ചെങ്ങന്നൂരിൽ സജി ചെറിയാനെ ജയിപ്പിച്ച ഓർത്തഡോക്സ് വിഭാഗത്തെ സർക്കാർ നാണം കെടുത്തി. മ്യതദേഹം സംസ്കരിക്കാൻ യാക്കോബായ സഭയുടെ ആവശ്യം കണക്കിലെടുത്ത് ഓർത്തഡോക്സ്നി സഭയ്ക്ക് എതിരെ നിയമ നിർമ്മാണം നടത്താൻ സർക്കാർ തീരുമാനിച്ചു.

സർക്കാരിനെ എല്ലാ കാലത്തും താങ്ങി നിർത്തിയ എസ് എൻ ഡി പിയെ പാടേ വിസ്മരിച്ചു കൊണ്ട് എൻ എസ് എസിന് വേണ്ടി സാമ്പത്തികമായി പിന്നാക്കം നിൽക്കുന്ന മുന്നാക്കകാർക്ക് സംവരണം നൽകാനും തീരുമാനിച്ചതു പോലെയാണ് ഇതും .

ഓർത്തഡോക്സ് സഭക്കും എസ് എൻ ഡി പിക്കും ഉണ്ടായത് അപരിഹാര്യമായ നഷ്ടം തന്നെയാണ്. അതേസമയം എൻ എസ് എസും യാക്കോബായ സഭയും സർക്കാരിന്റെ പോക്കറ്റിലായി. ചെന്നിത്തലയും ഉമ്മൻചാണ്ടിയും ചെയ്തു കൊടുക്കാത്ത സഹായമാണ് ഇത്.

സംസ്ഥാനത്ത് ക്രൈസ്തവ വിഭാഗങ്ങളില്‍ ഉള്ളവരുടെ മൃതദേഹം അടക്കം ചെയ്യുന്നതുമായി ബന്ധപ്പെട്ട ഓര്‍ഡിനന്‍സ് പുറപ്പെടുവിക്കുന്നതിന് ഗവര്‍ണറോട് ശുപാര്‍ശ ചെയ്യാന്‍ ബുധനാഴ്ച ചേര്‍ന്ന മന്ത്രിസഭായോഗമാണ് തീരുമാനിച്ചത്. സമീപകാലത്ത് മൃതദേഹം അടക്കം ചെയ്യുന്നതില്‍ കാലതാമസവും തര്‍ക്കങ്ങളും ഉടലെടുത്ത പശ്ചാത്തലത്തിലാണ് . ചില പള്ളികളും വിവിധ ഇടവകകളും ഇതുമായി ബന്ധപ്പെട്ട വിഷയം സര്‍ക്കാരിന്‍റെ ശ്രദ്ധയില്‍ കൊണ്ടുവന്നിരുന്നു. ചില പള്ളി അധികാരികള്‍ മൃതദേഹം അടക്കംചെയ്യാന്‍ വിസമ്മതിച്ചതുമൂലം ഉണ്ടായ പ്രശ്നങ്ങള്‍ നാം കണ്ടതാണ്. സര്‍ക്കാര്‍ ഇക്കാര്യത്തില്‍ പലവട്ടം ഇടപെട്ടിരുന്നു. ഒടുവില്‍ വിവിധ സഭകളുടെ അദ്ധ്യക്ഷന്‍മാരും ഈ പ്രശ്നത്തില്‍ ഒത്തുത്തീര്‍പ്പിന് ശ്രമിച്ചു. എന്നാല്‍ ഒരു വിഭാഗം ഇതിനോടൊന്നും സഹകരിച്ചില്ല. ഈ സാഹചര്യത്തിലാണ് നിയമനിര്‍മാണത്തിന് തീരുമാനിച്ചതെന്ന് സർക്കാർ പറയുന്നു. തീരുമാനം യാക്കോബായക്ക് വേണ്ടി മാത്രമാണെന്ന് വ്യക്തം.

സുപ്രീം കോടതി കേസിലും യാക്കോബായ സഭക്ക് വേണ്ടിയാണ് പിണറായി സർക്കാർ നിലകൊണ്ടത്. ഇത് സുപ്രീം കോടതിയുടെ വിമർശനങ്ങൾക്ക് പോലും ഇടയാക്കി.

ഓര്‍ഡിനന്‍സ് അനുസരിച്ച് ഇടവകയിലെ ഏതംഗം മരിച്ചാലും കുടുംബാംഗങ്ങള്‍ക്ക് ആ ഇടവകയുടെ പള്ളി സെമിത്തേരിയില്‍ മൃതദേഹം അടക്കം ചെയ്യാന്‍ അവകാശം ലഭിക്കും. മരണമടഞ്ഞ ഇടവക അംഗത്തിന്‍റെ ബന്ധുക്കള്‍ക്ക് മരണാനന്തര ചടങ്ങുകള്‍ ആ ഇടവകപള്ളി സെമിത്തേരിയില്‍ വേണ്ടെന്നു വെയ്ക്കാനും അവര്‍ക്കു താല്‍പര്യമുള്ള പുരോഹിതനെ കൊണ്ട് അവര്‍ തെരഞ്ഞെടുക്കുന്ന മറ്റു സ്ഥലങ്ങളില്‍ മരണാനന്തര ചടങ്ങുകള്‍ നടത്താനും അവകാശമുണ്ടാകും.

അതായത് യാക്കോബായ സഭയുടെ പള്ളികളുടെ ഭരണചുമതല സുപ്രീം കോടതി ഉത്തരവ് പ്രകാരം ഓർത്തഡോക്സ് സഭക്കാണ് ലഭിച്ചിരിക്കുന്നത്. യാക്കോബായ സഭാംഗമോ ബന്ധുവോ മരിച്ചാൽ അവരുടെ പള്ളി സെമിത്തേരിയിൽ സംസ്കരിക്കാൻ ഓർത്തഡോക്സ് സഭ സമ്മതിച്ചിരുന്നില്ല. ഇതിനെതിരെ യാക്കോബായ സഭ സുപ്രീം കോടതിയെ സമീപിച്ചിട്ടും ഫലം ഉണ്ടായില്ല. ഈ പശ്‌ചാത്തലത്തിലാണ് സർക്കാർ നിയമനിർമ്മാണം നടത്തുന്നത്. ഇനി ഓർത്തഡോക്സ് പള്ളി സെമിത്തേരിയിൽ യാക്കോബായ സഭാ പുരോഹിതർക്ക് പ്രാർത്ഥന നടത്താം. തീരുമാനം ഓർത്തഡോക്സിന് ഏറ്റ കനത്ത തിരിച്ചടിയാണ്. സംസ്ഥാനത്തിൽ എണ്ണത്തിൽ കൂടുതൽ യാക്കോബായക്കാരാണ്. തെരഞ്ഞടുപ്പാണ് പിണറായിയുടെ ലക്ഷ്യം.