കൊറോണയെന്ന മഹാമാരിയില്‍ പാകിസ്ഥാനിലും സ്ഥിതിഗതികള്‍ രൂക്ഷമാകുകയാണ്. 1600ഓളം പേര്‍ക്ക് കോവിഡ് ബാധ സ്ഥിരീകരിച്ചിട്ടുണ്ട്. 13 പേര്‍ മരിച്ചുവീണു. 11 പേര്‍ ഗുരുതരാവസ്ഥയില്‍ തുടരുകയാണ്. നിലവില്‍ കോറണയെ തളയക്കാന്‍ മരുന്നുകളില്ലാത്തിനാല്‍ സോഷ്യല്‍ ഡിസ്റ്റന്‍സിങ് എന്ന പ്രതിരോധം മാത്രമാണ് രോഗം വ്യാപിക്കാതിരിക്കാനുള്ള ഏക മാര്‍ഗം. പ്രതിരോധ നടപടികളുടെ ഭാഗമായി പ്രഖ്യാപിച്ച ലോക്ക ഡണിനെ തന്റെ നാട്ടുകാര്‍ ഗൗരവത്തോടെയല്ല സമീപിക്കുന്നതെന്നും എല്ലാവരും ഒരു പിക്നിക് മൂഡിലാണെന്നും സര്‍ക്കാര്‍ അടിയന്തരമായി കൊറോണയെ പ്രതിരോധിക്കാനുള്ള നടപടി സ്വീകരിക്കണമെന്നും പരസ്യമായി പറഞ്ഞത് മുന്‍ പാക് ക്രിക്കറ്റ് താരമായ ഷോയ്ബ് അക്തറാണാ. അതില്‍ നിന്നും തന്നെ പാക്കിസ്ഥാനില്‍ കൊറോണയ്ക്കതിരായ നടപടികള്‍ എത്രമാത്രം ലാഘവത്തോടെയാണ് നീങ്ങുന്നതെന്ന് വ്യക്തം.

എന്നാല്‍ സ്വന്തം ജനങ്ങള്‍ മരിച്ചു വീഴുമ്പോഴും കോവിഡ് വ്യാപനം ചൂണ്ടിക്കാട്ടി കശ്മീര്‍ വിഷയം ലോകരാജ്യങ്ങളുടെ ശ്രദ്ധയില്‍ കൊണ്ടു വരാനുള്ള നീക്കവുമായി പാകിസ്താന്‍ മുന്നോട്ടു പോകുന്നതായാണ് ഇപ്പോള്‍ പുറത്തുവരുന്ന റിപ്പോര്‍ട്ടുകള്‍ സൂചിപ്പിക്കുന്നത്. ഐക്യരാഷ്ട്രസഭ സുരക്ഷാ സമിതി അടക്കമുള്ള രാജ്യാന്തര വേദികളില്‍ കശ്മീര്‍ വിഷയം വീണ്ടും ചര്‍ച്ചയാക്കുകയാണ് ഇതിലൂടെ പാക് ഭരണകൂടം ലക്ഷ്യമിടുന്നത്. കോവിഡ് വൈറസ് ബാധയുടെ പശ്ചാത്തലത്തില്‍ കശ്മീരികളായ തടവുകാരെ വിട്ടയക്കണമെന്നും വാര്‍ത്താവിനിമയം അടക്കമുള്ള മേഖലകളില്‍ തുടരുന്ന നിയന്ത്രണങ്ങള്‍ നീക്കണമെന്നും പാക് വിദേശകാര്യ വകുപ്പ് പ്രസ്താവനയിലൂടെ ആവശ്യപ്പെട്ടതായി ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്യുന്നു. മരുന്നും മറ്റ് അവശ്യ സാധനങ്ങളും സ്വാതന്ത്രമായി കൊണ്ടു പോവാന്‍ അനുവദിക്കണമെന്നും പ്രസ്താവനയില്‍ ചൂണ്ടിക്കാട്ടുന്നു.

കശ്മീര്‍ വിഷയം ചൂണ്ടിക്കാട്ടി പാക് വിദേശകാര്യ മന്ത്രി ഷാ മെഹ്മൂദ് ഖുറേഷി യു.എന്‍ സെക്രട്ടറി ജനറലിനും സുരക്ഷാ സമിതി അധ്യക്ഷനും വീണ്ടും കത്തയച്ചു. മേഖലയുടെ ജനസംഖ്യാപരമായ അടിത്തറയെ മാറ്റുന്ന തരത്തിലുള്ള പരാമര്‍ശങ്ങളാണ് ഇന്ത്യന്‍ നേതൃത്വം നടത്തുന്നത്. സൗത്ത് ഏഷ്യയുടെ സമാധാനത്തിനും സ്ഥിരതക്കും കശ്മീര്‍ വിഷയത്തില്‍ പരിഹാരം കാണണമെന്നും കത്തില്‍ ആവശ്യപ്പെടുന്നു. ഡിസംബര്‍ മുതല്‍ നിയന്ത്രണരേഖയില്‍ ഇന്ത്യന്‍ സൈന്യം വെടിനിര്‍ത്തല്‍ കരാര്‍ ലംഘിക്കുകയാണ്. കശ്മീര്‍ വിഷയത്തില്‍ രാജ്യാന്തര ശ്രദ്ധ കിട്ടാതിരിക്കാന്‍ തെറ്റായ മാര്‍ഗങ്ങള്‍ ഉപയോഗിക്കുകയാണെന്നും ഖുറേഷി കത്തില്‍ ആരോപിക്കുന്നു.

അതേസമയം, പാക് വിദേശകാര്യ മന്ത്രിയുടെ കത്തിനോട് ഇന്ത്യന്‍ അധികൃതര്‍ പ്രതികരിച്ചില്ല. കശ്മീരില്‍ നുഴഞ്ഞുകയറ്റവും തീവ്രവാദവും പ്രോത്സാഹിപ്പിക്കുന്നത് പാക് ഭരണകൂടമാണന്ന നിലപാടാണ് യു.എന്‍ അടക്കമുള്ള വേദികളില്‍ ഇന്ത്യ സ്വീകരിച്ചിട്ടുള്ളത്. ജമ്മു കശ്മീരിനുണ്ടായിരുന്ന പ്രത്യേക പദവി നീക്കിയതിന് ശേഷം സംസ്ഥാനത്ത് നടപ്പാക്കിയ നിയന്ത്രണങ്ങളില്‍ കേന്ദ്ര സര്‍ക്കാര്‍ കാര്യമായ ഇളവുകള്‍ വരുത്തിയിട്ടില്ല.

അതിനിടെ, പാകിസ്താനില്‍ സ്ഥിതിഗതികള്‍ നിയന്ത്രണാതീതമാകുന്ന സാഹചര്യത്തില്‍ രോഗബാധിതരെ പാക് അധീന കശ്മീരിലേക്ക മാറ്റിപ്പാര്‍പ്പിക്കുന്നതായി റിപ്പോര്‍ട്ട് പുറത്തുവരുന്നുണ്ട്. തദ്ദേശവാസികളുടെ എതിര്‍പ്പിനെ അവഗണിച്ചാണ് പാക് സൈന്യത്തിന്റെ നീക്കം. പാക് അധീന കശ്മീരിലെ ഗില്‍ജിത്, ബാള്‍ട്ടിസ്താന്‍ എന്നിവിടങ്ങളിലേക്കാണ് അടച്ചിട്ട വാഹനങ്ങളില്‍ രോഗബാധിതരെ എത്തിക്കുന്നത്. ആവശ്യത്തിന് അടിസ്ഥാന സൗകര്യങ്ങളോ ആരോഗ്യ രക്ഷാ സംവിധാനങ്ങളോ പരിശീലനം സിദ്ധിച്ച ഡോക്ടര്‍മാരെയോ ലഭ്യമല്ലാത്ത തങ്ങളുടെ പ്രദേശങ്ങളിലേക്ക് വലിയ തോതില്‍ പാകിസ്താനിലെ മറ്റ് പ്രദേശങ്ങളിലുള്ള കൊറോണ രോഗികളെ കൊണ്ടുവരുന്നതിനെ ഇവര്‍ ഭീതിയോടെയാണ് നോക്കിക്കാണുന്നത്. പാക് രാഷ്ട്രീയത്തില്‍ നിര്‍ണായക സ്വാധീനമുള്ള പഞ്ചാബ് പ്രവിശ്യയെ വെച്ച് നോക്കുമ്പോള്‍ അത്ര പ്രാധാന്യമില്ലാത്ത സ്ഥലങ്ങളാണ് പാക് അധീന കശ്മീരും ഗില്‍ജിത്- ബാള്‍ട്ടിസ്താന്‍ മേഖലകള്‍. പഞ്ചാബ് പ്രവിശ്യയില്‍ ഒരു രോഗി പോലും ഉണ്ടാകരുതെന്നാണ് പട്ടാളത്തിന് ലഭിച്ചിരിക്കുന്ന നിര്‍ദ്ദേശമെന്നും റിപ്പോര്‍ട്ട് ഉണ്ട്. പഞ്ചാബിനെപ്പറ്റി മാത്രമാണ് പാക് സൈന്യം ചിന്തിക്കുന്നതെന്നും. ഇവിടം പാകിസ്താന്റെ ചവറ്റുകൂനയാണെന്നാണ് പാക് സൈന്യം കരുതുന്നതെന്നും പ്രദേശവാസികള്‍ പറയുന്നു.