1.88 ലക്ഷം രൂപ വിപണി വിലയുള്ള ബുള്ളറ്റിന് 9.5 ലക്ഷം ചെലവാക്കി അഗ്‌നിരക്ഷാസേന വാങ്ങിയത് 50 എണ്ണം, ധൂര്‍ത്തിനെച്ചൊല്ലി സേനയ്ക്കുള്ളില്‍ അമര്‍ഷം
ഇരട്ടിയിലേറെ തുക മുടക്കിയാണ് തീയണയ്ക്കാന്‍ ഉപയോഗിക്കുന്ന വാട്ടര്‍ മിസ്റ്റ് ബുള്ളറ്റുകള്‍ അഗ്‌നിരക്ഷാസേന വാങ്ങയതെന്ന് ആരോപണം. 50 ബുള്ളറ്റുകള്‍ വാങ്ങാന്‍ സേന ചെലവാക്കിയത് 4.75 കോടി രൂപ.
ശരാശരി 1.88 ലക്ഷം രൂപ വിപണിവിലയുള്ള ബുള്ളറ്റില്‍ ഒന്നര ലക്ഷം രൂപയില്‍ താഴെമാത്രം വിലയുള്ള അഗ്‌നിരക്ഷാ ഉപകരണങ്ങള്‍ ഘടിപ്പിച്ചതിന്റെ പേരില്‍ 9.5 ലക്ഷം രൂപ വീതം വിലയിട്ടെന്നാണ് പറയുന്നത്. ധൂര്‍ത്തിനെച്ചൊല്ലി സേനയ്ക്കുള്ളില്‍ അമര്‍ഷമുയരുന്നുണ്ട്.
വെള്ളവും ഫോമും നിറച്ച രണ്ടു സിലിണ്ടറുകളും ശക്തിയായി ചീറ്റിക്കാന്‍ മര്‍ദം നല്‍കുന്ന ഓക്‌സിജന്‍ സിലിണ്ടറുകളും 500 സിസി എന്‍ജിന്‍ ശേഷിയുള്ള ബുള്ളറ്റില്‍ ഘടിപ്പിച്ചിട്ടുണ്ട്. മുന്‍ഭാഗത്തു ഗ്ലാസ് ഗാര്‍ഡ്, ഫസ്റ്റ് എയ്ഡ് ബോക്‌സ്, സിലിണ്ടറുകള്‍ ഘടിപ്പിക്കാനുള്ള സ്റ്റാന്‍ഡ്, സൈറണ്‍, ബീക്കണ്‍ ലൈറ്റ് എന്നിവയാണ് അധികമായി ഘടിപ്പിച്ചിട്ടുള്ള ഉപകരണങ്ങള്‍. ഇവയെല്ലാം ചേര്‍ത്താലും ഒന്നര ലക്ഷം രൂപയിലധികം വിലവരില്ല.
നേരത്തെ വാങ്ങിയ മുപ്പതിലേറെ വാട്ടര്‍ മിസ്റ്റ് ബുള്ളറ്റുകള്‍ കട്ടപ്പുറത്താണ്. ഫയര്‍ എന്‍ജിനുകള്‍ എത്തുംമുന്‍പേ തീയണച്ചു തുടങ്ങുക എന്നതാണ് വാട്ടര്‍ മിസ്റ്റ് ബുള്ളറ്റുകളുടെ ദൗത്യം. ഊടുവഴികളിലും മറ്റും രക്ഷാപ്രവര്‍ത്തനത്തിനും ഇവ ഉപയോഗിക്കാനാകും. യഥാര്‍ഥ വിലയേക്കാള്‍ ഉയര്‍ന്ന തുക ക്വോട്ട് ചെയ്താണ് ടെന്‍ഡര്‍ നല്‍കിയതെന്ന് വിവരമുണ്ട്.
https://www.facebook.com/Malayalivartha
