ആര്‍സിസിയില്‍ അര്‍ബുദ ചികില്‍സയ്ക്കായി തൊലി മാറ്റിവച്ചതിനെതുടര്‍ന്നു വായ്ക്കുള്ളില്‍ രോമ൦ വളര്‍ന്ന സംഭവത്തിലെ വീഴ്ച അന്വേഷിക്കാന്‍ ആരോഗ്യമന്ത്രി കെ.കെ ശൈലജയുടെ നിര്‍ദേശം..റീജനൽ കാൻസർ സെന്റർ അധികൃതരോട് വിശദമായ റിപ്പോർട്ട് ആവശ്യപ്പെട്ടിട്ടുണ്ട്

ഒരു വറ്റ് ഭക്ഷിക്കാനാകാതെ ഒരിറക്ക് വെള്ളം കുടിക്കാനാകാതെ വായില്‍ നിറയെ രോമവുമായി അവശനിലയിൽ കഴിയുകയാണ് വെള്ളറട സ്വദേശി സ്റ്റീഫൻ . ഇദ്ദേഹത്തിന് വേണ്ട സഹായം നല്‍കുമെന്ന് ഇന്ത്യന്‍ മെഡിക്കല്‍ അസോസിയേഷനും വ്യക്തമാക്കിയിട്ടുണ്ട് .

വായ്ക്കുള്ളിലെ അർബുദ മുഴ നീക്കം ചെയ്തശേഷം മാംസം വച്ചുപിടിച്ചിതിനെത്തുടർന്നാണ് രോമ വളർച്ച ഉണ്ടാകാൻ തുടങ്ങിയത്.. കഴിഞ്ഞ വര്‍ഷം ജൂലൈ ഒമ്പതിനായിരുന്നു ശസ്ത്രക്രിയ. കീഴ്ത്താടിയിൽ നിന്ന് ചര്‍മ്മം എടുത്ത് വായിൽ തുന്നിച്ചേര്‍ക്കുകയായിരുന്നു. ഇതിനു പിന്നാലെയാണ് വായിൽ രോമ വളര്‍ച്ച അനുഭവപ്പെട്ടത്. പിന്നീട് രോമം വായിൽ മുഴുവൻ വ്യാപിച്ചു. ഉമിനീര് ഇറക്കാൻ പോലും സാധിക്കാത്ത സാഹചര്യമാണെന്ന് സ്റ്റീഫൻ പറയുന്നു.

അർബുദം നീക്കം ചെയ്ത ഭാഗത്തു താടിയെല്ലിനു താഴെയുള്ള മാംസം വച്ചുപിടിപ്പിക്കുമ്പോൾ രോമ വളർച്ച ഉണ്ടാകാറുണ്ടെന്ന് ആർസിസിയിലെ ഡോക്ടർമാർ പറഞ്ഞു . സ്റ്റീഫന്റെ മൂക്കിനെയും തൊണ്ടയെയും വേർതിരിക്കുന്ന അണ്ണാക്കിലാണു 4 സെന്റീമീറ്റർ വലുപ്പമുള്ള അർബുദ മുഴ കണ്ടെത്തിയത്.

മുഴ നീക്കം ചെയ്യുമ്പോൾ വെള്ളവും ഭക്ഷണവും മൂക്കിലൂടെ പുറത്തുവരാൻ സാധ്യത ഉണ്ട്. ഇത്തരം സംഭവങ്ങളിൽ ഡെന്റൽ കോളജിൽ പ്ലേറ്റ് പോലുള്ള സാധനം ഘടിപ്പിക്കും. എന്നാൽ ഇതിനിടയിലൂടെ വെള്ളം മൂക്കിലേക്കു വരാറുണ്ട്.

അതിനാലാണു മാംസം വച്ചുപിടിപ്പിക്കാൻ ഡോക്ടർ തീരുമാനിച്ചത്.ചില മാധ്യമങ്ങളിൽ വന്നതുപോലെ തുടയെല്ലിലെ മാസം ഇതിനായി ഉപയോഗിക്കാറില്ല. താടിയെല്ലിനു താഴെയുള്ള മാസമാണു പൊതുവേ ശസ്ത്രക്രിയയ്ക്ക് ഉപയോഗിക്കുന്നത്.

ഇത്തരത്തിൽ 200ലേറെ ശസ്ത്രക്രിയകൾ ആർസിസിയിൽ ചെയ്തിട്ടുണ്ട്. രോമ വളർച്ച സ്വാഭാവികമാണ്. അതു മുറിച്ചു മാറ്റുക മാത്രമേ പ്രതിവിധി ആയുള്ളൂ . സാധാരണഗതിയിൽ 2 വർഷം കഴിഞ്ഞാണു രോമ വളർച്ച ഇല്ലാതാകുന്നത്. സ്റ്റീഫന്റെ അത്രയും രോമ വളർച്ച ഉണ്ടാകുന്നവർ കുറവ് ആണ് . ലേസർ ചികിത്സയിലൂടെ രോമ വളർച്ച ഒഴിവാക്കാം.

സംഭവത്തെ കുറിച്ച് ആരോഗ്യ വിദഗ്ധരുടെ അഭിപ്രായം ഇങ്ങനെയായിരുന്നു .. രോമ വളർച്ച ഉണ്ടാകുമെന്ന് അറിയാവുന്നതിനാൽ ഡോക്ടർമാർ സ്റ്റീഫനെ കൗൺസലിങ്ങിനു വിധേയമാക്കേണ്ടതായിരുന്നു. എന്തൊക്കെ ചെയ്യണമെന്ന് അദ്ദേഹത്തെയും ബന്ധുക്കളെയും ബോധ്യപ്പെടുത്താൻ ആശുപത്രി അധികൃതർക്കു സാധിച്ചില്ല. സാധാരണക്കാരനായ രോഗിയെ ആ നിലയിൽ ബോധവൽകരിക്കണം. ലേസർ ചികിത്സയെക്കുറിച്ച് അദ്ദേഹത്തിനോ ബന്ധുക്കൾക്കോ അറിയില്ല. അവയെല്ലാം ബോധ്യപ്പെടുത്തിയിരുന്നെങ്കിൽ സ്റ്റീഫൻ ഇത്രയേറെ മാനസിക വിഷമത്തിൽ അകപ്പെടില്ലായിരുന്നു.

ഏതായാലും കാൻസർ എന്ന മഹാ ദുരന്തത്തിന്റെ ചികിത്സ അതിനേക്കാളേറെ ദുരിതമാണ് സ്റ്റീഫന് നൽകിയത് ..വായിൽ രോമം വളര്‍ന്ന് കുടിവെള്ളം പോലും ഇറക്കാൻ സാധിക്കാതെ ദുരിത ജീവിതം നയിക്കുകയാണ് സ്റ്റീഫൻ..