ബംഗ്ലാ കോളനിയില് ഭക്ഷണം തികയുന്നില്ല; സംസ്ഥാനത്ത് ഏറ്റവും കൂടുതല് ഇതര സംസ്ഥാന തൊഴിലാളികള് തമ്പടിച്ചിരിക്കുന്നത് പെരുമ്പാവൂരിലും തൊഴിലാളികളുടെ പ്രതിഷേധം; സ്ഥിതിഗതികള് നിയന്ത്രണവിധേയം
കഴിഞ്ഞ ദിവസം ചങ്ങനാശേരി പായിപ്പാട് ഇതരസംസ്ഥാന തൊഴിലാളികള് തെരുവിലിറങ്ങി പ്രതിഷേധിച്ച പശ്ചാത്തലത്തില് പെരുമ്പാവൂരില് അതിജാഗ്രത പുലര്ത്തുകയായിരുന്നു. സംസ്ഥാനത്ത് ഏറ്റവും കൂടുതല് ഇതര സംസ്ഥാന തൊഴിലാളികള് തമ്പടിച്ചിരിക്കുന്നത് പെരുമ്പാവൂരിലും പരിസര പ്രദേശങ്ങളിലുമായിട്ടാണ്. പെരുമ്പാവൂരിലെ ബംഗ്ലാ കോളനിയില് മാത്രം 1800ഓളം ഇതര സംസ്ഥാന തൊഴിലാളികളുണ്ടെന്നാണ് കണക്ക്. ഇതിനു സമീപത്തു തന്നെ കമ്മ്യൂണിറ്റി കിച്ചന് സജ്ജമാക്കിയിരുന്നു. ഇന്നു രാവിലെ ഇവര്ക്ക് ചപ്പാത്തിയും പരിപ്പു കറിയും തയ്യാറാക്കി കൊടുക്കുകയും ചെയ്തിരുന്നു. എന്നാല് ഇത് തികഞ്ഞില്ലെന്ന പരാതി ഉന്നയിച്ചാണ് ഇവര് പ്രതിഷേധിക്കുന്നതെന്നാണ് ലഭിക്കുന്ന വിവരം. അധികൃതര് സംഭവസ്ഥലത്തേക്ക് എത്തിയിട്ടുണ്ട്. സ്ഥിതിഗതികള് നിയന്ത്രണവിധേയമാണെന്നാണ് ലഭിക്കുന്ന റി്പ്പോര്ട്ട്.
കഴിഞ്ഞ ദിവസം,അതിഥി തൊഴിലാളികള് ഏറ്റവും കൂടുതല് താമസിക്കുന്ന സ്ഥലങ്ങളില് പൊലീസിന്റെയും റവന്യു വകുപ്പിന്റെയും തദ്ദേശ സ്ഥാപനങ്ങളുടെയും നേതൃത്വത്തില് ബോധവല്ക്കരണം നടത്തിയിരുന്നു. ബംഗാള് കോളനിയില് എസ്പി കെ.കാര്ത്തിക്കിന്റെയും മൂവാറ്റുപുഴ ആര്ഡിഒ സാബു കെ.തോമസിന്റെയും നേതൃത്വത്തില് ബോധവല്ക്കരണം നടത്തി. പായിപ്പാടുണ്ടായ അതിഥി തൊഴിലാളി പ്രതിഷേധത്തിന്റെ അടിസ്ഥാനത്തില് പെരുമ്പാവൂരില് വലിയ ജാഗ്രതയാണ് പൊലീസും ജില്ലാ ഭരണകൂടവും സ്വീകരിക്കുന്നത്.
അതേസമയം, കോട്ടയം പായിപ്പാട്ടെ ഇതര സംസ്ഥാന തൊഴിലാളികളുടെ പ്രതിഷേധത്തില് രാവിലെ ബംഗാള് സ്വദേശിയെ പൊലീസ് കസ്റ്റഡിയിലെടുത്തു. സര്ക്കാര് ഓര്ഡിനനസ് ലംഘിച്ച് അന്യായമായി സംഘം ചേര്ന്നതിനാണ് കസ്റ്റഡിയിലെടുത്തത്. രണ്ടായിരം പേര്ക്കെതിരെ കേസ് രജിസ്റ്റര് ചെയ്തു. കോട്ടയം ജില്ലയില് നിരോധനാജ്ഞ പ്രഖ്യാപിച്ചു. പായിപ്പാട്ടെ അതിഥി തൊഴിലാളികളുടെ പെട്ടന്നുണ്ടായ പ്രതിഷേധത്തിനു പിന്നില് ഗൂഢാലോചന നടന്നതായി ഇന്നലെ തന്നെ സംശയം ഉയര്ന്നിരുന്നു. ഇക്കാര്യം അന്വേഷിക്കാന് ജില്ലയുടെ ചുമതലയുള്ള മന്ത്രി പി തിലോത്തമന് ജില്ലാ പൊലീസ് മേധാവിക്ക് നിര്ദ്ദേശവും നല്കിയിരുന്നു. ഇതേത്തുടര്ന്ന് ഇന്നലെ രാത്രി തന്നെ തൊഴിലാളികള് താമസിക്കുന്ന ക്യാംപുകളില് പൊലീസ് പരിശോധന നടത്തുകയും മൊബൈല് ഫോണുകള് പിടിച്ചെടുക്കുകയും ചെയ്തു. ഫോണുകള് പരിശോധിച്ചതില് നിന്ന് പ്രതിഷേധമുണ്ടായ സമയത്ത് ആളുകളെ വിളിച്ചു കൂട്ടിയതിനാണ് ബംഗാള് സ്വദേശി മുഹമ്മദ് റിഞ്ചുവിനെ തൃക്കൊടിത്താനം പൊലീസ് കസ്റ്റഡിയിലെടുത്തത്. സര്ക്കാര് നിര്ദ്ദേശം ലംഘിച്ച് അന്യായമായി സംഘം ചേര്ന്നതിനാണ് ഇയാലെ കസ്റ്റഡിയിലെടുത്തത്. 2000 പേര്ക്കെതിരെ കേസും എടുത്തിട്ടുണ്ട്.
പെട്ടന്നുണ്ടായ പ്രതിഷേധത്തിന് പിന്നില് തീവ്ര സ്വഭാവമുള്ള ചില സംഘടനകളുടെ പങ്കും പൊലീസ് സംശയിക്കുന്നുണ്ട്. തൊഴിലാളികള്ക്കിടയില് പ്രചരിച്ച വാട്സ് ആപ്പ് ശബ്ദ സന്ദേശത്തെപ്പറ്റിയും അന്വേഷിക്കും. അതിഥി തൊഴിലാളികള് സംഘടിച്ചേക്കുമെന്ന റിപ്പോര്ട്ടുകളെ തുടര്ന്ന് കോഴിക്കോട് നഗരത്തിലും കനത്ത സുരക്ഷ ഏര്പ്പെടുത്തി. അതിഥി തൊഴിലാളികളുടെ ക്യാമ്പുകളിലും പൊലീസ് നിരീക്ഷണം ശക്തമാക്കി. അതിനിടെ നിലമ്പൂരില് നിന്ന് ഉത്തരേന്ത്യയിലേക്ക് ട്രെയിന് ഏര്പ്പെടുത്തിയെന്ന വ്യാജ വാര്ത്ത പ്രചരിപ്പിച്ച കേസില് യൂത്ത് കോണ്ഗ്രസ് നേതാവ് പിടിയിലായി. യൂത്ത് കോണ്ഗ്രസ് എടവണ്ണ മണ്ഡലം മുന് സെക്രട്ടറിയായ ഷാക്കിറാണ് പിടിയിലായത്.
https://www.facebook.com/Malayalivartha