കോട്ടയം ചങ്ങനാശേരിയില്‍ ഭക്ഷണം ലഭിക്കുന്നില്ലെന്നാരോപിച്ച്‌ ഇതര സംസ്ഥാന തൊഴിലാളികള്‍ റോഡില്‍ കുത്തിയിരുന്ന് സമരം. റോഡ് ഉപരോധിച്ച്‌ നൂറോളം ഇതര സംസ്ഥാന തൊഴിലാളികളാണ് സമരം ചെയ്യുന്നത്. ദിവസങ്ങളായി ഭക്ഷണവും വെള്ളവും കിട്ടുന്നില്ലെന്നാണ് പരാതി. നാട്ടിലേക്ക് മടങ്ങി പോകാന്‍ സാഹചര്യം ഒരുക്കണമെന്നും ഇവര്‍ ആവശ്യപ്പെട്ടു.

അതേസമയം സംസ്ഥാനത്ത് ആദ്യ കോവിഡ് മരണം റിപ്പോര്‍ട്ട് ചെയ്ത എറണാകുളത്തിന് ഇന്ന് ആശ്വാസം. എറണാകുളത്ത് ഇന്ന് ലഭിച്ച 38 കോവിഡ് പരിശോധനാഫലങ്ങളും നെഗറ്റീവാണ്.

കോവിഡ് 19 രോഗബാധയുടെ പശ്ചാത്തലത്തില്‍ പുതിയതായി 1911 പേരെ കൂടി ജില്ലയില്‍ വീടുകളില്‍ നിരീക്ഷണത്തിലാക്കിയിട്ടുണ്ട്. മൊത്തം 4983 പേരാണ് ഇപ്പോള്‍ നിരീക്ഷണത്തിലുള്ളത്. ഇതില്‍ 34 പേര്‍ ആശുപത്രിയില്‍ ഐസലേഷനിലാണ്. 4949 പേര്‍ വീടുകളിലും. വീടുകളില്‍ നിരീക്ഷണത്തിലായിരുന്ന 846 പേരെ പട്ടികയില്‍ നിന്ന് ഒഴിവാക്കി.

ഇറ്റലിയില്‍ നിന്നെത്തി പത്തനംതിട്ടയില്‍ ആദ്യം രോഗം സ്ഥിരീകരിച്ച അഞ്ചുപേരുടെയും ഫലം നെഗറ്റീവായി. ആശുപത്രിയില്‍ നിന്ന് വിടുന്ന കാര്യത്തില്‍ മെഡിക്കല്‍ ബോര്‍ഡ് ഇന്ന് തീരുമാനമെടുക്കും.

അതിനിടെ കോവിഡ് ലക്ഷണങ്ങളോടെ ഒരാളെക്കൂടി ആശുപത്രിയില്‍ പ്രവേശിപ്പിച്ചിട്ടുണ്ട്. ഇതോടെ പത്തനംതിട്ട ജില്ലയില്‍ ആശുപത്രിയില്‍ നിരീക്ഷണത്തില്‍ കഴിയുന്നവരുടെ എണ്ണം 17 ആയി. കണ്ണൂര്‍ ജില്ലയില്‍ 27 പേര്‍ക്കാണ് രോഗബാധ സ്ഥിരീകരിച്ചിട്ടുള്ളത്. രോഗബാധ സംശയിച്ച്‌ നിരീക്ഷമത്തില്‍ കഴിയുന്നവരുടെ എണ്ണം 10,406 ആയി. 85 പേര്‍ ആശുപത്രികളില്‍ നിരീക്ഷണത്തിലുണ്ട്.

ജില്ലയില്‍ ഇതുവരെ 315 സാമ്ബിളുകള്‍ പരിശോധനയ്ക്ക് അയച്ചതില്‍ 215 ഫലങ്ങള്‍ നെഗറ്റീവ് ആണ്. തുടര്‍ പരിശോധനയില്‍ രണ്ടെണ്ണത്തില്‍ ഫലം പോസിറ്റീവ് ആണ്. 81 പേരുടെ ഫലം കൂടി ലഭിക്കാനുണ്ടെന്ന് ആരോഗ്യവകുപ്പ് അറിയിച്ചു.