ഇക്കഴിഞ്ഞ 8-ന് മാനന്തവാടി മുതിരേരി പുഴക്കടവില്‍ കുളിക്കുകയായിരുന്ന 2 യുവതികളെ അപമാനിക്കാന്‍ ശ്രമിച്ചത് ചോദ്യം ചെയ്ത യുവതിയുടെ പിതാവിനെ ഒരു സംഘം മര്‍ദിച്ചതായി പരാതി. സംഭവം നടന്ന ഉടന്‍ പൊലീസില്‍ അറിയിച്ചിട്ടും അത് ഒതുക്കി തീര്‍ക്കാന്‍ പൊലീസ് ശ്രമിക്കുന്നതായി ആക്ഷേപം.

വിദ്യാര്‍ഥിനികളായ 2 യുവതികള്‍ 8-ാം തീയതി വൈകിട്ടാണ് പുഴക്കടവില്‍ കുളിക്കാനെത്തിയത്. പുഴയുടെ അക്കരെ കൂട്ടം കൂടിയിരുന്ന സംഘം യുവതികളെ അസഭ്യം പറയുകയും മൊബൈല്‍ ഫോണില്‍ ചിത്രങ്ങള്‍ പകര്‍ത്തുകയും ചെയ്തു എന്നുമാണ് പരാതി.

സംഭവത്തില്‍ എള്ളുമന്ദം സ്വദേശികളായ വേങ്ങാരംകുന്ന് പുത്തലത്ത് നിനോജ് (40), മൂലപ്പീടിക പാലക്കാളില്‍ അനൂപ് (33) മൂലപ്പീടിക ചേനത്തൂട്ട് അനീഷ് (38), മൂലപ്പീടിക ചേനത്തൂട്ട് ബിനീഷ് (41), വേങ്ങാരംകുന്ന് പള്ളിക്കല്‍ അജീഷ് (40) എന്നിവര്‍ക്ക് എതിരെ പൊലീസ് കേസ് എടുത്തു.

ഇത് ചോദ്യം ചെയ്ത യുവതികളെ സംഘം ഭീഷണിപ്പെടുത്തിയെന്നും പറയുന്നു. പിന്നീട് സ്ഥലത്തെത്തി യുവാക്കളെ ചോദ്യം ചെയ്ത യുവതികളില്‍ ഒരാളുടെ പിതാവിനെ സംഘം വളഞ്ഞിട്ട് മര്‍ദിക്കുകയും ചെയ്തു. മര്‍ദനത്തില്‍ പല്ല് പൊഴിഞ്ഞ ഇയാള്‍ ജില്ലാ ആശുപത്രിയുടെ അത്യാഹിത വിഭാഗം പ്രവര്‍ത്തിക്കുന്ന മാനന്തവാടി വിന്‍സെന്റ്ഗിരി ആശുപത്രിയില്‍ ചികിത്സ തേടി.

സംഭവം നടന്ന ഉടന്‍ ഫോണില്‍ വിളിച്ച് വിവരം അറിയിക്കുകയും പിറ്റേന്ന് തലപ്പുഴ സ്റ്റേഷനിലും മാനന്തവാടി സ്റ്റേഷനിലും നേരിട്ട് എത്തി പരാതി നല്‍കിയിട്ടും പൊലീസ് നടപടി സ്വീകരിച്ചില്ലെന്നാണ് യുവതിയുടെയും വീട്ടുകാരുടെയും ആക്ഷേപം. രാഷ്ട്രീയ ഇടപെടലിനെ തുടര്‍ന്ന് പ്രതികളെ സംരക്ഷിക്കുന്നതിന് പൊലീസ് ശ്രമം നടത്തുന്നതായും പരാതിയുയര്‍ന്നു. സംഭവത്തില്‍ വനിതാ കമ്മിഷനും പരാതി നല്‍കിയിട്ടുണ്ട്.

പ്രതിഷേധം ഉയര്‍ന്നതോടെയാണ് പൊലീസ് വീട്ടിലെത്തി യുവതികളുടെ മൊഴിയെടുത്തത്. എന്നാല്‍, നടപടിയില്‍ വീഴ്ച ഉണ്ടായിട്ടില്ലെന്നും പ്രതികള്‍ ഒളിവിലാണെന്നും പൊലീസ് അധികൃതര്‍ പറഞ്ഞു.

മുതിരേരിയില്‍ സ്ത്രീകളെ അപമാനിക്കാന്‍ ശ്രമിക്കുകയും അത് തടയാന്‍ ശ്രമിച്ച രക്ഷിതാവിനെ ക്രൂരമായി മര്‍ദിക്കുകയും ചെയ്ത പ്രതികളായ സിപിഎം പ്രവര്‍ത്തകരെ ഉടന്‍ അറസ്റ്റ് ചെയ്യണമെന്ന് ആവശ്യപ്പെട്ട് യൂത്ത് കോണ്‍ഗ്രസ് എടവക മണ്ഡലം കമ്മിറ്റി നില്‍പ് സമരം നടത്തി. ജില്ലാ ജനറല്‍ സെക്രട്ടറി മുസ്തഫ എറമ്പയില്‍ ഉദ്ഘാടനം ചെയ്തു. ഷില്‍സന്‍ കോക്കണ്ടത്തില്‍ അധ്യക്ഷത വഹിച്ചു. ഫൈസല്‍ ആലമ്പാടി, മനാഫ് ഉപ്പി എന്നിവര്‍ പ്രസംഗിച്ചു.