ഇക്കഴിഞ്ഞ ദിവസം പാലക്കാടിനടുത്ത് അണിക്കോട് കടമ്പിടിക്കു സമീപം ഇളനീര്‍ വാങ്ങാന്‍ സ്‌കൂട്ടറിലെത്തിയ തത്തമംഗലം സ്വദേശി സിന്ധുവിന്റെ ബാഗും സ്വര്‍ണവും മോഷ്ടിച്ച സംഭവത്തില്‍ പൊലീസുകാരനടക്കം പ്രതിയാകാന്‍ ഇടയാക്കിയത് ഒന്നാം പ്രതി തറക്കളം സി.പ്രദീഷ് പറഞ്ഞ നുണ.

ബാഗ് സ്‌കൂട്ടറില്‍ തൂക്കിയിട്ട ശേഷം ഇളനീര്‍ വാങ്ങുന്നതിനിടെയാണ് ബാഗ് നഷ്ടപ്പെട്ടത്. ഈ സമയം സ്ഥലത്തുണ്ടായിരുന്ന ആഡംബര കാറിന്റെ നമ്പര്‍ കേന്ദ്രീകരിച്ചു നടത്തിയ അന്വേഷണത്തില്‍ അമ്പാട്ടുപാളയത്തു വച്ച് വാഹനമുള്‍പ്പെടെ പ്രതികളെ കസ്റ്റഡിയിലെടുത്തു. ഇരുവരെയും ചോദ്യം ചെയ്‌തെങ്കിലും കുറ്റം സമ്മതിച്ചില്ല.

അതിനാല്‍ ദേഹപരിശോധന നടത്തി. അപ്പോള്‍ പ്രദീഷിന്റെ കയ്യില്‍ നിന്ന് 10,000 രൂപ കണ്ടെടുത്തു. എന്നാല്‍ തന്റെ മകളുടെ സ്വര്‍ണ ലോക്കറ്റ് പണയംവച്ച പണമാണ് കയ്യിലുള്ളതെന്ന് പ്രദീഷ് പറഞ്ഞു. പോലീസ് ഉടന്‍ പ്രദീഷിന്റെ ഭാര്യയുമായി ഫോണില്‍ ബന്ധപ്പെട്ടു. പൊലീസ് വിളിച്ച് അന്വേഷിച്ചപ്പോള്‍ അങ്ങനൊരു സ്വര്‍ണ ലോക്കറ്റിനെക്കുറിച്ച് അറിയില്ലെന്നായിരുന്നു മറുപടി. തുടര്‍ന്നുള്ള ചോദ്യം ചെയ്യലിലാണ് തട്ടിയെടുത്ത ബാഗിലുണ്ടായിരുന്ന സ്വര്‍ണം ചിറ്റൂരിലെ സ്വര്‍ണക്കടയില്‍ വിറ്റുകിട്ടിയ പണമാണതെന്ന് സമ്മതിച്ചത്.

പരാതിക്കാരിയായ സിന്ധു, ജ്വല്ലറിയില്‍ നിന്നു കണ്ടെടുത്ത സ്വര്‍ണ ലോക്കറ്റ് തന്റേത് തന്നെയാണെന്ന് തിരിച്ചറിഞ്ഞിട്ടുണ്ടെന്നും പൊലീസ് പറഞ്ഞു. എന്നാല്‍ നഷ്ടപ്പെട്ട ബാഗും അതിലുണ്ടായിരുന്നെന്നു പറയുന്ന 10,000 രൂപയും ഇനിയും കണ്ടെത്താനായിട്ടില്ല. പ്രതികള്‍ ഉപയോഗിച്ചിരുന്ന വാഹനം പൊലീസുകാരന്‍ മുഹമ്മദ് ബൂസരിയുടെ അച്ഛന്റെ പേരിലുള്ളതാണെന്നും പൊലീസ് പറഞ്ഞു.