വീണ്ടും ചര്ച്ചയാകുന്നു... കലാഭവന് മണിയുടെ മരണം സംബന്ധിച്ച് ദുരൂഹതകള് അവസാനിപ്പിച്ച് സി.ബി.ഐ.; മണിയുടെ രക്തത്തില് കണ്ടെത്തിയ മീഥൈല് ആല്ക്കഹോളിന്റെ അംശം അപകടകരമായ അളവിലായിരുന്നില്ല; മരണ കാരണം കരള്രോഗം മൂര്ച്ഛിച്ചത്
മലയാളികളുടെ പ്രിയനടന് കലാഭവന് മണിയുടെ ആകസ്മിക മരണം കുടുംബാംഗങ്ങളേയും ആരാധകരേയും ഒരുപോലെ വേദനിപ്പിച്ചിരുന്നു. അപ്രതീക്ഷിതമായ മണിയുടെ മരണം ദുരൂഹതയാണെന്ന് പറഞ്ഞ് സുഹൃത്തുക്കളും ബന്ധുക്കളും രംഗത്തെത്തിയതോടെയാണ് അന്വേഷണം സിബിഐയ്ക്ക് വിട്ടത്. കലാഭവന് മണിയുടേത് കൊലപാതകമല്ലെന്നും കരള്രോഗം മൂര്ച്ഛിച്ചതാണ് മരണകാരണമെന്നും വ്യക്തമാക്കിയാണ് സി.ബി.ഐയുടെ അന്വേഷണ റിപ്പോര്ട്ട്. ശരീരത്തില് കണ്ടെത്തിയ വിഷാംശം മദ്യത്തിലൂടെയും കീടനാശിനി ഭക്ഷണത്തിലൂടെയും എത്തിയതാണെന്നും റിപ്പോര്ട്ടില് വ്യക്തമാക്കുന്നു. ദുരൂഹതകള് പൂര്ണമായും തള്ളിക്കളയുന്ന റിപ്പോര്ട്ട് കോടതിയില് സമര്പ്പിച്ചു.
2016 മാര്ച്ച് ആറ്, കലാഭവന് മണി പെട്ടന്നില്ലാതായ അന്ന് മുതല് തുടങ്ങിയ ദുരൂഹതകളും ആശങ്കകളുമെല്ലാം അടിസ്ഥാനരഹിതമെന്ന് വിദഗ്ധ പഠനങ്ങളുടെ അടിസ്ഥാനത്തില് വ്യക്തമാക്കുകയാണ് സി.ബി.ഐ.. ചാലക്കുടിയിലെ പാടിയില് രക്തം ഛര്ദിച്ച് കുഴഞ്ഞ് വീണ് മണി മരിച്ചപ്പോള് ദുരൂഹതകള് വര്ധിപ്പിച്ചത് ശരീരത്തിലെ വിഷാംശവും ക്ളോര്പൈറിഫോസ് എന്ന കീടനാശിനിയുടെ സാന്നിധ്യവുമായിരുന്നു. ഇവയുടെ സാന്നിധ്യത്തിനും മണിയുടെ മരണത്തിനും കാരണമായത് അതിഗുരുതരമായിരുന്ന കര്ള്രോഗമെന്നാണ് സി.ബി.ഐയുടെ നിഗമനം.
ശരീരത്തില് കണ്ട വിഷാംശമെത്തിയത് മദ്യത്തിലൂടെയാണ്. പച്ചക്കറികള് വേവിക്കാതെ കഴിച്ചതിലൂടെയാണ് കീടനാശിനി ശരീരത്തിലെത്തിയത്. കരള് പ്രവര്ത്തനം തടസപ്പെട്ടനിലയിലായിതിനാല് ഇവ ദഹിച്ച് പോകാതെ അടിഞ്ഞ് കൂടിയെന്നും പുതുച്ചേരിയിലെ ഡോക്ടര്മാരുടെ റിപ്പോര്ട്ടിന്റെ അടിസ്ഥാനത്തില് സി.ബി.ഐ സമര്ഥിക്കുന്നു. കീടനാശിനിയോ വിഷമോ കുടിക്കുകയോ കുടിപ്പിക്കുകയോ ചെയ്യുമ്പോഴുള്ള അളവില് ഇല്ലാത്തതും ഇത് ഭക്ഷണത്തിലൂടെയെത്തിയതാണെന്നതിന് തെളിവാണ്.
സുഹൃത്തുക്കളടക്കം ഏഴ് പേരെ നുണപരിശോധനക്ക് വിധേയമാക്കിയതിലൂടെ അവസാനദിവസങ്ങളില് മദ്യപിച്ചതിനും പച്ചക്കറികള് കഴിച്ചതിനും തെളിവുണ്ടെന്നും എറണാകുളം സി.ജെ.എം കോടതിയില് നല്കിയ റിപ്പോര്ട്ടില് പറയുന്നു. നേരത്തെ സമാനമായ നിഗമനങ്ങളായിരുന്നു പൊലീസ് അന്വേഷണത്തിലും കണ്ടെത്തിയത്. മണിയുടെ സഹോദരന്റെ ആവശ്യത്തെ തുടര്ന്നാണ് കേസ് സി.ബി.ഐക്ക് വിട്ടത്.
സൂപ്പര് താരങ്ങള് വാണ കാലത്ത് സ്വന്തം കഴിവ് കൊണ്ട് ഉയര്ന്ന് വന്ന താരമാണ് കലാഭവന് മണി. തമിഴ്, തെലുങ്ക് മുതലായ തെന്നിന്ത്യന് ഭാഷാ സിനിമകളിലും അഭിനയിച്ചിട്ടുണ്ട്. കൊച്ചിന് കലാഭവന് മിമിക്സ് പരേഡിലൂടെയാണ് കലാരംഗത്ത് സജീവമായാത്. കോമഡി വേഷങ്ങളിലൂടെ സിനിമയില് തുടക്കമിട്ടു. പില്ക്കാലത്ത് നായകനായി വളര്ന്നു. നാടന് പാട്ടുകളുടെ അവതരണം, ആലാപനം എന്നിവയിലും കഴിവ് തെളിയിച്ചു.
കേരളത്തിലെ നാട്ടിന്പുറങ്ങളില് പാടി പ്രചരിച്ചിരുന്ന നാടന് പാട്ടുകളും പുതിയ തലമുറയിലെ സിനിമാ സംഗീതത്തിനു സമാന്തരമായി ശ്രീ അറുമുഖന് വെങ്കിടങ്ങ് എഴുതിയ നാടന് വരികളും നാടന് ശൈലിയില്ത്തന്നെ അവതരിപ്പിച്ചായിരുന്നു മണി ജന ശ്രദ്ധ പിടിച്ചുപറ്റിയത്. തൃശ്ശൂര് ജില്ലയിലെ ചാലക്കുടിയില് ജനനം. അക്ഷരം എന്ന ചലച്ചിത്രത്തിലെ ഒരു ഓട്ടോ ഡ്രൈവറുടെ വേഷത്തില് ചലച്ചിത്രലോകത്തെത്തിയെങ്കിലും സുന്ദര്ദാസ്, ലോഹിതദാസ് കൂട്ടുകെട്ടിന്റെ സല്ലാപം എന്ന ചലച്ചിത്രത്തിലെ ചെത്തുകാരന് രാജപ്പന്റെ വേഷം മണിയെ മലയാളചലച്ചിത്രരംഗത്ത് ശ്രദ്ധേയനാക്കി. 2009ലെ നെഹ്രുട്രോഫി വള്ളംകളിയില് കാരിച്ചാല് ചുണ്ടന്റെ അമരക്കാരനായും ഇദ്ദേഹം ശ്രദ്ധേയനായി.
ഇങ്ങനെ എല്ലാ നിലകളിലും ശ്രദ്ധേയനായ കലാഭവന് മണിയുടെ മരണം ആരാധകര്ക്ക് സഹിക്കാന് കഴിഞ്ഞില്ല. മണിയുടെ മരണത്തില് പല സുഹൃത്തുക്കളെപ്പോലും സംശയ നിഴലിലാക്കിയിരുന്നു. മണിയെ അപകടപ്പെടുത്തി എന്നുവരെ പ്രചാരണമുണ്ടായി. അതിനാണ് ഇപ്പോള് സിബിഐ വിരാമമിട്ടിരിക്കുന്നത്.
"
https://www.facebook.com/Malayalivartha
