ആര്.എസ്.എസ് പദസഞ്ചലനം തടയാന് ശ്രമിച്ച 150തോളം സി.പി.എം, ഡിവൈഎഫ്ഐ പ്രവര്ത്തകര് ഒളിവില്, പ്രതികളെ പിടികൂടാതെ പൊലീസ് സംരക്ഷിക്കുകയാണെന്ന് ആര്.എസ്.എസ് കാഞ്ഞങ്ങാട് നേതൃത്വം
ആര്.എസ്.എസ് പദസഞ്ചലനം തടയാന് ശ്രമിച്ച 150തോളം സി.പി.എം, ഡിവൈഎഫ്ഐ പ്രവര്ത്തകര് ഒളിവില്. പ്രതികളെ പിടികൂടാതെ പൊലീസ് സംരക്ഷിക്കുകയാണെന്ന് ആര്.എസ്.എസ് കാഞ്ഞങ്ങാട് നേതൃത്വം. കാഞ്ഞങ്ങാട് പ്രാഥമിക ശിക്ഷാവര്ഗിന്റെ സമാപനത്തിന് നടത്തിയ പദസഞ്ചലനത്തിലേക്ക് സി.പി.എം പ്രവര്ത്തകര് മുദ്രാവാക്യം വിളികളുമായി എത്തി തടയാന് ശ്രമിക്കുകയായിരുന്നെന്ന് ദൃക്സാക്ഷികള് പറയുന്നു. ഇതോടെ സംഘര്ഷം ഉണ്ടാവുകയും പൊലീസ് ലാത്തി വീശുകയുമായിരുന്നു. അതോടെ ഇരുവിഭാഗവും തമ്മില് കല്ലെറിഞ്ഞു. കല്ലെറിഞ്ഞവരെ തുരത്താന് പൊലീസിന് കണ്ണീര്വാതകം പ്രയോഗിക്കേണ്ടിവന്നു. സംഭവത്തില് നിരവധി ആര്.എസ്.എസ് പ്രവര്ത്തകര്ക്കും പൊലീസിനും ചില സി.പി.എമ്മുകാര്ക്കും പരിക്ക് പറ്റി.
സംഭവം നടന്നിട്ട് മൂന്ന് ദിവസം പിന്നിട്ടിട്ടും പ്രതികളെ പിടികൂടാത്തത് സി.പി.എമ്മിന്റെ ഭരണസ്വാധീനം കൊണ്ടാണെന്ന് ആര്.എസ്.എസ് പ്രവര്ത്തകര് ആരോപിക്കുന്നു. പദസഞ്ചലനം തടസ്സപ്പെടുത്തുകയും അക്രമം നടത്തുകയും ചെയ്തതിനാണ് 150തോളം സി.പി.എം- ഡിവൈഎഫ്ഐ പ്രവര്ത്തകര്ക്കെതിരെ പൊലീസ് കേസ് എടുത്തത്. സി.പി.എം പ്രവര്ത്തകര് ആക്രമിച്ചതിന്റെ സി.സി.ടി.വി ദൃശ്യങ്ങള് കടകളില് നിന്നും മറ്റും ശേഖരിച്ച് ആര്.എസ്.എസ് പ്രവര്ത്തകര് പൊലീസിന് നല്കിയിട്ടുണ്ട്. അതേസമയം അനുമതിയില്ലാതെയാണ് പദസഞ്ചലനം നടത്തിയതെന്ന് പൊലീസ് പറയുന്നു. അതിനാല് 200റോളം ആര്.എസ്.എസ് പ്രവര്ത്തകര്ക്കെതിരെയും കേസ് എടുത്തിട്ടുണ്ട്. പൊലീസിനെ ആക്രമിച്ചതിന് സി.പി.എം ആര്.എസ്.എസ് പ്രവര്ത്തകരായ 50 പേര്ക്കെതിരെ കേസെടുത്തിട്ടുണ്ട്. കഴിഞ്ഞ ദിവസം വൈകിട്ടു നാലരയോടെ നീലേശ്വരം ബസ് സ്റ്റാന്ഡിനു സമീപത്താണ് നാടിനെ നടുക്കിയ സംഭവം അരങ്ങേറിയത്.
പദസഞ്ചലനം നീലേശ്വരം ബസ് സ്റ്റാന്ഡ് ഷെഡിന് മുന്നിലെത്തിയപ്പോഴാണ് ഒരു കൂട്ടം സി.പി.എം പ്രവര്ത്തകര് പെട്ടെന്ന് സംഘടിച്ച് മുദ്രാവാക്യം വിളിക്കുകയായിരുന്നു. അതോടെ പൊലീസ് സി.പി.എമ്മുകാര്ക്ക് നേരെ ലാത്തിവീശി. അതോടെയാണ് നാല്പാട് നിന്നും കല്ലേറുണ്ടായത്. അതിനാല് സംഭവം ആസൂത്രണം ചെയ്തതാണെന്ന് സംശയമുണ്ട്. കല്ലേറ് ശക്തമായതോടെ പൊലീസ് കണ്ണീര്വാതകം പ്രയോഗിക്കുകയായിരുന്നു. കേരള-കര്ണാടക അതിര്ത്തിയായ കാസര്കോട് സി.പി.എമ്മും ആര്.എസ്.എസും തമ്മില് വര്ഷങ്ങളായി തര്ക്കം നിലനില്ക്കുന്നുണ്ട്. ഇരുകൂട്ടരും തമ്മില് ഇടയ്ക്കിടെ സംഘര്ഷങ്ങള് ഉണ്ടാകാറുണ്ട്. എന്നാല് പൗരത്വനിയമഭേദഗതിക്കെതിരെ രാജ്യത്ത് പ്രതിഷേധങ്ങള് ശക്തമാവുകയും മംഗലാപുരത്ത് രണ്ട് പേര് വെടിയേറ്റ് മരിക്കുകയും ചെയ്ത സാഹചര്യത്തില് കാഞ്ഞങ്ങാട് നടന്ന സംഭവത്തെ കുറിച്ച് കേന്ദ്രരഹസ്യാന്വേഷണ വിഭാഗം റിപ്പോര്ട്ട് തേടിയതായി അറിയുന്നു.
സി.പി.എം ആക്രമണത്തില് ആര്എസ്എസ് പ്രവര്ത്തകരായ വാഴക്കോട്ടെ വി.അര്ജുന് (14), അശ്വിന് കൃഷ്ണന് (17), ചിത്താരി ചേറ്റുകുണ്ടിലെ രാഹുല് , കാഞ്ഞങ്ങാട് ഡിവൈഎസ്പി പി.കെ.സുധാകരന്, നീലേശ്വരം സിഐ എം.എ.മാത്യു, പൊലീസുകാരായ വിനോദ്, സുധീഷ്, വിപിന്, രതീഷ് എന്നിവര്ക്കും പരിക്കേറ്റിട്ടുണ്ട്. ഇവര് ചികിത്സതേടുകയും പലരും ആശുപത്രി വിടുകയും ചെയ്തു. ഇവരുടെ മൊഴികള് രേഖപ്പെടുത്തിയിട്ടുണ്ട്. പ്രതികളെ അറസ്റ്റ് ചെയ്യാതിരിക്കാനും അന്വേഷണം അട്ടിമറിക്കാനും വലിയ സമ്മര്ദ്ദമാണ് പൊലീസന് മേലുള്ളതെന്ന ആക്ഷേപം ശക്തമാണ്.
https://www.facebook.com/Malayalivartha
