഹേളിക്കപെടുമോ എന്ന് ഭയക്കുന്നു. അതുകൊണ്ട് ജീവന്‍ രക്ഷിക്കാനുള്ള തീരുമാനം എടുക്കുമ്പോള്‍ പോലും അത് തന്നെ ബാധിക്കില്ല എന്ന് ഉറപ്പു വരുത്തേണ്ട രീതയിലേക്ക് ഡോക്ടര്‍മാരുടെ മനസ് മാറിയിരിക്കുന്നു. ഇത് നന്നല്ല.

എന്തും ചെയ്യുവാനുള്ള മനക്കരുത്ത്, ജീവന്‍ രക്ഷിക്കുവാനുള്ള മനക്കരുത്ത് ഡോക്ടര്‍ മാര്‍ക്ക് നല്കണം. അത് നല്‍കുവാനുള്ള ബാധ്യത സമൂഹത്തിനും, ഭരണാധികാരികള്‍ക്കും ഉണ്ട്. നല്ല ഡോക്ടറിന് വേണ്ട ഏറ്റവും പ്രധാനപെട്ട ഗുണങ്ങളിലൊന്ന് ധൈര്യമാണ്....
മനക്കരുത്താണ്. കൂടാതെ രോഗിക്ക് വേണ്ടി എല്ലാം ചെയ്യുവാനുള്ള സന്മനസ്സും. എങ്ങനെ ചെയ്യണം എന്നുള്ള വൈദ്യ വിജ്ഞാനവും വേണം.
അതെല്ലാം ചേരുമ്പോഴാണ് ഒരു നല്ല ഡോക്ടര്‍ ആകുന്നത്. മറ്റെല്ലാ ഘടകങ്ങള്‍ളും. ഉണ്ടെങ്കിലും അതായത് വൈദ്യ വിജ്ഞാനം, രോഗിക്ക് നല്ലതു ചെയ്യുവാനുള്ള മനസ്, അതിനുള്ള ഭൗതിക സാഹചര്യങ്ങള്‍ തുടങ്ങിയവ എല്ലാം ഉണ്ടെങ്കിലും രോഗിക്ക് വേണ്ടി ഇതു ചെയ്യുവാനുള്ള ധൈര്യം കുറച്ചു ശതമാനം ഡോക്ടര്‍മാര്‍ക്കും ഇപ്പോഴില്ല എന്നുള്ളത് സത്യമാണ് .

ആന്റി സ്‌നെക്ക് വെനോം കൊടുക്കുമ്പോള്‍ ഉണ്ടാകാവുന്ന അപൂര്‍വമായ ഭവിഷ്യത്തുകള്‍ ഡോക്ടര്‍മാര്‍ പറഞ്ഞു മനസിലാക്കിയാല്‍ , അത് നല്‍കുന്നതാണ് നല്ലതെന്ന് മനസിലാക്കി അത് ചെയ്യുവാനുള്ള ധൈര്യം ഡോക്ടര്‍മാര്‍ക്ക് കൊടുക്കേണ്ട ബാധ്യത പൊതു സമൂഹത്തിനാണ്.
ആന്റി സ്‌നേക്ക് മരുന്ന് നല്‍കിയാല്‍ അപൂര്‍വമായി ഉണ്ടാകുന്ന പാര്‍ശ്വഫലം രണ്ടാമത് പറയുകയും അത് നല്‍കേണ്ടതിന്റെ ആവശ്യകത ആദ്യം പറയുകയും ചെയ്യുന്നതാണ് ഉത്തമം. അതിനു പകരം ഡോക്ടര്‍ സ്വന്തം ജീവനില്‍ ഭയന്നു ആദ്യം ആന്റി സ്‌നേക്ക് വനത്തിന്റ ദൂഷ്യവശം പറഞ്ഞു വയ്ക്കുന്നത് തീര്‍ത്തും നന്നല്ല തന്നെ.

ദൂഷ്യവശം പറയേണ്ടതാണ്. പക്ഷെ മരുന്ന് നല്‍കേണ്ടതിന്റെ ആവശ്യം പറയേണ്ടതാണ് ആദ്യം. ഡോക്ടര്‍ ചെയ്തിരിക്കുന്നത് രോഗിയോടുള്ള സ്‌നേഹക്കുറവ് കാരണമല്ല. സ്വന്തം തടിയോടുള്ള സ്‌നേഹമാണ്. സ്വന്തം ആത്മ രക്ഷാര്‍ത്ഥം ചെയ്ത് പോയ ഒരു പ്രവൃത്തി ആണെന്ന് പറയുമ്പോള്‍ എന്നെ കല്ലെറിയാന്‍ വരരുത്. അത് ചുറ്റും എപ്പോഴും കണ്ടു കൊണ്ടിരിക്കുന്ന ഒരാളാണ് ഞാന്നെും ഡോ. സുള്‍പി നൂഹൂ പറയുന്നു. ഡോക്ടര്‍ക്ക് സധൈര്യം ചികില്‍സിക്കാനുള്ള ആത്മ വിശ്വാസവും കരുത്തും പകര്‍ന്നു നല്‍കേണ്ടത് സമൂഹത്തിന്റെ, എന്റെ, നിങ്ങളുടെ, ഭരണാധികാരികളുടെ എല്ലാം കടമയാണ്. ഡോക്ടര്‍ക്ക് സ്വന്തം ആത്മ രക്ഷ നോക്കി ചികില്‍സിക്കുന്ന തലത്തിലേക്ക് കേരളം മാറി പോയിട്ട് ഏതാണ്ട് രണ്ടു ദശകങ്ങളില്‍ ഏറെ ആയിരിക്കുന്നു. ഈ സത്യം ഇനിയും തിരിച്ചറിയാതെ പോകരുത്. മറ്റൊരു ബാലികയ്ക്കും, മറ്റൊരാള്‍ക്കും, ആത്മ രക്ഷയെ മുന്‍തൂക്കം നല്‍കി ചികിത്സ വൈകാന്‍ പാടില്ല. അതിനു മുന്‍കൈ എടുക്കേണ്ടത് പൊതുസമൂഹമാണ്.