ആഢംബര വാഹന രജിസ്‌ട്രേഷന്‍ കേസില്‍ നടനും ബി.ജെ.പി എം.പിയുമായ സുരേഷ്‌ഗോപി ഏഴ് വര്‍ഷം തടവിലാകുമോ? ക്രൈംബ്രാഞ്ച് ഇന്ന് സമര്‍പ്പിച്ച കുറ്റപത്രം അനുസരിച്ച് അദ്ദേഹത്തിന് ഏഴ് വര്‍ഷം തടവും പിഴയും ലഭിച്ചേക്കാം. രണ്ട് ഓഡി കാറുകളുടെ രജിസ്‌ട്രേഷനുമായി ബന്ധപ്പെട്ട് 19.60 ലക്ഷം രൂപയുടെ നികുതി വെട്ടിച്ചെന്നാണ് അദ്ദേഹത്തിനെതിരെയുള്ള കേസ്. വ്യാജ വിലാസത്തില്‍ ആഢംബര വാഹനം വാങ്ങി നികുതി വെട്ടിച്ചെന്നാണ് കേസ്. കുറ്റംചുമത്താന്‍ ക്രൈംബ്രാഞ്ച് മേധാവി അനുമതി നല്‍കിയതോടെ തിരുവനന്തപും സി.ജെ.എം കോടതിയില്‍ ഇന്നാണ് കുറ്റപത്രം സമര്‍പ്പിച്ചത്. വ്യാജമേല്‍വിലാസത്തിന് പുറമേ വ്യാജ സീലും ഉണ്ടാക്കിയാണ് പോണ്ടിച്ചേരിയില്‍ വാഹനങ്ങള്‍ രജിസ്റ്റര്‍ ചെയ്തതെന്നും ക്രൈംബ്രാഞ്ച് അന്വേഷണത്തില്‍ കണ്ടെത്തി.

ഡിവൈഎസ്പി ജോസി ചെറിയാനും സംഘവും തയാറാക്കിയ കുറ്റപത്രം കോടതിയില്‍ സമര്‍പ്പിക്കാന്‍ ക്രൈംബ്രാഞ്ച് മേധാവി ടോമിന്‍ തച്ചങ്കരിയാണ് അനുമതി നല്‍കിയത്. സത്യവാങ്മൂലത്തില്‍ ഹാജരാക്കിയ ഒപ്പും സീലും വ്യാജ്യമാണെന്ന് നോട്ടറി അഭിഭാഷകനും മൊഴിനല്‍കി. സുരേഷ് ഗോപിയുടെ പി.വൈ01 ബി.എ 0999 എന്ന ഓഡി ക്യൂ7 കാര്‍ പോണ്ടിച്ചേരിയില്‍ രജിസ്റ്റര്‍ ചെയ്തതിലൂടെ ലക്ഷങ്ങളാണ് നികുതിയിനത്തില്‍ സര്‍ക്കാരിന് നഷ്ടമായത്. ആഢംബര കാറുകള്‍ക്ക് നികുതി കൂടുതലായതിനാല്‍ കേന്ദ്രഭരണപ്രദേശമായ
പുതുച്ചേരിയില്‍ രജിസ്റ്റര്‍ ചെയ്യുന്നത് പതിവാണ്. 20ലക്ഷം രൂപയ്ക്ക് മുകളിലുള്ള കാറുകള്‍ക്ക് പുതുച്ചേരിയില്‍ 55,000 ഫ്‌ളാറ്റ് ടാക്‌സ് നല്‍കിയാല്‍ മതി എന്നതാണ് ആഡംബര വാഹനങ്ങള്‍ പുതുച്ചേരിയില്‍ രജിസ്റ്റര്‍ ചെയ്യാന്‍ പ്രേരിപ്പിക്കുന്നത്. കള്ളപ്പണത്തിനെതിരെ പൊരുതുന്ന കേന്ദ്രസര്‍ക്കാരിനൊപ്പം നില്‍ക്കുന്ന ബിജെപിയുടെ രാജ്യസഭാ എം.പി നികുതി വെട്ടിപ്പ് നടത്തിയത് വലിയ ചര്‍ച്ചയായിരുന്നു.

75ഉം 80തും ലക്ഷം വിലയുള്ള കാറുകള്‍ക്ക് 3,60,000 രൂപയുടെയും 16, 00,000 രൂപയുടെയും നികുതി വെട്ടിച്ചെന്നാണ് ക്രൈംബ്രാഞ്ച് കണ്ടെത്തല്‍. പോണ്ടിച്ചേരി എല്ലെപിള്ളൈ ചാവടിയിലെ കാര്‍ത്തിക അപ്പാര്‍ട്ട്‌മെന്റില്‍ താല്‍ക്കാലിക താമസക്കാരനാണെന്ന് കാണിച്ചാണ് നികുതി വെട്ടിച്ചതെന്നും ഈ വിലാസത്തില്‍ എല്‍.ഐ.സി പോളിസി നേടിയ ശേഷം അവിടെയുള്ള നോട്ടറിയെ കൊണ്ട് വ്യാജ സത്യവാങ്മൂലം സംഘടിപ്പിക്കുകയുമായിരുന്നെന്നും വ്യാജ സീല്‍പതിച്ചാണ് വാഹനം രജിസ്റ്റര്‍ ചെയ്തതെന്നും കുറ്റപത്രത്തില്‍ പറയുന്നു. റോഡ് ടാക്‌സ് കുറവുള്ള സംസ്ഥാനങ്ങളിലൊന്നാണ് കേരളം. വലിയ കാറുകള്‍ക്ക് എട്ട് ശതമാനം മാത്രമാണ് ടാക്‌സ് . 75 ലക്ഷത്തോളം വിലയുള്ള ഓഡി കാര്‍ പോണ്ടിച്ചേരിയില്‍ നിന്ന് വാങ്ങിയാല്‍ അഞ്ചര ലക്ഷം രൂപയോളം ടാക്‌സ് ഇനത്തില്‍ ലാഭിക്കാം. പോണ്ടിച്ചേരിയില്‍ രജിസ്റ്റര്‍ ചെയ്യണമെങ്കില്‍ തല്‍ക്കാലത്തേക്ക് ഒരു അഡ്രസ് വേണം. അത് ഡീലര്‍മാര്‍ സംഘടിപ്പിച്ച് നല്‍കും.

സമാനമായ കേസ് നടന്‍ ഫഹദ്ഫാസിലിനും നടി അമലാപോളിനും എതിരെ ക്രൈംബ്രാഞ്ച് എടുത്തിരുന്നു. ഇരുവരും പിഴ ഈടാക്കി കേസില്‍ നിന്ന് ഒഴിവാകുകയായിരുന്നു. പോണ്ടിച്ചേരിയില്‍ നികുതി കുറവായതിനാല്‍ അമല 1.25 ലക്ഷം മാ്ത്രമാണ് നികുതി അടച്ചത്. പോണ്ടിച്ചേരിയില്‍ വാഹനം രജിസ്റ്റര്‍ ചെയ്യണമെങ്കില്‍ അവിടെ സ്ഥിരം താമസക്കാരായിരിക്കണം എന്ന് നിര്‍ബന്ധമുണ്ട്. അത് സംഘിച്ചതിനെ തുടര്‍ന്നാണ് കേസ് എടുത്തത്. 1.12 കോടി വിലയുള്ള ബെന്‍സ് എസ് ക്ലാസാണ് അമലാ പോള്‍ വാങ്ങിയത്. ചെന്നൈയില്‍ നിന്നാണ് വാങ്ങിയതെങ്കിലും പോണ്ടിച്ചേരിയില്‍ രജിസ്റ്റര്‍ ചെയ്യുകയായിരുന്നു. കേരളത്തില്‍ രജിസ്റ്റര്‍ ചെയ്തിരുന്നെങ്കില്‍ 20 ലക്ഷം നികുതി അടയ്ക്കണമായിരുന്നു .