ലൈഫ് മിഷന്‍ പദ്ധതിയില്‍ രണ്ടു ലക്ഷം വീടുകള്‍ പൂര്‍ത്തിയായതിന്റെ സംസ്ഥാനതല പ്രഖ്യാപനം ഫെബ്രുവരി 29ന് തിരുവനന്തപുരം പുത്തരിക്കണ്ടം മൈതാനത്ത് മുഖ്യമന്ത്രി പിണറായി വിജയന്‍
ലൈഫ് മിഷന്‍ പദ്ധതിയില്‍ രണ്ടു ലക്ഷം വീടുകള്‍ പൂര്‍ത്തിയായതിന്റെ സംസ്ഥാനതല പ്രഖ്യാപനം ഫെബ്രുവരി 29ന് തിരുവനന്തപുരം പുത്തരിക്കണ്ടം മൈതാനത്ത് മുഖ്യമന്ത്രി പിണറായി വിജയന്‍ നിര്‍വഹിക്കും. ഇതോടൊപ്പം തിരുവനന്തപുരം ജില്ലയിലെ ലൈഫ് ഗുണഭോക്താക്കളുടെ സംഗമവും സംഘടിപ്പിക്കും. സംസ്ഥാനതല പരിപാടി സംഘടിപ്പിക്കുന്നതുമായി ബന്ധപ്പെട്ട് തദ്ദേശസ്വയംഭരണ മന്ത്രി എ. സി. മൊയ്തീന്റെ അധ്യക്ഷതയില്‍ യോഗം ചേര്‍ന്നു. ടൂറിസം സഹകരണ മന്ത്രി കടകംപള്ളി സുരേന്ദ്രന്‍ സന്നിഹിതനായിരുന്നു. കേരള ചരിത്രത്തിലെ ഏറ്റവും വലിയ മുന്നേറ്റമാണ് ലൈഫ് പദ്ധതിയിലൂടെ സാധ്യമാകുന്നതെന്ന് മന്ത്രി എ.സി.മൊയ്തീന്‍ അഭിപ്രായപ്പെട്ടു.
തിരുവനന്തപുരം ജില്ലയില്‍ 37693 ലൈഫ് ഗുണഭോക്താക്കളാണുള്ളത്. മുഴുവന്‍ പേരേയും സംഗമത്തില്‍ പങ്കെടുപ്പിക്കാന്‍ യോഗത്തില്‍ തീരുമാനമായി. മുഖ്യമന്ത്രി പിണറായി വിജയന്‍ മുഖ്യ രക്ഷാധികാരിയായും ടൂറിസം മന്ത്രി കടകംപള്ളി സുരേന്ദ്രന്‍ ചെയര്‍മാനായും ജില്ലാ പഞ്ചായത്ത് പ്രസിഡന്റ് വി.കെ.മധു ജനറല്‍ കണ്‍വീനറായും ലൈഫ് മിഷന്‍ സി.ഇ.ഒ യു.വി.ജോസ് കണ്‍വീനറായി ജനറല്‍ കമ്മിറ്റിയും ഒമ്ബത് സബ് കമ്മിറ്റികളും രൂപീകരിച്ചു. പരിപാടിയുടെ സംഘാടനവുമായി ബന്ധപ്പെട്ട് 13ന് രാവിലെ 11ന് ജില്ലാ പഞ്ചായത്ത് ഹാളില്‍ ജില്ലയിലെ പഞ്ചായത്ത് പ്രസിഡന്റുമാര്‍, സെക്രട്ടറിമാര്‍, മറ്റു തദ്ദേശസ്ഥാപന പ്രതിനിധികള്‍ എന്നിവരുടെ യോഗം വിളിക്കും.
സംസ്ഥാനത്തെ മറ്റ് ജില്ലകളില്‍ ഗുണഭോക്താക്കളുടെ കുടുംബസംഗമം വിപുലമായി നടത്തിയിരുന്നു. തിരുവനന്തപുരത്ത് 500 ഗുണഭോക്താക്കള്‍ വരെയുള്ള പഞ്ചായത്തുകളുണ്ട്. സംസ്ഥാനതല പരിപാടിയുടെ ഭാഗമായി കലാപരിപാടികളുമുണ്ടാവും.
https://www.facebook.com/Malayalivartha
