കേരളസംസ്ഥാനത്തെ പാർട്ടി ഗ്രാമമാക്കാൻ ഗവർണർ അനുവദിക്കില്ല. കേരള ഗവർണർക്കെതിരെ സി പി എം രംഗത്തെത്തിയതോടെ മുഖ്യമന്ത്രി പിണറായി വിജയനെ വിളിച്ചു വരുത്താൻ ഗവർണർ ആലോചിക്കുന്നു . എന്നാൽ മുഖ്യമന്ത്രി ഗവർണർക്കെതിരെ യാതൊന്നും പറഞ്ഞിട്ടില്ല എന്നതാണ് രാജ്ഭവനെ അലട്ടുന്ന പ്രധാന തടസം.

സി പി എമ്മിനെതിരെ നിലപാട് കടുപ്പിക്കാൻ തന്നെയാണ് ഗവർണറുടെ തീരുമാനം. ആരിഫ് മുഹമ്മദ് ഖാനെ ബിജെപി സംസ്ഥാന അധ്യക്ഷനാക്കണമെന്ന സി പി എം സംസ്ഥാന കമ്മിറ്റിയുടെ പ്രസ്താവനയുടെ കൂടുതൽ വിശദാംശങ്ങൾ രാജ്ഭവൻ വാങ്ങി കഴിഞ്ഞു. വൈകാതെ ഇതിന്റെ മറുപടി കേരളം അറിയും. തന്നെ വിമർശിക്കുന്നവർ ആദ്യം ഭരണഘടന വായിക്കട്ടെ എന്നാണ് ഗവർണറുടെ സൗമ്യമായ പ്രതികരണം.

ഗവർണർ സകല പരിധിയും ലംഘിക്കുകയാണെന്നാണ് സി പി എം വിമർശനം. ഗവർണർ ബി ജെ പി സംസ്ഥാന അധ്യക്ഷൻ കളിക്കുകയാണെന്ന അസാധാരണമായ പരാമർശം ഗവർണർക്കെതിരെ നടത്തി. നിയമലംഘനം നടന്നാൽ ചോദ്യം ചെയ്യുമെന്ന് ഗവർണർ തിരിച്ചടിച്ചു. കേന്ദ്രത്തിന്റെ അധികാരപരിധിയിൽ വരുന്നതാണ് പൗരത്വം. അതിനിടെ പിണറായി വിജയനെതിരെ നൽകിയ അവകാശ ലംഘന നോട്ടീസ് പാർലെമെന്റ് പരിഗണിക്കും.

യു ഡി എഫും ഗവർണർക്കെതിരെ രംഗത്തെത്തി. ഗവർണർക്കെതിരെ നിലപാടുമായി മുഖ്യമന്ത്രി രാജ്ഭവനിൽ ചെന്ന് ഗവർണറെ കാണണമെന്ന് യു ഡി എഫ് യോഗം അവശ്യപ്പെട്ടു. അതിന് മുഖ്യമന്ത്രി തയ്യാറാകുമോ എന്ന് ഉറപ്പില്ല.

കേരളത്തെ യുഡി എഫിന്റെ സഹായത്തോടെ പാർട്ടി ഗ്രാമമാക്കാനാണ് സി പി എം ശ്രമിക്കുന്നത്. കണ്ണൂരിൽ ഇത്തരം പാർട്ടി ഗ്രാമങ്ങൾ നിരവധിയുണ്ട്. രമേശ് ചെന്നിത്തലയെ കൈയിലെടുത്തു കൊണ്ടാണ് സർക്കാർ സി പിഎം ഗ്രാമമാക്കി കേരളത്തെ മാറ്റാൻ ശ്രമിക്കുന്നത്. യു ഡി എഫിന്റെ പിന്തുണ സി പി എമ്മിനാണ്. മുസ്ലീം ലീഗാണ് ഇതിന് തുടക്കം കുറിച്ചത്. രാജ്യത്തും സംസ്ഥാനത്തും കോൺഗ്രസ് ദുർബലമായെന്ന് മനസിലാക്കിയപ്പോഴാണ് സി പി എമ്മിന്റെ പിന്തുണ ലീഗ് നേടിയത്. പിണറായിയും കുഞ്ഞാലിക്കുട്ടിയും തമ്മിലുള്ള സ്നേഹബന്ധമാണ് അവർ തമ്മിലുള്ള സൗഹൃദം ദൃഢതരമാക്കിയത്.

സി പി എം നേതാക്കളെക്കാൾ വീറോടെയാണ് കോൺഗ്രസ് നേതാക്കൾ ഗവർണർക്കെതിരെ രംഗത്തെത്തുന്നത്. ലീഗാണ് യു ഡി എഫിലെ പ്രധാന കക്ഷി. ലീഗ് പറയുന്നതിന് മറുപടി പറയാനുള്ള കഴിവു പോലും കോൺഗ്രസിന് നഷ്ടമായി. കേരള കോൺഗ്രസുകൾ ഉൾപ്പെടെയുള്ളവർ ലീഗിന് പിന്തുണ നൽകും. അവർക്ക് കോൺഗ്രസ്സിനെ വിശ്വാസമില്ല. സ്വന്തം മുന്നണിയിലുള്ളവർക്ക് പോലും വിശ്വാസമില്ലാത്ത സംഘടനയായി കോൺഗ്രസ് മാറിയിരിക്കുന്നു.

കേരളം കണ്ട ഏറ്റവും കരുത്തനായ മുഖ്യമന്ത്രിയായി മാറിയിരിക്കുകയാണ് പിണറായി വിജയൻ. ആദ്യം സ്വന്തം മുന്നണിയിലെ സി പി ഐയെ നിലയ്ക്ക് നിർത്തിയതോടെ അദ്ദേഹത്തിന്റെ പ്രഭാവം കേരളം മനസിലാക്കിയതാണ്. ഓരോരുത്തരയായി അദ്ദേഹം ഒതുക്കി. ഇപ്പോഴിതാ കോൺഗ്രസിനെയും ഒതുക്കിയിരിക്കുന്നു. പക്ഷേ ഒതുക്കാനാവാത്തത് ഗവർണറെ മാത്രമാണ്.