പുതിയ കോവിഡ് കേസുകള്‍ റിപ്പോര്‍ട്ട് ചെയ്ത സാഹചര്യത്തില്‍ കോട്ടയം, കൊല്ലം, ഇടുക്കി, തിരുവനന്തപുരം ജില്ലകളില്‍ നിയന്ത്രണങ്ങള്‍ കൂടുതല്‍ കര്‍ശനമാക്കിയതായി മുഖ്യമന്ത്രി പിണറായി വിജയന്‍ അറിയിച്ചു. ജില്ലാ ദുരന്തനിവാരണ അതോറിറ്റിയുമായി ചര്‍ച്ച ചെയ്തു നിയന്ത്രണങ്ങള്‍ ഏര്‍പ്പെടുത്താന്‍ ഡിജിപി ലോക്‌നാഥ് ബെഹ്‌റ നിര്‍ദേശിച്ചു. ഹോട്‌സ്‌പോട്ട് സ്ഥലങ്ങളില്‍ ഒരു പ്രവേശനകവാടം ഒഴിച്ച് ബാക്കി എല്ലാ വഴികളും അടയ്ക്കും. വളരെ അത്യാവശ്യമുള്ള പ്രവര്‍ത്തനങ്ങള്‍ മാത്രമേ ഈ സ്ഥലങ്ങളില്‍ അനുവദിക്കൂ. അത്യാവശ്യ സേവനങ്ങള്‍ വീടുകളില്‍ ലഭ്യമാക്കും.
അതേസമയം തിരുവനന്തപുരം സംസ്ഥാനത്ത് ഇന്നലെ 2 പേര്‍ക്ക് കോവിഡ് സ്ഥിരീകരിച്ചു. മലപ്പുറം (1), കാസര്‍കോട് (1) ജില്ലകളിലാണിത്. മലപ്പുറത്തെ രോഗ ബാധിതന്‍ മഹാരാഷ്ട്രയില്‍ നിന്നു വന്നതാണ്. കാസര്‍കോടുള്ള രോഗിക്കു സമ്പര്‍ക്കത്തിലൂടെയാണു വൈറസ് പകര്‍ന്നത്. സംസ്ഥാനത്ത് 4 കോവിഡ് ഹോട്‌സ്പോട്ടുകള്‍ കൂടി പ്രഖ്യാപിച്ചു. ഓച്ചിറ, തൃക്കോവില്‍വട്ടം പഞ്ചായത്തുകള്‍ (കൊല്ലം), ഉദയനാപുരം പഞ്ചായത്ത് (കോട്ടയം), നെയ്യാറ്റിന്‍കര മുനിസിപ്പാലിറ്റി (തിരുവനന്തപുരം) എന്നിവയാണു പുതിയ ഹോട്‌സ്‌പോട്ടുകള്‍. ഇന്നലെ 32 പ്രദേശങ്ങള്‍ ഹോട്‌സ്‌പോട്ടില്‍ നിന്ന് ഒഴിവായി. നിലവില്‍ 70 ഹോട്‌സ്‌പോട്ടുകളാണുള്ളത്.

കോട്ടയം ജില്ലയിലെ മുനിസിപ്പാലിറ്റികളിലെയും ഗ്രാമപഞ്ചായത്തുകളിലെയും മാര്‍ക്കറ്റുകളില്‍ കൂടുതല്‍ നിയന്ത്രണങ്ങള്‍ ഏര്‍പ്പെടുത്തി. നിയന്ത്രണങ്ങള്‍ നടപ്പാക്കുന്നതിന് ഇന്‍സിഡന്റ് കമാന്‍ഡര്‍മാരായ തഹസില്‍ദാര്‍മാര്‍ക്ക് ജില്ലാ ദുരന്തനിവാരണ അതോറിറ്റി ചെയര്‍മാനായ കളക്ടര്‍ പി കെ സുധീര്‍ ബാബു ചുമതല നല്‍കി. കേന്ദ്ര ആഭ്യന്തര മന്ത്രാലയത്തിന്റെയും സംസ്ഥാന സര്‍ക്കാരിന്റെയും നിര്‍ദേശങ്ങള്‍ പരിഗണിച്ചാണ് തീരുമാനം.

നിയന്ത്രണങ്ങള്‍ ചുവടെ

മാര്‍ക്കറ്റിലേക്ക് ചരക്കുമായി വരുന്ന വാഹനങ്ങള്‍ പ്രവേശിക്കുന്നതിനും പുറത്തേക്ക് പോകുന്നതിനും പ്രത്യേക മേഖലകള്‍ നിര്‍ണയിക്കണം. പ്രവേശിക്കുന്ന സ്ഥലത്ത് ലോറി എത്തുമ്പോള്‍ അണുനശീകരണം നടത്തണം.

പ്രവേശിക്കുന്ന സ്ഥലത്ത് ഇന്‍ഫ്രാറെഡ് തെര്‍മോ മീറ്റര്‍ ഉപയോഗിച്ച് ചരക്കു വാഹനങ്ങളിലെ ഡ്രൈവര്‍മാരുടെയും സഹായികളുടെയും ശരീരോഷ്മാവ് അളക്കണം. തുടര്‍ന്ന് അണ്‍ലോഡിംഗ് പാസ് അനുവദിക്കണം. നല്‍കുന്ന പാസുകളുടെ ഒരു രജിസ്റ്റര്‍ സൂക്ഷിക്കണം.)

ഇത്തരം പാസില്ലാത്ത വാഹനങ്ങളില്‍നിന്ന് കടയുടമകളും തൊഴിലാളികളും ചരക്ക് ഇറക്കാന്‍ പാടില്ല.

പരിശോധനയില്‍ പനി സംശയിക്കപ്പെടുന്നവരെ ഉടന്‍ തന്നെ തൊട്ടടുത്തുള്ള സര്‍ക്കാര്‍ ആശുപത്രിയിലേക്ക് തുടര്‍പരിശോധനയ്ക്ക് എത്തിക്കണം.

മാര്‍ക്കറ്റിലേക്കുള്ള പ്രവശേന സ്ഥലത്ത് ഈ നിയന്ത്രണങ്ങള്‍ നടപ്പാക്കാന്‍ കഴിയുന്ന രീതിയില്‍ ലോഡ് ഇറക്കുന്നതിനുള്ള സമയം ക്രമീകരിക്കണം.

മൊത്തവിതരണ, കച്ചവടക്കാര്‍ ദിവസേന തങ്ങളുടെ കടയില്‍ ലോഡ് ഇറക്കിയ വാഹനങ്ങളുടെയും ലോഡ് ഇറക്കിയ തൊഴിലാളികളുടെയും പേരുവിവരവും ഫോണ്‍ നമ്പരുകളും എഴുതി സൂക്ഷിക്കുകയും ആവശ്യപ്പെടുമ്പോള്‍ പരിശോധനയ്ക്ക് ഹാജരാക്കുകയും വേണം.

എന്നാല്‍ സംസ്ഥാനത്ത് ഇന്നലെ 14 പേര്‍ കോവിഡ് രോഗമുക്തരായി. ഇതോടെ മൊത്തം രോഗമുക്തര്‍ 383. ഇപ്പോള്‍ 111 പേര്‍ ചികിത്സയിലുണ്ട്. നിരീക്ഷണത്തില്‍ ഉള്ളവരില്‍ 20,285 പേര്‍ വീടുകളിലും 426 പേര്‍ ആശുപത്രികളിലുമാണ്.ഇന്നലെ 95 പേരെ ആശുപത്രികളില്‍ പ്രവേശിപ്പിച്ചു. ആരോഗ്യ പ്രവര്‍ത്തകര്‍, അതിഥിത്തൊഴിലാളികള്‍, സാമൂഹിക സമ്പര്‍ക്കം കൂടുതലുള്ള വ്യക്തികള്‍ തുടങ്ങിയ മുന്‍ഗണനാ ഗ്രൂപ്പില്‍ നിന്ന് 1508 സാംപിളുകള്‍ ശേഖരിച്ചതില്‍ 897 എണ്ണവും നെഗറ്റീവാണ്. 3128 സാംപിളുകള്‍ പരിശോധനയ്ക്കയച്ചു. ഇതില്‍ 3089 എണ്ണം നെഗറ്റീവ് ആണ്. ഇടുക്കിയില്‍ സംശയിച്ച 3 പേരുടെ ഫലം നെഗറ്റീവാണ്. മുംബൈയില്‍ നിന്നു ചരക്കുലോറിയില്‍ നാട്ടിലെത്തിയ മാറഞ്ചേരി പരിച്ചകം സ്വദേശിക്കാണ് (40 വയസ്സ്) മലപ്പുറത്ത് ഇന്നലെ രോഗം സ്ഥിരീകരിച്ചത്.