ധാരാളം മേച്ചില്പുറങ്ങള് തേടിപോയ വ്യക്തിയാണ് ആരിഫ് മുഹമ്മദ് ഖാന്; ആരിഫ് മുഹമ്മദ് ഖാനെ ഗവര്ണറാക്കിയത് കേരളത്തിലെ ബി.ജെ.പിയുടെ കാര്യങ്ങള് നോക്കാനല്ലെന്ന് വി.ഡി. സതീശന് എം.എല്.എ
അധികാരത്തിലുണ്ടായിരുന്നെങ്കില് ബലം പ്രയോഗിച്ച് പൗരത്വ നിയമഭേദഗതി നടപ്പാക്കുമായിരുന്നുവെന്ന ഗവര്ണര് ആരിഫ് മുഹമ്മദ് ഖാന്റെ പ്രസ്താവനക്കെതിരെ പ്രതിഷേധം ശക്തമാകുകയാണ്. പലകോണുകളിൽ നിന്നും ഗവര്ണര്ക്കെതിരെ പ്രതികൂല സ്വരങ്ങളാണ് ഉയരുന്നത്.
ആരിഫ് മുഹമ്മദ് ഖാനെ ഗവര്ണറാക്കിയത് കേരളത്തിലെ ബി.ജെ.പിയുടെ കാര്യങ്ങള് നോക്കാനല്ലെന്ന് ആഞ്ഞടിച്ചിരിക്കുകയാണ് കോണ്ഗ്രസ് നേതാവ് വി.ഡി. സതീശന് എം.എല്.എ. സംസ്ഥാനത്തിന്റെ ഭരണപദവി വഹിക്കുന്ന ഗവര്ണര്ക്ക് അഭിപ്രായം പ്രകടിപ്പിക്കുന്നതിന് നിയന്ത്രണങ്ങളുണ്ട്. നിയന്ത്രണരേഖയുടെ പരിധി അദ്ദേഹം വിട്ടതാണ് ഇപ്പോഴത്തെ പ്രശ്നങ്ങള്ക്ക് വഴിവെച്ചതെന്നും സതീശന് വ്യക്തമാക്കി.
രാഷ്ട്രീയ അഭിപ്രായ പ്രകടനം നടത്തിയാല് ചോദ്യ ചെയ്യപ്പെടും. ഗവര്ണറുടെ തീരുമാനങ്ങള് ചോദ്യം ചെയ്യപ്പെടാന് പാടില്ലെന്ന് പറയുന്നത് അദ്ദേഹത്തിനുള്ള പ്രിവിലേജിന്റെ ഭാഗമാണ്. അതേസമയം, ഗവര്ണര്ക്കുള്ള നിയന്ത്രണത്തിന്റെ പരിധി അദ്ദേഹം കടക്കുമ്ബോള് പ്രതികരണമുണ്ടാകും. രാജ്യത്ത് നടക്കുന്ന ഭരണഘടനാവിരുദ്ധമായ നടപടിക്കെതിരെ ജനങ്ങളുടെ പ്രതിഷേധം ഉണ്ടാകുമെന്നും സതീശന് ചൂണ്ടിക്കാട്ടി.
ഭരണഘടന പദവിയെ ഗവര്ണര് കളങ്കപ്പെടുത്തി. ഈ വിഷയത്തില് അഭിപ്രായ പ്രകടനം നടത്തേണ്ട കാര്യം അദ്ദേഹത്തിനില്ല. ധാരാളം മേച്ചില്പുറങ്ങള് തേടിപോയ വ്യക്തിയാണ് ആരിഫ് മുഹമ്മദ് ഖാന്. കോണ്ഗ്രസില് നിന്ന് ബി.എസ്.പിയിലും പിന്നീട് ബി.ജെ.പിയിലും എത്തിയ സ്ഥിരതയില്ലാത്ത രാഷ്ട്രീയ നിലപാട് സ്വീകരിച്ച ആളാണ്. നിലപാടുകള് മാറ്റികൊണ്ടിരുന്ന വ്യക്തിയാണെന്നും വി.ഡി സതീശന് പ്രതികരിച്ചു.
ഒരു സ്വകാര്യ മാധ്യമത്തിന് നൽകിയ അഭിമുഖത്തിലാണ് പൗരത്വ നിയമഭേദഗതി നടപ്പാക്കണമെന്നും, അതിനോട് തികച്ചും അനുകൂലമായ നിലപാടാണ് തനിക്കുള്ളതെന്നും ഗവര്ണര് പ്രതികരിച്ചത്. രാജ്യത്തെ നിയമങ്ങള് സംരക്ഷിക്കേണ്ടത് ഗവര്ണറെന്ന നിലയില് തന്റെ ഭരണഘടനാപരമായ ഉത്തരവാദിത്തമാണെന്നും ആരിഫ് മുഹമ്മദ് ഖാന് പറഞ്ഞു. ഇന്ത്യന് ചരിത്ര കോണ്ഗ്രസില് തനിക്ക് നേരെ ക്ഷോഭിച്ചതും ചോദ്യങ്ങള് ചോദിച്ചതും ചരിത്രകാരന് ഇര്ഫാന് ഹബീബാണെന്നും, അതിന് മറുപടി പറയുക മാത്രമാണ് താന് ചെയ്തതെന്നും ഗവര്ണര് പറഞ്ഞു. നിയമത്തെ ചോദ്യം ചെയ്താല് നിഷ്പക്ഷനായിരിക്കില്ലെന്നും അദ്ദേഹം വ്യക്തമാക്കി.
ഗവര്ണര് ആരിഫ് മുഹമ്മദ് ഖാനെതിരെ സി.പി.ഐ.എം സംസ്ഥാന സെക്രട്ടറി കോടിയേരി ബാലകൃഷ്ണനും രംഗത്ത് എത്തിയിരുന്നു. പദവിയ്ക്ക് നിരക്കാത്ത രീതിയില് ഗവര്ണര് പ്രവര്ത്തിക്കുകയാണെന്ന് കോടിയേരി പറഞ്ഞു.
കണ്ണൂര് സര്വകലാശാലയില് സംഘടിപ്പിച്ച ചരിത്ര കോണ്ഗ്രസ് പരിപാടിയ്ക്കിടെയാണ് ഗവര്ണര് പൗരത്വ നിയമത്തെ അനുകൂലിച്ചും പ്രതിഷേധക്കാരെ എതിര്ത്തും രംഗത്തെത്തിയത്. ഭരണഘടനയില് തൊട്ട് സത്യപ്രതിജ്ഞ ചെയ്ത ആളാണ് താനെന്നും ഭരണഘടന സംരക്ഷിക്കാന് വേണ്ടിയാണ് താന് പ്രവര്ത്തിക്കുന്നതെന്നും ഇത് രാഷ്ട്രീയ പ്രശ്നമാണെന്നും അതില് ഇടപെടില്ലെന്നും ഗവര്ണര് പറഞ്ഞിരുന്നു.
ഇതോടെ വേദിയുടെ മുന്നിരയില് ഇരിക്കുകയായിരുന്ന ജാമിഅ മില്ലിയ സര്വകലാശാലയിലെ രണ്ട് വിദ്യാര്ത്ഥികള് ‘ റിജക്ട് സി.എ.എ” എന്നെഴുതിയ പ്ലക്കാര്ഡുമായി എഴുന്നേറ്റു നിന്നു. ഇത് പിന്നീട് കൂടുതല് പേര് ഏറ്റെടുക്കുകയും ഗവര്ണര്ക്കെതിരെ മുദ്രാവാക്യം ഉയരുകയുമായിരുന്നു.
https://www.facebook.com/Malayalivartha
