കൊറോണവൈറസ് ബാധയുടെ പശ്ചാതലത്തിൽ എല്ലാവരും ഭീതിയിലാണ്. രാജ്യം 21 ദിവസത്തേക്ക് ലോക്ഡൌണാണ്. ലോക്ഡൌൺ ഇനിയും നീട്ടിയേക്കും എന്ന തരത്തിലുള്ള വാർത്തകളൊക്കെ പരക്കുന്നുണ്ടെങ്കിലും സ്ഥിരീകരണം ലഭിച്ചിട്ടില്ല. എന്നാൽ ഇപ്പോൾ പ്രതിസന്ധിയിലായിരിക്കുന്നത് മരണം നടക്കുന്ന വീടുകളാണ് എന്ന് വേണമെങ്കിൽ പറയാം. ആരെങ്കിലും മരിച്ചാൽ അടുത്തേക്ക് ചെല്ലാൻ വരെ ആളുകൾ മടിക്കുകയാണ്. അത്തരത്തിലൊരു വീഡിയോയാണ് ഇപ്പോൾ സമൂഹ മാധ്യമങ്ങളിൽ വൈറലാകുന്നത്. എന്നാൽ ഈ വീഡിയോ വൈറലാകാൻ മറ്റൊരു കാരണം കൂടിയുണ്ട്. ഈ ഭയാനകമായ സാഹചര്യത്തിൽ മതത്തിനും അപ്പുറം മനുഷ്യത്വം എന്ന ഒന്ന് ഉണ്ട് എന്ന് വ്യക്തമാക്കിത്തരിക കൂടി ചെയ്യുകയാണ് ഈ കാഴ്ച .

ഉത്തർപ്രദേശിലെ ബുലന്ദ്ഷഹറിൽ അർബുദ രോഗത്തെ തുടർന്ന് മരിച്ചതാണ് രവി ശങ്കർ. എന്നാൽ ഇയാളുടെ മകൻ ലോക്ഡൌൺ കാരണം ശരീരം അടക്കം ചെയ്യാൻ എത്താൻ സാധിച്ചില്ല. കുടുംബാഗങ്ങളാകട്ടെ കൊറോണവൈറസ് ഭീതി മൂലം അടുത്തു പോലും വന്നില്ല. ഈ അവസരത്തിലാണ് തൊട്ടടുത്ത് താമസിക്കുന്ന മുസ്ലിം യുവാക്കൾ മൃതദേഹം സംസ്കരിക്കാൻ മുമ്പോട്ട് വന്നത്.രവിശങ്കറിന്റെ മൃതദേഹം ചുമലിലേറ്റി രാമനാമം ജപിച്ച് സംസ്കാര ചടങ്ങുകൾക്ക് നേതൃത്വം കൊടുക്കുന്ന മുസ്ലിം യുവാക്കളെയാണ് ദൃശ്യങ്ങളിൽ കാണുന്നത്. ഈ വിഡിയോ ഇപ്പോൾ സമൂഹമാധ്യമങ്ങളിൽ വൈറലാണ്. ഏറ്റവു കൂടുതൽ വർഗീയ പരാമർശങ്ങളും ഏറ്റുമുട്ടലുകളും നടക്കുന്ന ഉത്തർപ്രദേശിലെ ബുലന്ദ്ശഹറിൽ നിന്നുള്ള ഈ വീഡിയോ സമൂഹ മാധ്യമങ്ങൾ ഏറ്റെടുത്തിരിക്കുകയാണ്. ശശി തരൂർ അടക്കമുള്ള നേതാക്കളും വീഡിയോ റീട്വീറ്റ് ചെയ്തിട്ടുണ്ട്. മതമല്ല മനുഷ്യത്വാണ് വലുത് എന്ന് ഈ കൊറോണക്കാലത്തും ആളുകളെ വ്യക്തമാക്കിക്കൊടുക്കുന്നതാണ് ഈ കാഴ്ച .

മതവൈരത്തിെൻറ പേരിൽ ചീത്തപ്പേര് ഏറെ കേട്ട നാടാണ് ഉത്തർപ്രദേശിലെ ബുലന്ദ്ഷഹർ. പശുഘാതകർക്ക് എതിരെ നടപടിയെടുക്കണമെന്ന് ആവശ്യപ്പെട്ട് 2018 ഡിസംബറിൽ 500 ഒാളം ആൾക്കാർ പൊലീസ് സ്റ്റേഷൻ ആക്രമിക്കുകയും ഇൻസ്പെക്ടറടക്കം രണ്ട് പേരെ വെടിവെച്ച് കൊല്ലുകയും ചെയ്തത് ഇൗ ബുലന്ദ്ഷഹറിൽ ആണ്. പശുവിറച്ചി സൂക്ഷിച്ചു എന്നാരോപിച്ച് മുഹമ്മദ് അഖ്ലാഖിനെ ആൾക്കൂട്ടം തല്ലിക്കൊന്ന കേസ് അന്വേഷിക്കുന്ന ഇൻസ്പെക്ടർ സുബോധ് കുമാർ സിങ്ങാണ് അന്ന് വെടിയേറ്റ് മരിച്ചത്. കഥകളങ്ങനെ എറെയുണ്ടെങ്കിലും ഇപ്പോൾ അവിടെ നിന്ന് കേൾക്കുന്നത് മതങ്ങൾക്കും വിശ്വാസങ്ങൾക്കുമൊന്നും വേർതിരിക്കാൻ കഴിയാത്ത മനുഷ്യ സ്നേഹത്തിെൻറ കഥയാണ് എന്നത് ഏറെ പ്രതീക്ഷ നൽകുന്നു.