കണ്ണൂർ സർവകലാശാലയിൽ ഗവർണർക്കെതിരെ പ്രതിഷേധിച്ച ഇർഫാൻ ഹബീബ്ഉ ൾപ്പെടെയുള്ളവർക്കെതിരെ കർശന നടപടിക്ക് സാധ്യത. സംഭവത്തിൽ ആർക്കെതിരെയും പോലീസ് ഇതുവരെ കേസെടുത്തിട്ടില്ല. വിവാദത്തിൽ ഒരു വിട്ടുവീഴ്ചക്കും തയ്യാറല്ലെന്ന മട്ടിൽ ഗവർണർ നടത്തുന്ന നീക്കങ്ങളുടെ പശ്ചാത്തലത്തിലാണ് സർക്കാർ നടപടിക്ക് നീക്കം നടത്തുന്നത്.

88 വയസായ താൻ ഗവർണറെ ആക്രമിക്കാൻ ശ്രമിച്ചെന്ന് പറഞ്ഞാൽ അതിൽ നീതിയില്ലെന്ന് ഇർഫാൻ ഹബീബ് പറഞ്ഞു. എന്നാൽ ഗവർണറുമായി ഉണ്ടായ കലഹം അവിചാരിതമായി സംഭവിച്ചതാണെന്ന് രാജ്ഭവൻ കരുതുന്നില്ല. കാരണം ഗവർണർ പ്രസംഗിച്ചയുടൻ പ്ലകാർഡുകളുമായി ഒരു സംഘം ആളുകൾ എണീക്കുകയായിരുന്നു. പ്രകോപനം അവിചാരിതമാണെങ്കിൽ എങ്ങനെയാണ് പ്ലക്കാർഡ് നേരത്തെ എഴുതി തയ്യാറാക്കിയതെന്നാണ് രാജ്ഭവന്റെ ചോദ്യം.

കൃത്യമായി ഒരു അജണ്ട സമരക്കാർക്ക് ഉണ്ടായിരുന്നു എന്നാണ് ഗവർണറുടെ വിശദീകരണം. രാജ്ഭവൻ വ്യത്തങ്ങൾ തീർത്തും ഗൗരവമായാണ് വിഷയം ഏറ്റെടുത്തത്. ചീഫ് സെക്രട്ടറിയെ വിളിച്ചുവരുത്തിയത് ഇതിന്റെ ഭാഗമാണ്. നടന്ന സംഭവങ്ങളെ കുറിച്ച് വിശദമായ റിപ്പോർട്ട് രാജ്ഭവൻ കേന്ദ്രത്തിന് കൈമാറിയിട്ടുണ്ട്. ഗവർണർക്ക് പോലും സംരക്ഷണമില്ലാത്ത സംസ്ഥാനമായി കേരളം മാറുന്നു എന്ന നിലയിലേക്കാണ് കാര്യങ്ങൾ നീങ്ങുന്നത്.

കേന്ദ്രത്തിന്റെ നീക്കത്തെ കുറിച്ച് സംസ്ഥാന സർക്കാർ ജാഗരൂകരാണ്. ഗവർണറുടെ എ. ഡി സിയെ ആക്രമിക്കാൻ ശ്രമിച്ചു എന്നത് വളരെ ഗൗരവമുള്ള കാര്യമാണ്. എന്നിട്ടും സംസ്ഥാനം നടപടി വൈകിയാൽ അത് കേന്ദ്രം നേരിട്ട് നടപടിയെടുക്കുന്ന സാഹചര്യത്തിൽ വന്നുചേരും. ഇക്കാര്യം ബിജെപി നേതാക്കൾ തുറന്നു പറഞ്ഞു. സംസ്ഥാന പോലീസ് മേധാവിക്ക് ഇക്കാര്യത്തിൽ നിശബ്ദത പാലിക്കാൻ കഴിയുകയില്ല. കാരണം സർക്കാരും രാഷ്ട്രീയവും രണ്ടും രണ്ടാണ്. സർക്കാരിനും പോലീസിനും ക്രമസമാധാനവിഷയത്തിൽ രാഷ്ട്രീയം കളിക്കാനാവില്ല.

ബി ജെ പിയോട് എതിർപ്പുള്ളവർ പോലും ഗവർണർക്ക് നേരെയുണ്ടായ ആക്രമണസമരത്തെ അപലപിക്കുന്നുണ്ട്. ഗവർണർ വളരെയധികം സജീവമാണ്. പ്രോട്ടോക്കോൾ കടുംപിടുത്തമൊന്നുമില്ലാത്ത ഗവർണറെ കേരളത്തിന് പൊതുവേ ഇഷ്ടമാണ്. പൗരത്വബിൽ ഗവർണറുടെ സംഭാവനയല്ല. അദ്ദേഹത്തിന് അതുമായി യാതൊരു ബന്ധവുമില്ല. എന്നിട്ടും ഗവർണറെ ഷെയിം വിളിച്ചാൽ വിളിച്ചവർ എത്ര പ്രമുഖരായാലും അവരെ കേരളം അംഗീകരിക്കുകയില്ല.

വിഷയത്തിൽ സർക്കാരിന്റെ നീക്കങ്ങൾ സസൂക്ഷ്മം നിരീക്ഷിക്കുകയാണ് രാജ്ഭവൻ. സർക്കാർ നടപടിയെടുക്കാതെ മാറി നിൽക്കാൻ സാധ്യതയുണ്ടെന്ന റിപ്പോർട്ടാണ് രാജ്ഭവന് കിട്ടിയിരിക്കുന്നത്. അതുകൊണ്ടാണ് ചീഫ് സെക്രട്ടറിയെ വിളിച്ചുവരുത്തിയത്. ഗവർണറിൽ നിന്നും മനസിലാക്കിയ കാര്യങ്ങൾ ചീഫ് സെക്രട്ടറി മുഖ്യമന്ത്രിയെ ധരിപ്പിക്കും.

അതേസമയം കേസെടുക്കണമെന്ന് ആവശ്യപ്പെട്ട് സർക്കാരിന്റെ മുന്നിൽ മുട്ടുകുത്താൻ രാജ്ഭവൻ തയ്യാറാകില്ല. ഇക്കാര്യത്തിൽ സർക്കാർ നിഷേധാത്മക നിലപാട് സ്വീകരിച്ചാൽ കേന്ദ്ര സർക്കാരിൽ നിന്നും ചീഫ് സെക്രട്ടറിക്കും സംസ്ഥാന പോലീസ് മേധാവിക്കും കൊട്ട് കിട്ടും. അതിനുള്ള അവസരം ഉണ്ടാക്കാതെ കണ്ണൂരിലെ വില്ലൻമാരെ കണ്ടെത്താനാണ് ചീഫ് സെക്രട്ടറിയുടെ നീക്കം.