നെടുമ്പാശ്ശേരി വിമാനത്താവളത്തിൽ സ്വർണ്ണം കടത്താൻ പ്രയോഗിച്ചത് മാരക തന്ത്രങ്ങൾ. കഴിഞ്ഞ വർഷം നടത്തിയ റെക്കോർഡ് സ്വർണ്ണ വേട്ടയിലാണ് അമ്പരപ്പിക്കുന്ന സൂത്രങ്ങൾ കണ്ടെത്തിയത്. 45.26 കോടി രൂപ വിലമതിക്കുന്ന 131 കിലോ സ്വർണ്ണമാണ് എയർ കസ്റ്റംസ് ഇന്‍റലിജൻസ് കഴിഞ്ഞ വർഷം പിടികൂടിയത്. ആകെ രജിസ്റ്റർ ചെയ്തത് 367 കള്ളക്കടത്ത് കേസുകളില്‍ 67 കോടി രൂപ മൂല്യമുള്ള ഉല്‍പന്നങ്ങളാണ് കസ്റ്റംസ് പിടിച്ചെടുത്തത്. നെടുമ്പാശ്ശേരി വിമാനത്താവളം വഴി കള്ളക്കടത്തിടപാടിലൂടെ കഴിഞ്ഞ വർഷം കൊണ്ടുവന്ന സ്വർണ്ണമടക്കമുള്ളവയുടെ കണക്കുകൾ എയർ കസ്റ്റംസ് ഇന്‍റലിജൻസ് പുറത്തുവിട്ടിരുന്നു.

ബിസ്കറ്റുകളാക്കിയും മിശ്രിതമാക്കിയും കളിപ്പാട്ടം, മിക്സി അടക്കം വിവിധ വസ്തുക്കളില്‍ ഒളിപ്പിച്ചും, ശരീരത്തില്‍ കെട്ടിവെച്ചുമൊക്കെയാണ് സ്വർണ്ണം കടത്താൻ ശ്രമിച്ചത്.45 കോടി 26 ലക്ഷം രൂപയുടെ മൂല്യം ഇതിനുണ്ടെന്ന് ഉദ്യോഗസ്ഥർ വെളിപ്പെടുത്തി. സ്വർണ്ണം കൂടാതെ നാലരക്കിലോ ഹാഷിഷും കണ്ടെത്തിയിയുന്നു. 4 കോടി 87 ലക്ഷം രൂപയുടെ മൂല്യം ഇതിനുണ്ട് എന്നാണ് പോലീസ് പറയുന്നത്. 61 ലക്ഷം രൂപയുടെ 1560 കാർട്ടണ്‍ വിദേശ സിഗരറ്റുകളും പിടിച്ചെടുത്തവയില്‍ ഉള്‍പ്പെടുന്നു.