കോണ്‍ഗ്രസില്‍ രമേശ് ചെന്നിത്തല ഒറ്റപ്പെടുന്നു. മുഖ്യമന്ത്രിയെ ആവശ്യത്തിനും അനാവശ്യത്തിനും പിന്തുണക്കുന്ന ചെന്നിത്തലക്ക് പിണറായി വിജയനെ ഭയമാണെന്ന് കോണ്‍ഗ്രസുകാര്‍ തന്നെ പറയുന്നു.

സാലറി ചലഞ്ചിനു സര്‍ക്കാര്‍ തീരുമാനിച്ചാല്‍ സഹകരിക്കുമെന്ന രമേശ് ചെന്നിത്തലയുടെ പ്രസ്താവനക്കെതിരെയാണ് കോണ്‍ഗ്രസിനുള്ളില്‍ കലാപം പുകയുന്നത്. കോണ്‍ഗ്രസ് ആഭിമുഖ്യമുള്ള സര്‍വീസ് സംഘടനകള്‍ ചെന്നിത്തലയുടെ പ്രസ്താവനക്കെതിരെ പരസ്യമായി രംഗത്തെത്തി.

കാള പെറ്റെന്ന് കേട്ടപ്പോള്‍ കയറെടുത്ത പ്രതിപക്ഷ നേതാവിനെതിരെ കെ. പി. സി. സി. പ്രസിഡന്റും രംഗത്തെത്തി. കോടികള്‍ മുടക്കി നിയമിച്ച ഉപദേശകരെ പിരിച്ചുവിട്ട ശേഷം മതി പാവപ്പെട്ട ജീവനക്കാരുടെ പിച്ചചട്ടിയില്‍ കൈയിട്ട് വാരുന്നതെന്ന് മുല്ലപ്പള്ളി പറഞ്ഞു.

മുഖ്യമന്ത്രിയുടെ ഉപദേശകര്‍ സംസ്ഥാനത്തിന് നല്‍കിയ സേവനത്തെ കുറിച്ച് സര്‍ക്കാര്‍ ധവളപത്രം ഇറക്കണമെന്നും മുല്ലപ്പള്ളി ആവശ്യപ്പെട്ടു. 8 ഉപദേശകരെ ഉടന്‍ പിരിച്ചു വിടണം. ഒന്നേമുക്കാല്‍ കോടി മുടക്കിയ ഹെലികോപ്റ്റര്‍ ഇടപാട് റദ്ദാക്കണം. ഒരു പ്രയോജനവുമില്ലാത്ത ഭരണ പരിഷ്‌ക്കാര കമ്മീഷന്‍ പിരിച്ചുവിടണം. കേരള ഹൗസിലെയും ഹൈക്കോടതിയിലെയും ലെയ്‌സന്‍ ഓഫീസര്‍മാരെ പിരിച്ചു വിടണം.

22 ലക്ഷത്തിലധികം വരുന്ന പ്രളയ ഫണ്ട് തട്ടിയെടുപ്പ് അന്വേഷിക്കുകയും കുറ്റക്കാരില്‍ നിന്ന് തുക വസൂലാക്കുകയും വേണം. പെരിയ,മട്ടന്നൂര്‍ കൊലപാതകങ്ങളില്‍ പ്രതികളെ രക്ഷിക്കാന്‍ കോടികള്‍ മുടക്കി സുപ്രീം കോടതിയില്‍ അഭിഭാഷകരെ കാണി നിരത്തി. 250 ക്വാറികളും 500 ബാറുകളും അനുവദിച്ച് പാര്‍ട്ടിയെ സമ്പന്നമാക്കി. ഇത്രയുമൊക്കെ ചെയ്ത സ്ഥിതിക്ക് തെറ്റുകളെല്ലാം തിരുത്തിയ ശേഷം പണം പിരിക്കാമെന്നാണ് മുല്ലപള്ളി പറഞ്ഞത്.

പ്രളയത്തിന്റെ ഫണ്ടില്‍ വ്യാപകമായ തിരിമറി നടന്നതായി ആരോപണങ്ങള്‍ കൊടുമ്പിരി കൊണ്ട സമയത്താണ് കൊറോണ വൈറസ് വന്നത്. അതോടെ ആരോപണങ്ങളെല്ലാം വെള്ളത്തിലായി. സ്തുത്യര്‍ഹമായ സേവനം നടത്തികൊണ്ടിരുന്ന ആരോഗ്യ മന്ത്രിയെ ചെന്നിത്തലയുടെ സഹായത്തോടെയാണ് മുഖ്യമന്ത്രി ഒരുക്കിയത്. പലപ്പോഴും പ്രതിപക്ഷ നേതാവ് മുഖ്യമന്ത്രിക്ക് ചെയ്യുന്നത് വലിയ സഹായങ്ങളാണെന്ന് കെ. പി. സി. സിയില്‍ അഭിപ്രായം ഉയര്‍ന്നിട്ടുണ്ട്. ഇതെല്ലാം മുഖ്യമന്ത്രി സ്ഥാനത്തേക്ക് കണ്ണെറിഞ്ഞിരിക്കുന്ന ചെന്നിത്തലക്ക് പാരയായി മാറാനാണ് സാധ്യത

സാലറി ചലഞ്ചിന്റെ പ്രസ്താവന ദൃശ്യ മാധ്യമങ്ങളില്‍ വന്നയുടനെയാണ് ചെന്നിത്തല അതിനെ സ്വാഗതം ചെയ്തത്. അതേ കുറിച്ച് പാര്‍ട്ടിയില്‍ ചര്‍ച്ച ചെയ്യുകയോ കൂടിയാലോചനകള്‍ നടത്തുകയോ ചെയ്തില്ല. ഇതെല്ലാം അദ്ദേഹത്തിന് പാരയായി തീര്‍ന്നു. ഉമ്മന്‍ ചാണ്ടി പോലും ഒരക്ഷരം മറുപടി പറഞ്ഞില്ല.

മുഖ്യമന്ത്രി സ്ഥാനത്തേക്ക് നോട്ടമിടുന്ന മുല്ലപ്പള്ളിക്ക് ചെന്നിത്തല ഒരുക്കി കൊടുത്തത് വലിയൊരു അവസരമാണ്.