ഒരുകാലത്ത് മലയാളത്തില്‍ നിറഞ്ഞു നിന്ന താരമാണ് സുരേഷ് ഗോപി. തന്റേതായ അഭിന ശൈലിയിലൂടെ സൂപ്പര്‍സ്റ്റാര്‍ പദവിയില്‍ പോലും എത്താന്‍ സുരേഷ് ഗോപിക്കായി. എന്നാല്‍ പലരും എഴുതിത്തള്ളി സുരേഷ് ഗോപിയെ മാറ്റി നിര്‍ത്തിയപ്പോള്‍ രാഷ്ട്രീയത്തിലായി നോട്ടം. നരേന്ദ്ര മോദിയുടെ മനസിലിടം പിടിച്ച് എം.പി.യായി. അവസാനം തൃശൂര്‍ ലോക്‌സഭാ തെരഞ്ഞെടുപ്പോടെ വലിയ കൈയ്യടി നേടി. എതിരാളികളുടെ കടുത്ത എതിര്‍പ്പിനും പാത്രമായി. ഇതിനിടയ്ക്കാണ് വരനെ ആവശ്യമുണ്ട് സിനിമ വന്നത്. രാഷ്ട്രീയക്കാരനായ സുരേഷ് ഗോപിയുടെ സിനിമ ജനങ്ങള്‍ ഏറ്റെടുക്കുമോ എന്ന് സംശയമുണ്ടായി. എന്നാല്‍ എല്ലാ സംശയങ്ങളേയും അസ്ഥാനത്തിലാക്കിയിരിക്കുകയാണ്. വന്‍ വിജയത്തോടെ ചിത്രം മുന്നേറുകയാണ്.

കുടുംബ പ്രേക്ഷകരെ ലക്ഷ്യംവച്ച് ഒരുക്കിയ ചിത്രമാണ് വരനെ ആവശ്യമുണ്ട്. പേരുപോലെ തന്നെ മനോഹരമായ ചിത്രം. മാത്രമല്ല മലയാള സിനിമയിലെ രണ്ട് തലമുറകളുടെ സംഗമം കൂടിയാണ് ഈ ചിത്രം. കുടുംബചിത്രങ്ങള്‍ കൊണ്ട് മലയാളികളുടെ പ്രിയങ്കരനായ സംവിധായകന്‍ സത്യന്‍ അന്തിക്കാടിന്റെ മകന്‍ അനൂപ് സത്യന് ആണ് ഈ ചിത്രം ഒരുക്കിയിരിക്കുന്നത്. ആദ്യ ചിത്രം കൊണ്ടു തന്നെ അച്ഛന്റെ ചിത്രങ്ങളോടുള്ള മലയാളിയുടെ വിശ്വാസം കാത്തു സൂക്ഷിക്കാനും പുതിയ തലമുറയിലെ മികച്ച സംവിധായകരുടെ ഒപ്പമാണ് തന്റെ സ്ഥാനമെന്നും അനൂപ് തെളിയിച്ചിരിക്കുന്നു. കാരണം സത്യന്റെ പഴയ ചിത്രങ്ങളുടെ ഒരു ന്യൂജനറേഷന്‍ പതിപ്പാണ് പ്രതീക്ഷകള്‍ തെറ്റിക്കാതെ കുടുംബ പ്രേക്ഷകരെ പൂര്‍ണമായും തൃപ്തിപ്പെടുത്തുന്ന ഈ ലളിത സുന്ദര ചിത്രം.

ദീര്‍ഘനാളുകള്‍ക്കുശേഷം സുരേഷ് ഗോപിയും ശോഭനയും തിരികെ എത്തിയ ചിത്രം. കല്യാണി പ്രിയദര്‍ശന്റെ ആദ്യ മലയാള ചിത്രം. എന്നിങ്ങനെ പ്രത്യേകതകള്‍ ഏറെയാണ് ഈ കൊച്ചു ചിത്രത്തിന്. ദുല്‍ഖര്‍ നായകനെങ്കിലും ഒരുപിടി മുന്നില്‍ നില്‍ക്കുന്നത് സുരേഷ് ഗോപിയുടെ കഥാപാത്രം തന്നെയാണ്. നായകന് പുറമെ നിര്‍മാതാവിന്റെ കുപ്പായവും ദുല്‍ഖര്‍ വരനെ ആവശ്യമുണ്ട് എന്ന ചിത്രത്തിനായി അണിഞ്ഞിട്ടുണ്ട്. അനൂപ് സത്യന്‍ തന്നെയാണ് ചിത്രത്തിന്റെ രചന.

സുരേഷ് ഗോപിയും ശോഭനയുമാണ് ചിത്രത്തിലെ മുഖ്യ കഥാപാത്രങ്ങള്‍ എങ്കിലും ദുല്‍ഖറിന്റെയും കല്യാണിയുടെയും സാന്നിധ്യവും ചിത്രത്തെ സജീവമാക്കുന്നു. ചെന്നൈയിലെ ഒരു അപ്പാര്‍ട്ട്‌മെന്റില്‍ താമസിക്കുന്ന മൂന്ന് മലയാളി കുടുംബങ്ങളുടെ ജീവിതമാണ് ചിത്രം പറയുന്നത്. മേജര്‍ ഉണ്ണികൃഷ്ണനായി സുരേഷ് ഗോപിയും നീനയായി ശോഭനയും തകര്‍ത്ത് അഭിനയിച്ചപ്പോള്‍ നികിതയായി കല്യാണി പ്രിയദര്‍ശന്‍ തന്റെ ആദ്യ മലയാള സിനിമ ഗംഭീരമാക്കി. ദുല്‍ഖറിന്റെ ബിബീഷ് എന്ന കഥാപാത്രവും മികച്ചതായി.

ഫ്രഞ്ച് സ്‌പോക്കണ്‍ സ്‌കൂളില്‍ അധ്യാപികയാണ് നീന. മകള്‍ നികിത ബാങ്കിലെ ജോലിക്കാരിയാണ്. തന്റെ പ്രണയവിവാഹം തകര്‍ന്നതോടെ മകളെ അറേഞ്ച്ഡ് വിവാഹം ചെയ്യിക്കാനാണ് നീനയുടെ പദ്ധതി. പ്രണയ വിവാഹത്തില്‍ വിശ്വസിക്കാത്ത നിക്കി എന്ന് വിളിപ്പേരുള്ള നിഖിത തനിക്ക് ഒരു വരനെ കണ്ടെത്താന്‍ ശ്രമിക്കുന്നു. അവള്‍ക്കു അതിന് തന്റേതായ കാരണങ്ങള്‍ ഉണ്ടായിരുന്നു. അമ്മയുടെ തകര്‍ന്ന ദാമ്പത്യജീവിതം കണ്ട് വളര്‍ന്ന നികിത അങ്ങനെ ചിന്തിച്ചതില്‍ അത്ഭുതില്ല.

നീനയും മകളും കഴിയുന്ന അപ്പാര്‍ട്ട്‌മെന്റിലേക്ക് ബിബീഷും അനുജനും പ്രായമായ ഒരു സ്ത്രീയും താമസത്തിനെത്തുന്നു. ഈ സമയം തന്നെയാണ് പട്ടാളത്തില്‍ നിന്നും വിരമിച്ച മേജര്‍ ഉണ്ണികൃഷ്ണനും ഇവിടെ താമസത്തിന് എത്തുന്നത്. തുടര്‍ന്ന് ഇവര്‍ക്കിടയില്‍ രൂപപ്പെടുന്ന സൗഹൃദവും ബന്ധങ്ങളും ഇവരുടെ പഴയകാല ജീവിതങ്ങളുമാണ് ചിത്രത്തെ മുന്നോട്ട് നയിക്കുന്നത്. ഗൗരവമുള്ള വിഷയമാണെങ്കിലും നര്‍മ്മത്തില്‍ പൊതിഞ്ഞാണ് ചിത്രം അവതരിപ്പിച്ചിരിക്കുന്നത്. സുരേഷ് ഗോപി പഴയ ചിത്രങ്ങളിലെ മാനറിസങ്ങള്‍ നര്‍മത്തിനു വേണ്ടി അവസരോചിതമായി ചിത്രത്തില്‍ ഉള്‍പ്പെടുത്തിയിട്ടുണ്ട്.

മേജര്‍ ഒക്കെ ആയിരുന്നു എങ്കിലും സ്ത്രീകളോട് സംസാരിക്കുമ്പോള്‍ ഇപ്പോഴും ഉണ്ണികൃഷ്ണന്റെ മുട്ടിടിക്കും. സ്‌റ്റേജില്‍ കയറാന്‍ ഭയം. ഉള്ളിലെ പ്രണയം പുറത്ത് പറയാനോ പ്രകടപ്പിക്കാനോ ആകാതെ വീര്‍പ്പുമുട്ടി ജീവിക്കുന്ന പച്ചയായ മനുഷ്യന്‍. ഇതെല്ലാം അതിമനോഹരമായി സുരേഷ് ഗോപി അഭിനയിച്ച് ഫലിപ്പിച്ചത്. തന്റെ കുടുംബത്തില്‍ സംഭവിച്ച വളരെ വലിയ ഒരു മുറിവ് ആരെയും അറിയിക്കാതെ ഉള്ളില്‍ ഒതുക്കി ഹാപ്പിയായി ജീവിക്കുന്നയാളാണ് ദുല്‍ഖര്‍ അവതരിപ്പിച്ച ബിബീഷ്. ഫ്രോഡ് എന്നാണ് അടുപ്പമുള്ളവര്‍ ബിബീഷിനെ വിളിക്കുന്നത്. ഛായാഗ്രഹകന്‍ സന്തോഷ് ശിവന്റെ മകന്‍ സര്‍വജിത്താണ് ദുല്‍ഖറിന്റെ സഹോദരന്റെ വേഷം ചെയ്തിരിക്കുന്നത്.

സ്‌നേഹനിധിയായ അമ്മയായും എന്നാല്‍ ഇപ്പോഴും ഒരു പ്രണയിനിയുടെ മനസ്സ് കാത്തു സൂക്ഷിക്കുന്നവളായുമുള്ള ശോഭനയുടെ പ്രകടനം മികച്ചതാണ്. ഉര്‍വശി കുറച്ചു സീനുകളില്‍ മാത്രമേ ഉള്ളുവെങ്കിലും തകര്‍പ്പന്‍ പെര്‍ഫോമന്‍സിലൂടെ പ്രേക്ഷകരെ ഞെട്ടിച്ചു. ആകാശവാണി എന്ന് വിളിപ്പേരുള്ള കഥാപാത്രമായി കെ പി എ സി ലളിത മികച്ചുനില്‍കുന്നു. സുരേഷ് ഗോപിയെ സംബന്ധിച്ച് ഇത് വളരെ ആശ്വാസമാണ്. ഇനി സിനിമയില്‍ സുരേഷ് ഗോപിയുടെ മറ്റൊരു മുഖം കാണാം.