തടവില്‍ നിന്നും കൂട്ടത്തോടെ വെളിയിലേക്ക്; രാജ്യത്തും സംസ്ഥാനത്തും ലോക്ക് ഡൗണ്‍ നിലനില്‍ക്കുന്ന സാഹചര്യത്തില്‍ കേരളത്തിലെ വിചാരണത്തടവുകാര്‍ക്കും, റിമാന്‍ഡ് പ്രതികള്‍ക്കും ഹൈക്കോടതി ജാമ്യം അനുവദിച്ചു; ഇളവ് ലഭിക്കുക ഏഴ് വര്‍ഷത്തിന് താഴെ ശിക്ഷ ലഭിക്കാവുന്ന കുറ്റം ചുമത്തപ്പെട്ടിരിക്കുന്നവര്‍ക്ക്
രാജ്യത്തും സംസ്ഥാനത്തും ലോക്ക് ഡൗണ്‍ നിലനില്‍ക്കുന്ന സാഹചര്യത്തില്‍ കേരളത്തിലെ വിചാരണത്തടവുകാര്‍ക്കും, റിമാന്‍ഡ് പ്രതികള്‍ക്കും ഹൈക്കോടതി ജാമ്യം അനുവദിച്ചു. ഏപ്രില്‍ 30 വരെയാണ് നിലവില്‍ ഇടക്കാല ജാമ്യം അനുവദിച്ചിരിക്കുന്നത്. ഏഴ് വര്‍ഷത്തിന് താഴെ ശിക്ഷ ലഭിക്കാവുന്ന കുറ്റം ചുമത്തപ്പെട്ടിരിക്കുന്നവര്‍ക്കാണ് ഇളവ് ലഭിക്കുക. അര്‍ഹരായവരെ ജയില്‍ സൂപ്രണ്ടുമാര്‍ മോചിപ്പിക്കണമെന്നാണ് നിര്‍ദ്ദേശം. എന്നാല്‍ സ്ഥിരം കുറ്റവാളികള്‍ക്ക് ഇടക്കാലജാമ്യത്തിന് അര്‍ഹതയില്ല .
കര്‍ശന നിബന്ധനകളോടെയാണ് ഹൈക്കോടതി ജാമ്യം അനുവദിച്ചിരിക്കുന്നത്. താമസ സ്ഥലത്ത് എത്തിയാല്‍ ഉടന്‍ പ്രതികള്‍ ലോക്കല്‍ പൊലീസ് സ്റ്റേഷനില്‍ റിപ്പോര്‍ട്ട് ചെയ്യണം. ജാമ്യത്തില്‍ പുറത്തിറങ്ങുന്നവര്‍ ലോക്ക് ഡൗണ്‍ നിര്‍ദ്ദേശങ്ങള്‍ കര്‍ശനമായി പാലിക്കണം. ജാമ്യകാലാവധി കഴിയുമ്പോള്‍ പ്രതികള്‍ ബന്ധപ്പെട്ട കോടതികളില്‍ ഹാജരാകണം. ജാമ്യം തുടരുന്നത് സംബന്ധിച്ച് വിചാരണക്കോടതി തീരുമാനം എടുക്കും. കേരളത്തിലെ ജയില്‍ സൂപ്രണ്ടുമാര്‍ കോടതി ഉത്തരവ് അനുസരിച്ച് അര്‍ഹരായ തടവുകാരെ മോചിപ്പിക്കണമെന്നാണ് ഹൈക്കോടതി നിര്‍ദ്ദേശിച്ചിരിക്കുന്നത്. നിലവില്‍ ഏപ്രില്‍ 30 വരെയാണ് ജാമ്യമെങ്കിലും ലോക്ക് ഡൗണ്‍ കാലാവധി നീളുകയാണെങ്കില്‍ ഇതിനനുസരിച്ച് ജാമ്യ കാലാവധിയും നീട്ടും.
അതേസമയം, സംസ്ഥാനത്ത് ആരോഗ്യപ്രവര്‍ത്തകന്‍ ഉള്‍പ്പെടെ 21 പേര്‍ക്കുകൂടി കഴിഞ്ഞ ദിവസം കോവിഡ് സ്ഥിരകീരിച്ചിരുന്നു. കണ്ണൂര്‍ (8), കാസര്‍കോട് (7), ഇടുക്കി, തിരുവനന്തപുരം, എറണാകുളം, തൃശൂര്‍, പാലക്കാട്, മലപ്പുറം (ഒന്നുവീതം) ജില്ലകളിലാണിവര്‍. ഇതോടെ സംസ്ഥാനത്തെ മൊത്തം രോഗബാധിതര്‍ 202 ആയി ഉയര്‍ന്നു. വിദേശത്തുനിന്ന് എത്തിയവര്‍ 18. സമ്പര്‍ക്കത്തിലൂടെ രോഗബാധിതരായ 2 പേരിലൊരാള്‍ കൊച്ചി വിമാനത്താവളത്തില്‍ യാത്രക്കാരെ പരിശോധിച്ച ഹെല്‍ത്ത് ഇന്‍സ്‌പെക്ടറാണ്. വിമാനത്താവളത്തിലുണ്ടായിരുന്ന ആരോഗ്യ പ്രവര്‍ത്തകരെല്ലാം നിരീക്ഷണത്തിലാണ്. കോട്ടയം മെഡിക്കല്‍ കോളജില്‍ രോഗിയെ പരിചരിച്ച നഴ്‌സിനു കഴിഞ്ഞയാഴ്ച കോവിഡ് ബാധിച്ചിരുന്നു.
തിരുവനന്തപുരം ജില്ലയില്‍ രോഗം സ്ഥിരീകരിച്ചയാള്‍ മെഡിക്കല്‍ കോളജില്‍ തീവ്രപരിചരണവിഭാഗത്തിലാണ്. പത്തനംതിട്ട ജില്ലയില്‍ ചികിത്സയിലായിരുന്ന 4 പേരുടെ പരിശോധനാഫലം നെഗറ്റീവായി. നിരീക്ഷണത്തില്‍ കഴിയുന്നവരില്‍ 1,40,618 പേര്‍ വീടുകളിലും 593 പേര്‍ ആശുപത്രികളിലുമാണ്. 6690 പേരുടെ സാംപിള്‍ പരിശോധനയ്ക്ക് അയച്ചതില്‍ 5518 എണ്ണവും നെഗറ്റീവാണെന്ന് ആരോഗ്യമന്ത്രി കെ.കെ.ശൈലജ അറിയിച്ചു.
https://www.facebook.com/Malayalivartha
