ബത്തേരിയില്‍ ക്ലാസ് മുറിയില്‍ പാമ്പ് കടിയേറ്റ് ഷഹല എന്ന കുഞ്ഞ് വിദ്യാര്‍ത്ഥി മരിച്ചതോടെ പാമ്പ് കടിയേറ്റാല്‍ എന്ത് ചെയ്യണമെന്ന ആശങ്ക രക്ഷിതാക്കള്‍ക്കും അധ്യാപകര്‍ക്കും ഉള്‍പ്പെടെയുണ്ട്. സംസ്ഥാനത്ത് മൊത്തം 101 തരം പാമ്പുകള്‍ ആണുള്ളത്. അതില്‍ മനുഷ്യ ജീവന് അപകടകരമായ രീതിയില്‍ വിഷമുള്ളത് 10 എണ്ണം മാത്രം. അതില്‍ അഞ്ചെണ്ണം കടല്‍പാമ്പുകളാണ്. കരയില്‍ കാണുന്ന 95 തരം പാമ്പുകളില്‍ അഞ്ച് തരത്തിന് മാത്രമേ മനുഷ്യന്റെ ജീവന്‍ അപഹരിക്കാന്‍ കഴിയൂ. മനുഷ്യ ജീവന് അപകടകരമായ വിഷപ്പാമ്പുകളുടെ എല്ലാ കടികളും മരണകാരണം ആവുകയുമില്ല. ഇര പിടിച്ചതിന് ശേഷമുള്ള കടികളിലും പല്ലുകള്‍ ആഴത്തില്‍ ഇറങ്ങാത്ത കടികളിലും മനുഷ്യ ശരീരത്തിലേക്ക് മരണ കാരണമാകാവുന്ന അളവില്‍ വിഷം പ്രവേശിക്കണമെന്നില്ല. ഈ രണ്ട് സാധ്യതകളുമാണ് പലപ്പോഴും വ്യാജ ചികിത്സകര്‍ ഉപയോഗിക്കുന്നത്. സാധാരണ മനുഷ്യന്‍ അത് വിശ്വസിച്ചു പോകും. കല്ല് ശരീരത്തില്‍ വച്ചാലോ, പച്ചിലകള്‍ പിഴിഞ്ഞൊഴിച്ചാലോ ഈ പാമ്പുകളുടെ വിഷത്തിന് മരുന്നാവില്ല.

പാമ്പുകളുടെ വിഷം പ്രോട്ടീനുകളാണ്. ഈ പ്രോട്ടീനെ നിര്‍വീര്യമാക്കാനുള്ള മറുമരുന്ന് കുതിരകളില്‍ നിന്നാണ് നിര്‍മ്മിക്കുന്നത്. മനുഷ്യ മരണത്തിന് കാരണമാകാവുന്ന മൂര്‍ഖന്‍, ശംഖുവരയന്‍, അണലി, ചുരുട്ട മണ്ഡലി എന്നീ നാലു പാമ്പുകളുടെ വിഷം കുതിരയില്‍ കുത്തിവച്ച്, കുതിരയുടെ ശരീരത്തിലുണ്ടാകുന്ന ആന്റിബോഡി രക്തത്തില്‍ നിന്നും വേര്‍തിരിച്ചെടുക്കുന്നു. അതാണ് മറുമരുന്ന്. രാജവെമ്പാല,മൂര്‍ഖന്‍, ശംഖുവരയന്‍ എന്നിവയുടെ വിഷം മനുഷ്യ നാഡീമണ്ഡലത്തെ ബാധിക്കുന്നു. അണലിയുടെ വിഷം രക്ത മണ്ഡലത്തെയാണ് ബാധിക്കുന്നത്. നാഡീമണ്ഡലത്തെ ബാധിക്കുന്ന വിഷബാധയേറ്റാല്‍ കാഴ്ച മങ്ങല്‍, ശ്വാസതടസ്സം, അമാശയവേദന എന്നിവ ഉണ്ടാകും. രക്തമണ്ഡലത്തെ ബാധിക്കുന്ന വിഷബാധ മൂലം കടിയേറ്റ ഭാഗത്ത് നീരും തലകറക്കവും ഉണ്ടാകുന്നു. കൂടാതെ രോമകൂപങ്ങളിലൂടെ രക്തം പൊടിയുകയും ചെയ്യുന്നു.

പാമ്പ് കടിയേറ്റാലുടന്‍ ആ ഭാഗം തുണി ഉപയോഗിച്ച് കെട്ടരുത്. കടിയേറ്റ ഭാഗത്തേക്കുള്ള രക്തയോട്ടം തടസ്സപ്പെടും. കൈയിലോ കാലിലോ ആണ് കടിയേറ്റതെങ്കില്‍ വാച്ച്, ആഭരണങ്ങള്‍ തുടങ്ങിയവ ഊരിമാറ്റുക. ് നീര്‍വീക്കം ഉണ്ടായാല്‍ ഇവ ഇറുകി ബുദ്ധിമുട്ടുണ്ടാകും. കടിയേറ്റഭാഗത്ത് നിന്ന് ചോരയൊലിക്കുന്നുണ്ടെങ്കില്‍ വൃത്തിയുളള തുണി ഉപയോഗിച്ച് കെട്ടണം. കടിച്ച പാമ്പ് ഏതാണെന്ന് അറിയുന്നതും ചികിത്സയും തമ്മില്‍ യാതൊരു ബന്ധവുമില്ല. അതിനാല്‍ പാമ്പിനെ അന്വേഷിച്ച് സമയം കളയരുത്. രോഗിക്ക് എത്രയും വേഗം ചികിത്സ നല്‍കണം. വിഷക്കല്ല് വെക്കുക, പച്ചമരുന്നു കഴിക്കുക തുടങ്ങിയ നാടന്‍ ചികിത്സ ചെയ്യരുത്. 

പാമ്പ് കടിയേറ്റ ശേഷം മദ്യപിക്കുകയോ, പുക വലിക്കുകയോ ആഹാരം കഴിക്കുകയോ ചെയ്യരുത്. ചെയ്താല്‍ പുകയിലയിലെ നിക്കോട്ടിനും മദ്യത്തിലെ രാസവസ്തുക്കളും കാരണം രക്തക്കുഴലുകള്‍ വികസിക്കും അതുവഴി വിഷം പെട്ടെന്ന് രക്തത്തില്‍ കലരും. ചായയിലും കാപ്പിയിലും അടങ്ങിയിട്ടുള്ള തേയിനിലും കഫീനിലും ഇതേ രീതിയില്‍ പ്രവര്‍ത്തിക്കും. പാമ്പുകടിച്ചാല്‍ ഉറങ്ങാന്‍ പാടില്ലെന്ന് പറയുന്നത് ശാസ്ത്രീയ അടിസ്ഥാനമില്ല. പാമ്പ് കടിച്ചാല്‍ സ്വാഭാവികമായും ഭയമുണ്ടാകും . ഭയവും ഓടി രക്ഷപ്പെടാനുള്ള ശ്രമവും രക്തചംക്രമണം വേഗത്തിലാക്കും. അതുവഴി ഹൃദയം, വൃക്ക, തലച്ചോര്‍ എന്നിവിടങ്ങളില്‍ വിഷം പെട്ടെന്ന് എത്തും.